好玩 DiscoveryLand Playroom

7 Nov 15 呢日我地一家四口分頭行事。爸爸帶妹妹去海洋公園，因為爸爸張ANNUAL PASS LAST DAY，但佢帶妹妹入場就可以免費。見係咁，媽媽就帶Isaac 去新場玩。呢個場既入口真係唔顯眼，好在之前做足功課，好容易揾到姐。

Isaac: 好興奮呀⋯⋯快D入去啦⋯⋯

一入場，原來裡面唔係好大架咋⋯⋯不過叫做大人細路都岩玩，尤其係呢條超長滑梯。大人一定岩玩。

所以，媽媽都同Isaac 一齊癲。（點此）嘩，真係好快落到地呀⋯⋯不過要爬到咁高先可以SIR返落黎，爬多兩次都腳仔攰哂呀⋯⋯

Isaac 發現左個新玩法⋯⋯下面望上去，好似開左個機關咁。問佢做乜係咁開合對腳，Isaac 解釋咁樣會SIR得快D喎。（點我觀看）

我地十點幾去到，個場無乜人。媽媽一見到呢個空中漫步既挑戰遊戲，二話不說放低Isaac 係樓下，自己踩左上去。

玩過先知，乜野叫做驚到腳仔軟。哈哈哈。不過上左去，無理由行一半就走，咁無堅持架嘛。所以，媽媽最後堅持行哂全部關卡，安全著地無跌過。真係滿足呀。

玩完又陪Isaac 玩。呢度人少少，可以包哂成張彈床。

仲有個迷你籃球架。不過呢個籃球架多人等⋯⋯因為得一個波，哈哈。即係每次只可以一個人，因為無理由同唔識既小朋友一起爭波去架嘛。

呢架車原來係軟墊膠黎。撞到都唔怕痛。明明架車都幾大下，不過Isaac 坐左上去，就顯得好細架。

呢個場仲可以任玩呢個，正呀。出面玩一鋪最平都七元得幾分鐘。呢到無人等既話，比你玩足一日又點話。

哈哈，媽媽又忍唔住想去玩一下了。十幾廿年無玩過呢個遊戲。

一諗起個LOAD DOWN，真係心都離，所以，媽媽都唔咁爬到最頂。

玩到下午，我地出左對面間WELLCOME買輕糧做LUNCH。途中見到呢張轉椅。我地又轉下玩下先。

其實呢日既LUNCH好簡單，不過望住個海食。但係Isaac 好開心，佢話好似野餐喎。

Isaac: 我地幾時再黎食野餐呀？

食飽飽，又去行下海邊。呢度個環境真係幾舒服架喎。

升左小學後，好難得再現既無憂笑容。

Isaac: 呢個心心馇靚呀⋯⋯中間勾左好多鎖匙扣。咁似韓國N首爾塔咁既！

食飽飽，又去做運動，有人變左泰拳仔？

Isaac 仲起埋腳TIM。不過呢個沙包又真係幾重下。媽媽打都好難打得郁佢。

下午開始多人，因為遇著兩間房開生日會，所以小朋友嘉賓多到滿場。好在我地玩左好多野，玩到無野好玩⋯⋯Isaac 就發現左呢樣野了（點此）

真係唔講唔知，原來呢個係千秋黎。難得Isaac 牛高馬大，仲可以瞓哂身咁玩，勁呀。

其實會唔會CLICK住自己呢，咁多麻繩撓埋一齊黎做千秋。

呢日我地玩到成四點先走。好攰呀⋯⋯不過Isaac 真係玩得好開心。仲係咁話下次要帶埋妹妹黎一齊玩。好啦，下次舉家一齊黎啦⋯⋯不過唔知幾時，哈哈哈。

幼稚園同學小聚

6 Oct 15 呢日放學，我地撩左幾個幼稚園同學仔GATHER一下。點知我地太準時，其它同學仔各自遲大到，等到Isaac 失哂耐性。好唔容易等齊人，其實我地又差唔多時間要走⋯⋯去學拉丁舞。

Isaac: 係囉，佢地咁遲⋯⋯

Isaac: 不過可以見到咁多同學仔，我都好開心。

