百厭妹真面目

媽媽成日都話Claire 粗魯，有幾粗魯？睇下片咪知，錄於 23 Sep 14: （按此進入）

媽媽見到真係頭都暈埋，邊有女仔人家咁粗魯至得架。成日行街都起飛腳，有次仲無啦啦走上前起飛腳踢前面個婆婆，真係嚇到媽媽鼻哥隆都無肉呀。

除此之外，Claire 仲好老積架，尤其係睇死爸爸唔會大鬧佢，就成日百百厭厭咁，做錯事仲老老積積咁，真係無佢符。錄於 23 Sep 14: （按此進入）

雖然Claire 係咁粗魯又老積，不過係學校，佢話自己好聽話，唔會咬人（成日咬哥哥）又唔會打人架喎～～～咁，按老師評價，似乎又真係响學校聽話D既。如果係屋企都咁斯文，咁就好了。

妹妹體操彈床進度

Claire 目前為止，除左學畫，仲有係跳佢鍾意既彈床體操。不過礙於體形同年紀，當大家準備為十月體操比賽努力練習時，Claire 只好陪練。人仔細細既Claire，做某D動作時，媽媽都引唔住笑。錄於15 Sep 14 ：（按此去片）

媽媽成日諗，究竟Claire 知唔知自己無份參加比賽，會唔會有點兒失望，又，當佢見到各大姐姐哥哥做到動作而佢自己做唔到，會唔會失信心。不過點都好，睇住Claire 好用心好努力咁嘗試，媽媽真係好欣賞佢既毅力。

雖然係細粒，玩彈床既年資都無半年，但Claire 可以跳彈床都有板有眼，識坐企分腿，係彈床上邊彈彈下仲可以控制到雙腿，真係唔容易，媽媽真係好開心架。錄於22 Sep 14:（按此去片）

體操比賽聽聞係一年只得一次，唯有寄望妹妹努力學習，食多D大隻D，出年可以一嘗比賽滋味啦。

兄妹情

29 Sep 14 話說Isaac 同Claire 呢兩兄妹，一個願打一個願捱。哥哥成日恰阿妹唔夠佢醒，成日昆阿妹。難得阿妹又抵得諗之餘，仲好鬼錫阿哥。幾乎食乜都話要留一份比哥哥。Claire 真係好好。

好到去公園，都會幫大隻哥哥推氹氹轉。唔知醜既哥哥仲大大聲叫個妹推快D。成日都係咁，真係比佢激死。

大熱天時，玩到成身汗，返到屋企，一人一支雪條。媽媽第一次買呢D西瓜造型雪條，因為早前Isaac 話想食西瓜冰喎（媽媽去年造過），所以，媽媽見到有西瓜造型既雪條，即買返去。Claire 第一次見，一望到支雪條，好關心好温柔咁對哥哥講：哥哥，小心食呀，有核架～～

媽媽聽到，覺得呢個妹妹真係好可愛呀。

Isaac: 呢D唔係核黎架，哈哈。豆黎架咋。

呢兩兄妹既童年，就係咁講，你關心我時我又笑下你，阿妹咬哥哥時，哥哥又喊住叫佢以後唔好再咬。媽媽睇住，真係有時窩心有時激心。不過呢D日子好快會過，當佢地大哂後，只能成為回憶了。

2014讓愛動起來－－－三等奬

21 Sep 14 話說呢日我地去到老年咁遠出席繪畫比賽既頒奬典禮。真係特登去到咁遠，不過媽媽心諗，畫班而家都有奬拎，不過好似未出席過頒獎禮，對一個咁細既小朋友黎講，可能都好抽象唔知張畫拎到奬。所以，都係陪下少爺出去上環一趟啦。至少佢印象中，原來有一幅畫叫做拎過奬。

呢個主辦機構幾特別，特別在於原來個奬座可以做水晶之餘，LASER左仔仔張畫入去裡邊，好鬼靚既姐。可能太靚啦，Isaac 開頭堅持要放床頭，點不知就係咁，比媽媽唔小心整跌左，個座底爛左。好在 Isaac 無嬲媽咪咋。而家，呢個咁精美既水晶座，搬左去櫃裡邊，只可遠觀。咁就可保安全了。

