親子鮮果撻

呢個果撻， 係暑假時同一對仔女整既， 又係多得YAHOO BLOG 關門大吉緣故， 拖到而家至 暴光。其實諗返， 同一對仔女整過咁多親子美食， 整呢個果撻係最開心既。因為兩位寶貝參與程度係十分之高。

好， 未睇兩位寶貝點反轉果撻之前， 睇下材料先：

撻皮材料：

室温牛油  45G

糖              20G

低粉          85G

旦液          5G

餡料：

朱古力漿 ／ 醬    適量 （多咪塗多D， 少咪薄D， 睇人口味）

吉士醬  ／ 忌廉  適量

生果

1）糖拌入室温牛油打發至發白

略伴勻低粉

真人示範要點落手搓勻低粉至粉糰

2）慢慢注入旦液拌勻。最後篩入低粉搓勻。

Isaac：大家唔駛怕手仔污糟架， 好似玩泥膠咁咋嘛， 又搓又壓， 好好玩呀

3）用保鮮紙包好放雪櫃略雪30分鐘至一小時， 再取出壓平， 又或可以唔壓平， 先分割大小均一的份量， 再放入撻模至壓平。

Isaac: 好似我咁， 輕手碌平就得架啦。厚薄大家適隨尊便啦。碌好再CUT撻模大小出黎放入撻模就得。

Isaac: 又或者好似我咁，搓波波再放入撻模上唧平返又得。

 4）之後， 要入爐焗了。不過， 入爐之前， 一定要用叉篤洞先， 否則， 焗完出黎個撻皮會漲哂架。入爐用180度焗10分鐘左右就得。

妹妹做事， 一向認真。似足媽媽。

5）出爐後， 要攤涼。呢個時候， 就可以溶定朱古力變漿。我就無量朱古力落幾多， 覺得差唔多就算。反正唔夠咪再溶過啦。簡單D可以用搽包既朱古力醬又得。涼哂可以薄塗一層朱古力係撻上了(作用係防止生果有水會令撻皮變淋）

Claire: 好似好好味咁喎， 嘻嘻

係Claire 好專心咁搽朱古力漿時， 媽媽就好忙咁打發緊忌廉。媽媽係用淡忌廉打既。所以， 反正唔係唧花， 淡忌廉加糖打發， 好似健康D。

6）塗忌廉係果撻的朱古力層上。之後， 可以任放生果做裝飾。

Claire: 我想快D 食呀～～～

Isaac： 我又放生果呀～～～好好玩呀

由兩位小朋友放既生果。媽媽覺得算係咁啦。都好靚架啦。

Claire: 唔～～～好味～～～～

Isaac: 靚唔靚呀？

呢次製成品， 真係好好味。尤其係個撻皮， 雪到翌日仲係好脆。唔會比忌廉整到淋哂。可惜跟住兩兄妹成日輪住病， 無得再整第二次了。