首次玩過山車

26 Jul 15 自從Isaac 夠高玩呢架過山車後，每次去海洋公園，爸爸都會撩Isaac 玩。不過次次都係玩唔成。難得呢日同朋友樂樂一齊去，朋友孖住，兩個都發威，乜都唔驚（聽樂媽講，樂樂係超怕高超怕快的，但居然又第一次一齊玩），兩個小朋友嘻嘻哈哈上車去。不過架車好快，媽媽只係錄到車身而已。唔知見唔見Isaac 呢？（按此去片）

好在呢張相，都見到Isaac 伸左個頭出黎⋯⋯咪就係第二卡車囉。

還有爸爸既大手。哈哈。

咁都比媽媽影到⋯⋯第二卡車紅衣的Isaac 。果然係唔驚喎。

今次去海洋公園，除左第一次玩過山車外，仲有係玩水區，玩左條超高水滑梯⋯⋯可惜媽媽掛住睇妹妹，趕唔切錄低見証一刻。

Isaac: 唔緊要啦，影我玩呢D水都一樣姐。

 有人玩水玩到一副打拳模樣。

Isaac: 唏～～～出力⋯⋯

 Isaac 見阿妹騎住爸爸衝水柱，Isaac 又話要衝埋一份。果然，爸爸係公平既。睇Isaac 幾咁HIGH。

Isaac: 嘩，好好玩呀⋯⋯
爸爸： 嘩，你好重呀⋯⋯

Isaac: 嘻嘻⋯⋯我要射水⋯⋯媽咪，你企係度比我射呀⋯⋯

淋大桶水＠海洋公園

26 Jul 15 因為媽媽哥哥張ANNUAL PASS就到期，爸爸就話盡量呢個月再去海洋公園玩水。我地擺明一副玩水LOOK啦。

不過玩水前，都要陪哥哥上山去玩過山車。媽媽就同Claire 呢埋係隔離店嘆住冷氣等⋯⋯

玩完過山車，出發去玩水LU⋯⋯路經鯊魚咀⋯⋯邊個最似鯊魚擘大口食人呢？

一睇呢個爸爸，就知佢幾冧個女啦。

睇下，氹得個女四萬咁口。爸爸氹人真係叻。

不過一啖砂糖，一啖屎。氹完阿女跟手氹埋Claire 去淋水。陰公囉，睇下，嚇到Claire 呢⋯⋯

按此睇下淋水有幾刺激。 近鏡再望下，好驚呀⋯⋯ （按此去片）

玩完水，又去玩泡。今次玩泡，吸收了之前經驗，無咁食泡了。

Claire: 不過我塊面好多泡呀⋯⋯

去完呢次，真係要同海洋公園SAY GOODBYE 了。因為隨著哥哥入小學，我地好多未知之數，所以索性唔續PASS住。

暑假周六的一天

25 Jul 15 周六，爸爸返工。媽媽一個帶住兩兄妹有乜做？呢日無去圖書館，索性食完早餐，直接闖往公園玩樂去。去公園，有個好處，就係可以培養小朋友互動精神。呢堆明明互不相識，不過，玩起上黎，自動變成小社會，大家圍埋講下玩乜⋯⋯幾好，唔一定要約識既人，原來，唔識既，一樣可以讓小朋友有能力SOCIAL。

呢日其實天陰陰，不過唔知點解，兩兄妹都濕透。

我地係公園玩左好耐⋯⋯小朋友都走清哂。我地至返屋企換衫食LUNCH。好感恩，一返到屋，忽然下起大雨黎。好在我地剛回家咋，否則實濕哂攝親病到。

返屋企換左套乾淨衫，就出去食LUNCH。商場暑假咁岩整左個多啦A夢佈置。Isaac 又走埋去扮飛？

至於女仔化既Claire ，則一臉正經同多啦A夢影相。

夜晚，由媽媽煮飯。難得爸爸係屋企一齊晚飯，媽媽就開左隻龍蝦，由爸爸負責拆殼，睇個衰妹拎住最多肉既龍蝦鉗幾咁得戚。

Claire: 好味呀。我最鐘意食好味既野⋯⋯
媽：暈～～

偷拍兩兄妹認站落車

23 Jul 15 呢日無節目，見好耐無去過冒險樂園，一於捉兩隻馬騮去冒險樂園放電。去冒險樂園玩咁大件事，梗係要比D責任兩兄妹啦，尤其係認路麻麻既哥哥。媽媽一上車，就話要佢地負責帶路，睇邊個站落車。嘩⋯⋯其實哥哥K2暑假，媽媽已經滲D滲D咁要佢睇站負責帶路⋯⋯當然次次都係有個玩字吸引佢，比佢動力負責帶路。不過，到呢日，去冒險樂園，邊個站落車，對哥哥黎講，依然係無乜信心喎。