難得最後Isaac 都笑返。不枉媽媽硬著頭皮撩大家出黎見面。

Isaac: 喂，你地睇下我⋯⋯

食完又走去玩一陣⋯⋯真係一陣咁多。

難得可以玩到咁開心，可惜我地要走了。只能玩好短時間。希望下次可以玩耐D啦。

做班代表出黎示範

6 Nov 15 呢日家長講座，媽媽都唔記得TOPIC係乜。淨係記得主任講緊點樣愉快學習。然後揾左兩班各一位代表出黎做示範。估唔到Claire 會係佢個班既代表。

Claire: 媽咪，我有點驚呀⋯⋯咁多姨姨望住我⋯⋯

兩位同學出到黎，由主任示範叫佢地揾下報紙既字配圖畫。

Claire 望落好似好開心。媽媽係下邊不知幾咁緊張，認字呢家野，一向係Claire 弱項，今次仲唔當眾出醜？吖，估唔到係主任帶領下，Claire 可以做到主任揾字既要求喎。同行出黎既女孩子，都係故事組的。不過表現就好自然，好多野講，同Claire 好大對比。

兩個小朋友好專心咁揾字之後剪出黎。

專心起黎，Claire 都費事再望媽咪。似乎佢越做越起勁，忘記了怯場了。當然，今日既Claire經歷過故事比賽， 都好少有呢種怯場情況出現了。

放學放電小記

5 Nov 15 雖然係十一月，不過天氣仲係好好好熱呀。學校又要換冬季，咁點好？就係向厚厚既運動服下面打一件短T。咁放學就可以即除校服就去玩公園。大家都無約⋯⋯估唔到大家都出呢招。証明天氣真係熱爆呀。

慘被變三文治的Claire，係放學玩公園既少數女同學中的其中一位。

呢日，Claire 發明左個新玩意，就係把呢條棍變左秋千咁。

仲教埋同學仔一齊玩。

咁少既一支棍，都可以比佢地咁玩。小朋友既玩意發明真係唔可以睇少呀。

同日，收到畫班老師傳黎既作品照⋯⋯最搶眼應該係Claire 咀上的損痕⋯⋯係早兩日踩單車整親架。痛就痛左少少，不過踩單車，係要跌過先會進步架嘛。希望Claire 唔好被少少痛楚嚇怕。

呃爸爸爬左上樹

2 Nov 15 呢日正式換季，影下呢個疑似中學生LOOK但卻只係小一生副冬季校服LOOK先。 

真係橫睇豎睇都唔係好似小一生喔。

下午考完試早放，可以陪阿妹畫畫順道玩下。

 有個人不停咁起跑⋯⋯為左可以一跳，跳上呢舊木。

Isaac：媽咪，我跳到上黎啦⋯⋯快D幫我錄VIDEO比爸爸睇吖。

 卒之，有人叫媽咪錄個VIDEO比爸爸囉⋯⋯原來係呃爸爸話自己坐左係棵樹到（點此）⋯⋯真係當爸爸係三歲細路仔嗎？

單車樂

1 Nov 15 呢日我地又興致勃勃咁去單車公園學踩單車。好開心呀，Claire 呢日可以好純熟咁開車了。按此看。

Claire 學得成兩輪單車，全靠爸爸好艱辛咁追住架車黎跑⋯⋯咦，唔係喎，原來仲有Claire 既親愛的哥哥都係後面跟住追架喎。呢個小妹妹，認真多人追呀。

爸爸： 嘩，阿妹，你可唔可以踩慢D呀⋯⋯我對腳好痛呀⋯⋯

 後黎，爸爸索性騎埋哥哥架單車去追Claire⋯⋯而哥哥呢？就好勞力咁繼續追呀追⋯⋯

追到無力，哥哥就過左隔離公園玩。由細到大，馬騮架對Isaac 黎講，係一個好大既挑戰。牛高馬大，呢次真係最難得⋯⋯可以攀哂咁滯⋯⋯係咁滯（點此）⋯⋯額係唔明點解Isaac 應該夠力，但都唔敢過哂成棚馬騮架既。