媽媽暈倒了 . 心跳大力醫生初步分析

昨早上班, 媽媽在巴士上暈倒在地了. 是人生第一次真係暈倒左.

事緣平時坐的班次忽然遲了.....即是兩班合拼一班這種情況, 機會只有一成. 未上車已經見到有人企位....即係無得坐既機會好大啦. 媽媽當時心諗, 反正晚晚九點幾瞓, 搞到日日返工放工瞓唔到, 企一企應該都OK既..........所以上左車. 都放棄左上層唯一一個座位 (媽媽排第一, 望到上層有一個位但無上....排第三的阿叔一支箭標左上去坐了)

媽媽已經站到車廂中間, 即是避免車頭沙甸魚的擠擁. 車廂中間好少人企架咋, 方圓半尺範圍都無人.

怎料, 屯門公路都未去到一半, 媽媽已經覺得好辛苦呀......忽然好辛苦, 有種說不出的感覺. 再捱左一陣, 又好似想嘔咁...心諗, 唔係呀嘛, 三個月至黎嘔, 前功盡廢, 盡當時九牛二虎死撐辛苦之力, 係手袋摷左個葯袋出黎準備企係度嘔(好怕無膠袋會嘔落坐係度的乘客頭上囉). 左手捉住個袋應該都無兩分鐘, 忽然眼前一黑, 真係乜都睇唔到. 好辛苦好辛苦.

呢一刻唯有合埋眼, 諗住乜都睇唔到, 眼前一黑既感覺應該無咁辛苦掛, 搏哂命深呼吸希望可以好返啦.......呢刻有幾秒好想伸直隻手摸右手邊企位的男士, 幫手叫車尾個位唔瞓覺的小姐讓座.....但實在好辛苦呀, 連出聲既力都無. 唯有繼續合埋眼深呼吸

唔知隔左幾耐, 開始有意識FEEL到自己做乜好似有位座既呢..........擘大眼但其實都係乜都睇唔到, 隱約見到前面有張空凳同有兩隻手伸出黎....唉, 媽媽知乜事啦, 好明顯坐左落地囉.

個腦係咁諗, 死囉, 我著短裙架, 咪走哂光 但無計, 媽媽實在無力爬上張空凳到.....係擘大眼但仲係好黑既視線(好明顯仲未血上腦), 求其伸出自己對手示意我無力坐上去, 等援助.

坐左上凳, 媽媽開始睇得清了, 冷汗係個額頭同心口係咁標, 拿拿聲拎條手巾仔出黎抹汗. 抹的時候, 發現雙手好麻痺, 連咀唇都麻痺.....呢種感覺, 係當年做LASIK太驚醫生話缺氧的現象.

心諗, 唔通缺氧暈低左.......返到公司打去BOOK私家醫生, 問醫生一個問題, 醫生聽了失笑. 問題是, 我缺氧咁BB會唔會變弱智架. 當然答案係比醫生笑住咁寸返轉頭啦.

醫生說大肚婆暈低好正常喎, 因為血壓低. 但無跡象可尋的. 解決方法就係以後見暈唔好怕異相, 地下都照坐喎. 最好係瞓係地TIM. 醫生仲話, 附近有人就叫人幫手抬起對腳高過自己個頭等血回流上腦. 媽媽心諗, 叫得人抬腳就唔暈啦, 暈到咁仲邊有咁多氣叫人幫手做咁多野.

昨天去完私家, 今日又輪到係屯門醫院磨大半天. 早上產檢, 等左一個鐘睇你五分鐘, SO GOOD廢過母嬰院檢查. 心諗, 好在摛日暈倒有去私家睇, 政府個產檢直頭唔想理咁. 總之用個聽筒聽到BB心跳就BYE BYE. 

睇完個廢產檢, 一個人係屯門醫院呆等....因為下午又有期, 睇內科.....即係心臟科. 內科正常好多. 等既時間同見醫生時間係合理的. 先做一個一分鐘都無既心電圖, 由瞓低到貼到手腳心口都係個D接觸器既時間係耐過心電圖部機CHECK既時間. 做心電圖個短短一分鐘, 好大力既心跳無復發, 所以報告如我所料, 醫生話正常.

不過問左家族史後, 醫生再人手聽心跳, 同埋越問越詳細. 索性安排媽媽明早再去醫院抽血化驗. 因為可能係甲狀線影響心跳喎. 媽媽聽到後, 個腦係有少少空白的. 如果真的有甲狀線, 咁個BB會點呢.

撇除甲狀線因素外, 最重要因素, 就係媽媽一直都無做到的, 似乎三個醫生都一致建議: 不正常心跳復發, 要去急症室即做心電圖. 只有復發呢一刻至睇到問題係邊. 當然, 如果驗血報告睇到係甲狀線影響, 咁就可以唔駛去急症室了.

另一個因素, 如果驗血報告正常, 復發時又咁岩有做心電圖REFLECT到正常心跳的話, 即是呢胎忽然每天都來探訪的大大力心跳, 係懷孕所致. 跟病理無關.

似乎還需等多一個月至知結果

細B生長狀況

6wk 2d     0.57cm

10wk2d     3.40cm

11wk2d     4.50cm

 

11wk6d     5.24cm