初頭以為頒獎禮好快，去到有得影。點不知，我地排隊排成一個鐘頭有多，真係餓到頭昏腦漲。

全家幅又再次出動，隔離PROJECTOR會登埋 Isaac 既畫作。既可以有証書留念，又可以係張相到影埋參賽作品，呢個機構構思幾好。

慒豬豬既媽媽忘記左無比錢參加畫展，我地去到會場，見有好多得奬作品登哂出黎，媽媽係咁叫 Isaac 揾自己張畫出黎。Isaac不停咁話揾唔到，媽媽就以為佢依賴又懶既性格出左黎，就話鬼佢，後黎問左工作人員，原來係要比錢至可以放張參賽作品出黎比人欣賞。咁都有。哈。不過算，無理由比錢出黎登堂，都係拎張証書同奬座返去留念好過。

中秋開放日－－青山天主教小學

19 Sep 14 呢日周五，話說咁岩之前個晚諗住睇下邊間小學會有開放日，咁岩見到屋企樓下間天主教搞中秋開放日比各大幼稚園小學幼兒黎玩。反正係樓下，一於帶兩個小朋友去玩下。

話說呢間天主教小學，年年中秋都有開放日比街坊黎玩，好親民既姐。不過我地都係第一年黎參加。入到學校至拎飛。仲有紙燈籠同埋營光棒送，小朋友最岩。

雖然拎左門卷嚇見遊戲室得六個左右。心諗，乜咁少架，一個鐘都玩完啦，話叫吹氣彈床其實唔係彈床，只係吹氣膠"密室"兩個，吖，你唔好話，D細路入到去，雖然無得跳，但都玩到癲哂咁。小朋友真係易滿足。

我地大大話話，都玩左成兩個鐘，至可以玩哂六個遊戲，真係唔好睇少佢得幾個咁大把。原來都幾嘥時間下。

玩完遊戲，兩兄妹不忘要換棉花糖食。呢D棉花糖，係免費送比幼稚園生既，不過比門票個位阿太，以為Isaac 係小學生，所以唔比棉花糖卷佢。媽媽當然即刻澄清，呢個只不過係幼稚園生黎架咋～～～咁就有支棉花糖食，嘻嘻。認真係又食又拎。

其實媽媽發現到呢度有免費玩樂時，都即時通知 Isaac 同學仔，不過最後得芊攸同學黎玩。芊攸同學都好文靜，好照顧 Claire 架。

睇下，芊攸幾咁照顧小妹妹，左一個右拖一個。反而 Claire 真正哥哥唔知去左邊～～～

八點鐘，好多攤位都收工，我地都準備離開時，見到原來操場有主任派車仔燈籠比小朋友，不過好低調咁比囉。不過既然黎到玩，媽媽都叫 Isaac 自己去問，吖，Isaac 又肯去問人拎喎，仲拎左個比妹妹TIM。大膽左啦。希望日後小學面試都咁大膽就好了。

OVERALL呢度係幾好玩，臨走，校長仲企係校門歡送街坊，嘩，成八點幾架啦，校長呢個作風，媽媽好欣賞。如果來年都有呢個活動，而 Isaac 又做哂小學功課，媽媽都會繼續帶佢地黎玩的。

