8 Sep 14 呢日一早預定去南怡島，不過爸爸好忙，成日都無時間商議行程，到臨出發早兩日，大家至認同呢日去南怡～～～卒之都唔駛諗幾點出發，因為原來火車票最早個班都只係十點半出車。計返即係去到都LUNCH TIME。
我地住首爾站，因利成便，索性用自由度最大，又最方便既坐車方法，就係由首爾站搭一個站咁大把，去到龍山站過對面坐火車。好過好多BLOGGER寫既清涼里地鐵站，清涼里站真係幾遠下，坐車都坐到攰呀。
出發前，係首爾站食個早餐～～～原來呢間ANGEL IN US係連鎖店黎。第一次大鄉里出并，原來呢個10號牌仔係會著燈架，唔駛聽侍應叫NUMBER，野食READY，個牌又震又響。韓國野真係先進。
呢朝早餐勁貴，呢度都成舊水。不過真係好食既。但食過一次後，爸爸嗌怕怕，因為香港都唔會食一百蚊早餐。韓國食既支出，比得上日本。
我地係龍山站過對面坐火車，話咁快就到加平站。遇著韓國長假，鬼咁長人龍排巴士排的士。幾經辛苦至排到架的士。一落的士，離遠望到呢個南怡渡輪碼頭啦。架船幾咁特別。
可能假期關係，所以都唔駛點等，睇住架船走，我地又好快上到第二架船。沿途風景好似好靚好舒服咁。
可能假期關係，南怡島有人表演唱歌。
九月初既南怡島，估唔到咁快就有紅葉。
小朋友對紅葉興趣不大，反而鍾意係大草地四處跑。呢個草地係幾大，香港南生圍都無佢咁廣濶。
南怡島係韓國受保護既大自然公園黎。所以都見到唔少昆蟲。
爸爸最鍾意睇既松鼠，南怡島有好多，周圍走既TIM。以後唔駛淨係去台北飛牛睇LU。
夏天去南怡島，玩唔到雪，睇住兩個雪人公仔止下渴。
其實南怡島真係好接近大自然。好似呢個小朋友遊樂場咁，好簡單架咋，無花巧野。不過小朋友一樣玩得咁開心。
仲有呢條簡單到不得了既單車。不過好危險囉。尤其係手拎住大背包時，好怕捉唔實跌落街；轉彎時又怕架車會跌喎，始終好似圍欄不夠咁。
玩咁咁上下，因為我地買左三點幾火車票走，即係倒數返，我地要兩點幾離開。就係島上揾野食。原來島上都唔少餐廳架。媽媽就揾左間望落都幾大又坐得舒服既韓國餐廳坐。其實南怡島好多呢D裝飾。仔仔第一次離遠望話係假既；媽媽就話真既～～～點知入到呢間餐廳又見呢種擺設。原來真係假野黎。假既做乜整咁大個南瓜，仲要擺幾個呀～～～
暫時黎韓國，最欣賞呢間南怡島餐廳既食物，真係好味過全州中央個間好多倍。可惜忘記左呢間叫乜名～～～不過按大既程度，去到南怡應該好易揾。
呢味金菇牛肉好味道，配埋上邊側邊碟菜包住食，一流呀～～～～旁邊無記錯好似係人蔘雞湯。不過無乜人蔘味。
我地怕唔夠，叫左碟餃子，鬼咁大隻，一碟六隻。真係食餃子都飽死。其實仲有一碗冷面，真係好食到忘形，完全忘記影相。
咁好味既南怡島韓國餐，埋單好似都係四百蚊。同全州中央個間差不多，但好味指數係南怡呢間優勝好多。
之前買三點幾火車票返巿區係有原因既，就係爭取時間買野。可惜遇著國內中秋喎。睇下，有幾可梨大條街係咁靜吖？？？ 好多店都關門休巿。
連續兩日出去加上第一日半夜起身，一家人都好攰。爸爸話呢晚係首爾站揾食算。望個環境好似無乜邊間好食。媽媽最後堅持去FOODCOURT 算。諗住可以看圖點食。呢個傳統拌飯～～最後原來碗菜底有辣肉。小朋友只可以食白飯。
呢個飯卷居然無人鍾意食。
諗住叫個傳統拉面比爸爸，咁紅，就知又賴野。
沒有留言:
張貼留言