為食去大澳

26 Sep 10 呢日係 X 年一度既旅行......其實係媽媽好耐無去過遠既地方, 咁岩姨姨話屯門去大澳好快. 一於擇左呢日一齊去大澳.

可惜呢日為食(目的)的大澳之行, 比唔到我食炭燒雞旦仔, 遺憾而回呀

Isaac仔第一次坐船

未上船已經哄住個海黎望. 上左船更加啋你都傻, 繼續望海.

真係好快就到大澳.....船程都要一個鐘, 但坐慣長途車既媽媽覺得比想像中快了.

第一站先醫肚, 因為要就阿仔食飯時間. 呢日好熱好熱, 熱到溶仲要一行六人除左爸爸同阿仔無遮担之外, 個個都担住把遮包括黑猛猛既工人姐姐.

行到身水身汗就係為左食呢間所謂好出名既東方小祇園

其實稍為出色係呢個荔茸卷囉, 一 d 都唔油. 平時唔食呢味既媽媽見成枱人都讚好食, 就試下, 果然係鬆化加唔油.

婆婆同姨姨都讚好既紅燒豆腐. 話好好滑喎. 但平時食慣清淡既媽媽都嫌無乜味囉

 

成枱人都讚好脆既生炒骨.

成枱人都喊揾笨既鹽焗雞, 冰雞一隻....做乜要賣二百蚊, 一 d 雞味都無. 食水好深囉. 我地叫左半隻, 因為咁岩有一枱食客又係要半隻.

食完一餐飯, 又要行條好熱既路, 做乜九月尾都咁熱架, 個個都行到身水身汗, 至慘係媽媽唔記得幫阿仔裝返把遮, 搞到阿仔白曬足成日.

Isaac: 唔緊要啦, 我而家都有把遮

Isaac: 哦, 你又偷影

好不容易捱到去大街, 開始由姨姨做導遊, 帶我地一人食一個茶果. 好出名架喎

之但係出名呢......對我們為食一家黎講, 一 d 都唔識欣賞. 我自己覺得當年去東平州行山時買既茶果係最好食既. 婆婆就話連屯門賣既茶果都好食過佢喎.

成個大澳之旅最好食係呢檔阿蘇有介紹過既無檸檬既檸檬茶. 正呀, 尤其係咁熱既天氣底下. 一人一杯消暑解渴

仲有呢個外脆內軟的奶油多. 好味好味.....而家真係買少見少呢種質素既多士. 簡直係大澳必食必飲.

Isaac: 爸爸, 我都要涼下塊面仔呀, 好熱呀.

嘆完凍檸茶, 媽媽建議行呢個新基大橋影張相先啦

Isaac: 咁曬仲要影呀?

 三個月食完即瞓覺加三個月身孕既大肚(腩) 照.

 睇個天就知呢日真係好好好好好熱.

原來行到新基大橋dou返轉頭係最好架, 我地就係無dou返番去. 一直行行行, 行左都唔知幾耐至dou返出去巴士總站個到, 個個都熱到傻左.

dou左一大堆路又行返去食車站豆腐花, 姨姨話又係好出名架喎.

一人一碗兩溝. 食左咁多野, 真係發覺大澳人口味係好天然囉, 因為好多野都無味 (除左杯好好味既凍檸茶同多士外)

阿仔食到個咀都黑哂

食完豆腐花因為之前嘥左好多時間散步, 所以都買唔到砵仔糕就要返歸了

臨走係碼頭一家三口攰到傻左既樣.

可能係大澳滿足唔到食欲, 媽媽忽然興起提議夜晚去三聖買海鮮食. 吖, 竟然姨姨同婆婆都讚成喎. 所以夜晚又好豐富, 有龍蝦有石斑又有聖子, 工人話佢未食過聖子, 可能新加坡無呢樣海鮮掛.

 唯一美中不足因為係即興, 所以最出名加工海鮮既興記大排檔full左.....食唔到最好味既加工海鮮同燒鵝.

anyway, 呢日媽媽都玩得好開心, 不過就辛苦爸爸要陪媽媽行足一日(仲要抱住阿仔....雖然係爸爸自己想抱). 呢日行既路程係遠超過媽媽懷孕後, 每個禮拜的行既路程同時間呢. 爸爸話以後去多 d, 等媽媽行多 d 路喎.........希望下次去個度, 有多 d 多 d 同多 d 小食同好好味既野食比我食就好了.