正式上畫班

17 Sep 14 Claire 正式跟星星老師學畫畫。Claire 細個睇得哥哥作品多，成日都好衷心盛讚哥哥作品好靚，好比心機做。一臉羨慕之情浮現哂係臉上。等到頸長，卒之到佢自己上堂了。Claire 不知幾咁期待。

星星老師對K1小朋友特別照顧，堂上影左好多相SEND返比我地。

睇下，幾咁專心畫。媽媽收到呢D相後，不知幾咁窩心。

原來，一棵橙樹係咁畫出黎既。

第一堂完左，Claire 仲好開心自己揹住老師送既畫袋離開，唔肯比媽媽代勞。咁大既袋，媽媽幾驚會阻到Claire 視線趴低呀～～

Claire: 媽咪，你放心啦～～～我會小心架啦。

人仔細細，揹住個大袋，十分老積。

去星星老師學畫，除左期待唔知每堂畫乜外，Claire 最期待就係去個度既商場玩下呢D電動車。

雖然星星老師呢度比較隔涉，但每次見到Claire 既作品都好用心好特別，媽媽就覺得值得此行。希望妹妹繼續努力。

參觀保良局馮李佩瑤小學

14 Sep 14 每年九月，都係準小一生好忙既日子，因為父母要四出頻撲去睇小學。呢日我地都唔例外，特登搭車去到山卡那睇保良局馮李佩瑤小學參觀，呢間學校係千禧校舍，好大好靚。我地睇完都心郁郁試下搏一搏。

最特別係呢間學校有觀星會，可惜無家長一齊入去睇星。不過小朋友就可以上天台玩水火箭。

(按此觀看Isaac 試射水火箭片段）

（按此觀看Claire 試射水火箭片段）

玩下玩下，其實我地玩左好多間課室攤位，爸爸比較過兩間保記，覺得呢間老師專業D，無圍埋吹水，認真處理開放日，令人有好感。

玩左好耐，我地好肚餓了，臨走，Isaac 不停提我地要去整旦糕裝飾。好新奇呀，呢D材料可以用黎做勞作唧出黎。媽媽真係大鄉里。

一臉認真既Isaac ，希望佢真係可以入到呢間小學啦。

同場加插兩兄妹既温馨成長照。攝於 15 Sep 14, 同年半前既樣差好遠，不過都一樣咁相親相愛。希望佢地大個都係咁就好了。

志豪小學開放日

13 Sep 14 呢日我地齊齊去左保良局既志豪小學參觀開放日。原來志豪有塊好細既橫向攀石牆，不過細膽既Isaac 爬呢塊咁細既牆都驚囉。真係無佢符。

之後媽媽去聽講座，爸爸就負責帶住兩兄妹去課室玩攤位遊戲。仲拎左好多顏色筆返屋企TIM。之但係，爸媽觀察呢間學校既學生都算好動，老師們負責既攤位又顧住自己吹水，所以爸爸對呢間學校都唔係太大好感。

反而我地對天台既射箭就好有興趣，個日天氣都好熱，但個老師好有耐性，媽媽都好服佢。一談之下，原來呢個射箭老師係外判呢日開放日比家長玩。爸媽都呆左一呆，乜唔係學校有射箭既咩，點解要揾人黎坐一日開放日呢？不過呢個老師真係好有耐性，令我地好有好感。只可惜佢唔係負責呢間學校射箭活動既課程導師黎。

Isaac 好認真咁射，導師亦都好認真好有耐性咁教。仲問Isaac 係咪二年級學生，真係笑死媽媽。

Isaac 射箭片段按此

Claire 見哥哥射，Claire 又要射埋一份。不過身型咁細，當然會蝦碌百出啦。

Claire 射箭片段按此

第一次射，成支箭射左落地，笑死。不過導師好有耐性再比多支箭阿妹試。

見Claire 咁細粒，索性捉住佢隻手一齊射。包無錯。

咁又玩左一個下午，大家都拖住好攰既身軀返屋企。而呢間志豪小學，其實校長都幾風趣，不過學生紀律就～～～所以我地會放佢為叩門考慮之列。

韓國自由行最後一天早餐

11 Sep 14 韓國最後一日，話就話一點鐘機，扣埋預早CHECK IN，即係我地又係食完早餐即走。最後一餐早餐，我地無再去ANGEL 個間，雖然好味但爸爸話貴又無乜選擇。所以我地索性係SEOUL STATION裡邊揾野食。路過一間CAFE超多人，不過裝修到好貴咁款。但個邊又無乜早餐選擇，唯有都係入去。呢度既包賣相好吸引呀，好容易夾到自己食唔哂。

眼見櫃內滿佈旦糕，賣相好靚囉。可惜晨早流流，我地又上機，點買黎食呢？唯有下次有機會再試。

爸爸既咖啡。

呢餐又係食左百幾二百蚊早餐，真係嚇死人，食個早餐都成舊水落樓。食到爸爸喊怕怕。下次黎韓國一定要揾定平靚正既早餐食店喎。

好，韓國再見。有機會再黎到訪呀～～～

首爾自由行 （愛寶樂園。平靚正的飯卷天國）

 10 Sep 14 呢日我地PLAN左去愛寶。話說之前本黎諗住坐地鐵再轉巴士，但臨出發知國內長假，實好多人。與其等唔知幾多架巴士至有位坐，不如比多少少坐SHUTTLE BUS。架SHUTTLE BUS 有個好處就係包有位坐，而且好快到愛寶； 弊處就係SET 死左來回時間，想玩耐D都唔得。