媽媽偷拍左條片，見到兩兄妹好徬徨，個樣真係幾搞笑。希望下次去冒險樂園，哥哥有信心，識得落車啦。 （按此去片）

貪靚妹

20 Jul 15 有人越黎越女仔。成日都要著裙唔肯著褲出街。呢日，暑期班跳彈床，媽媽話要換過條褲至可以出街喎⋯⋯卒之？

Claire: 我而家咪著左褲囉⋯⋯我打死都唔會除裙架⋯⋯

21 Jul15 呢日係屋企HEA爆，忽然聽到係房傳出陣陣疑似歌聲⋯聽下，嘩，做乜有個女係度自創歌詞唱歌架。聽落歌詞又幾搞笑喎 （按此去片）

 22 Jul 15 一如以往，暑假都係HEA下，媽媽一向唔想小朋友暑假都去補學術野。純粹玩下睇下書。呢日唔駛跳彈床，無所事事，唯有玩下泥膠煮飯仔。

同一時間，地下又有另一檔，係哥哥砌LEGO。對於呢兩樣玩意，媽媽一向唔嫌玩太多，因為呢兩樣都係有益玩意黎，尤其係對手指肌弱既Claire 黎講，佢真係要多D玩泥膠同LEGO去強化手指肌，等佢寫字有力D。

水戰＠海洋公園

19 Jul 15 放暑假，梗係去玩。呢日約左朋友仔樂樂一齊去海洋公園玩水戰。記得K2同樂樂一齊游水時，Isaac 比樂樂取笑佢矮⋯⋯估唔到一年後，Isaac 已經高過樂樂了。

去海洋公園，Isaac 最愛既其中一個地方，就係水母館。唔係因為佢鐘意睇水母呀，而係可以玩拍水母遊戲⋯⋯點知，呢日居然無得拍喎。原來，個遊戲改左變左影相，自變水母。睇下呢隻粉色Isaac 水母⋯⋯

兩兄妹齊齊變身毒水母。生人勿近。

Isaac: 嘻嘻，身後個隻水母係我黎架。

睇完水母又食完飯，我地落山去玩水去。一落纜車，就見到人力車。阿妹話載哥哥快D去玩水喎。

Claire: 我唏（用力抬起出發）⋯⋯
Isaac: 吖⋯⋯救命呀⋯⋯好驚呀⋯⋯

樂樂： 咁我拉你，你驚唔驚呀？

今次黎OP，目的在於玩水。睇見呢三位小朋友，就覺得開心。

Isaac：哇⋯⋯好好玩呀⋯⋯

Isaac: 哇⋯⋯跑呀⋯⋯

忽然間，三位小朋友鬥按住出水位。最瞓身係邊位？

玩完大人場，又走去兒童王國玩水槍。

Isaac: 哈哈哈，我揾到目標射了⋯⋯

Isaac: 嘻嘻，阿妹係個度⋯⋯

兒童王國有肥皂區。Isaac 都玩得好開心呀。

呢排，自從同爸爸玩過跳樓機後，每次到兒童王國，Isaac 都會去玩。呢次同樂樂一齊，更加一臉得戚樣。

Isaac: 喂⋯⋯爸爸，睇下我⋯⋯

玩水＠海洋公園

19 Jul 15 呢日係蚊姨姨生日大日子，梗係又係免費去海洋公園啦。而家四個細路大哂，齊齊出去玩，未出發，先興奮。

Claire: 行快D啦，我想快D去玩水呀⋯⋯

Claire: 哎，不如我做苦力，拉哥哥行快D⋯⋯
Isaac: 吖⋯⋯好驚呀⋯⋯你唔夠力架，我會跌架。

搞完哥哥，一向大小姐咁款既阿妹，係小弟弟面前，卻一副大姐姐模樣。唔通當Claire 做家姐角色時，會好似Isaac咁，咁保護細佬妹？

Claire: 喂，拖實我呀⋯⋯一陣比人捉你走架。

定係捉小弟弟去同佢玩呢，哈哈，媽媽都忘記了。

Claire: 嘻嘻⋯⋯終於有人比我恰LU。我今次實贏佢姐⋯⋯

今次海洋之旅，其實主要黎玩水。不過見樂樂哥哥好耐無黎海洋公園，我地就陪佢黎下，咁岩遇著地球保衛隊，梗係第一時間推三個細路出去玩 （按此去片一）。搖完一輪膠樽，又行下圈（按此去片二）。

玩完去水母館玩下，原來水母館出左新野。就係可以自拍變做水母架。哈哈，忽然有隻Claire 水母係咁漂浮。

傻傻的兩兄妹。

全日海洋之旅重點到了⋯⋯

Claire: 媽咪⋯⋯我跳緊舞呀⋯⋯

四萬咁口的無拘無朿笑容⋯⋯真係天真漫瀾。

呢套衫細了，顯得Claire 好似有肉咁。

鍾意玩水，卻唔想游水濕頭，真矛盾。

玩完大人場，又走去兒童樂園玩水槍。Claire 依然一副好狠既戰鬥格樣。

Claire: 嘻嘻，我靜靜雞射佢先⋯⋯

玩完水槍，又走去玩泡泡⋯⋯應該係食泡至岩。

高度問題，搞到Claire 只要一仆低少少身執泡泡，就會變左咁。激死媽咪。淨係洗嘴都洗左幾次。

但依然無礙Claire 投入去玩⋯⋯

入得兒童王國，梗係要玩埋跳樓機啦。已經玩過好幾次既Claire，無懼高度。依然四萬咁口。

越高越開心。對Claire 黎講，佢真係唔知乜野叫驚。相信佢一夠高，就會跟爸爸走去玩高山車。