ANYWAY，好在我地又真係住正首爾站，所以，臨出發前一日打去BOOK左SHUTTLE後，我地坐地鐵只係坐兩個站，就到巿政府站。說穿左，原來係明洞隔離，唓～～～～一出站，嘩，咁特別既巿政府廳。


架車好準時就開，一個鐘就到愛寶專用SHUTTLE BUS STOP。鬼咁多人排隊再坐愛寶FREE SHUTTLE。講返轉頭，張入場券其實係早一日預訂既SHUTTLE BUS上有售，成人票價同小童一樣。不過媽媽臨出發係韓巢網，見到中秋特價票，仲平過SHUTTLE BUS司機既OFFER，所以無同司機買，直接去到愛寶自己買平飛。

落左SHUTTLE，以為到啦，吖，點知離遠望到又一堆人龍，嘩，韓國長假真係不容忽視呀下。

係特別窗口買左中秋特價票後，我地就入愛寶了。係正門，有個好SHARP既南瓜萬聖節佈置迎接我地。

入到愛寶，其實個人會變得好開心，因為所有佈置都好SHARP好COLORFUL。

其實愛寶真係好大，我地去左大半日，好似只係行左好少。主要都係睇馬戲團同4D，同埋玩左騎驢仔，THOMAS小火車。之後就係好急速咁掃動物～～～夠鐘走了。如果有機會再黎，真係要花兩日至可以玩完。

最估唔到，係愛寶居然有THOMAS。

 呢度望出去既兒童王國都幾搶眼架。

之前睇旅遊書話名古屋有THOMAS小火車坐，真係無諗到韓國都有。真係叫人喜出望外。

真人扮既肥總管，一見小火車開動，就揮手再見。

原來愛寶都有花車巡遊架，可惜係我地玩完THOMAS小火車行返出去至見到～～～尾聲。嗚嗚嗚～～～

其實我地玩完小火車同騎驢仔餵倉鼠後，爸爸就帶住我地去睇雀。

呢幕深情一吻真係唔係咁易見到。

我地都花左成個鐘企係呢堆雀前，無他，因為爸爸想餵雀，但D雀又唔肯飛埋黎，所以都等左好耐下。好在都錄到幾條片，可以回味下姐。

今次我地黎愛寶，好似主要睇動物多。

排成個鐘去坐JUNGLE SHUTTLE BUS，最開心，係睇住班黑熊企哂係度行路追問野食。好餵食好搞笑。

如果唔係黑熊，其實坐呢架JUNGLE BUS都幾悶下。留返時間係其它園區玩好過。

時間關係，我地坐完JUNGLE，都無乜時間剩，唯有走馬看花咁快速睇動物。

呢隻大猩猩都鄛搞笑架，玩到連架車都反埋。笑死人。 

好多貓頭鷹瞓緊覺呀～～～

貓頭鷹：喂，你地做乜偷影我地瞓呀？

 臨走，居然比我地係都唔凍又無開冷氣既戶外，見到隻超級瘦既北極熊。見到都心痛，愛護動物協會如果見到，會唔會告佢地虐畜呢可？

之後，SHUTTLE BUS又送我地返巿政廳站，其實即係明洞。因利乘便，我地索性去明洞既飯卷天國食晚飯。真係好味道，又平。可惜係我地呢幾日行程，又唔覺佢梗有一間係左近咁。

唔知點解韓國既餃子額係咁大粒，真係食幾粒就飽。不過真係好抵食同味道真係好囉。

玩足一日愛寶，雖然有SHUTTLE接送明洞，但我地都好攰，呢日暫停掃樂天了。快D返酒店瞓，翌日早起搭飛機走了。

之後問小朋友，最鐘意去邊，兩個都答去愛寶。証明呢次選擇無錯。