極度泥hea + hea 爆沖繩之旅 DAY 3

31 Jan 12 經過之前個朝既忘形早餐之後, 呢朝爸媽都醒覺到要快D食完早餐. 所以我地好早就可以出發去名護自然動植物公園.
沿途好多海景, 好靚架, 可惜落雨, 所以睇落咪唔靚囉.

見時間早早地, 中途落車買下手信. 紅芉糕點真係好香紅芉味, 一開包裝就聞到.

中途輾轉反側又話去POO POO跟住又輪到妹妹去, 卒之去到動植物公園, 又係成一點鐘, 唉, 點解次次都好似同預計時間差好遠架. 呢個咪就係拖住兩個小朋友去旅行既不可預測既地方.

動植物公園係無寫售票處, 所以媽媽坐係門口餵妹妹時, 爸爸婆婆仔仔入去餵BIRD BIRD時, 係無買票. 等到媽媽餵完妹妹推門入去入口時,至見到門口貼左張A4紙, 用日文寫住要入場費. 跟住要行返去梳化位唯一一個有職員駐場既地方比錢, 每人630YEN.

成個動物園好UP DUMP架咋,真係好有自然FEEL.最壯觀只係入口處既雀群, 可以用200YEN 買飼料餵BIRD, 不過會引成群BIRD圍攻你.

孔雀都係好近距離, 無籠架.

除左BIRD, 其餘都無乜特別, 跟住爸爸同仔仔又去餵小動物. 不過要比300YEN至入到去, 返到香港, 爸爸至話唔係好值睇呢個動物園喎, 好在媽媽之前已經提過呢個名護動物園好細無乜野睇既姐.

開哂花既藘薈, 有紅花同黃花.

好核突既豬, 仲有一PEI 泥漿.

又係食下午茶時間, 辛苦仔仔了. 成三點至渣車去附近一間LOCAL人話好食既漢堡包店食. 原來LOCAL人話好食既店, 門面細到不得了. GPS明明話到, 但望都望唔到邊到有大大間既店......原來係一間門口得一個人入到既窄店. 不過裡邊坐得好舒服. 可以望海食包包.

個MENU DESIGN得好有心機.

我認得呢個係老闆黎架, 坐陣係店內.

好大張梳化可以HEA, 不過我地都HEA左成日, 成三點幾囉, 仲HEA乜鬼吖

婆婆要既熱水, 心形杯杯.

店內可以望到水平線既海黎食野, 好寫意架~~~如果唔係好似我地咁泥HEA湊住兩件去的話.

我地叫左兩個漢堡咋, 因為三點幾, 一陣返酒店同小朋友沖完涼又話食晚飯. 不過兩個漢堡外型差唔多, 所以只放一張相算. 連茄汁都唧成心形. 但呢間WAITER都係男人黎架喎....好似有點怪. 媽媽鐘意食佢個包, 好香烘香既味道.

回程了.....又係甩哂碌, 返到酒店好夜了. 沖埋涼都成香港時間八點幾. 唉. 所以好求其咁係JUSCO食晚飯.

拿拿臨哽完飯, 媽媽婆婆飛出去JUSCO BLUE SEAL個COUNTER到買雪糕霸住個位, 等BLUE SEAL唔好關門住....因為仔仔仲未食完飯. 所以話帶住小朋友用既時間真係長好多. 今次卒之可以散點味道. 呢個係鹽味同紅芉味.

阿仔要既士多啤梨味同媽媽點既沖繩限定田芉味.

嘩, 今次我地終於買到半價刺身了. 呢盤甜蝦刺身, 價值港紙廿雞. 仲有上邊好好味入口即溶既吞拿魚, 好似係三十幾蚊. 隔離既拖羅......平靚正好味呀. 下邊深綠色係海葡萄, 沖繩特產. 幾特別. 唔要豉油就咁食都得. 噢, 咁又一日了. 好似無乜去過邊咁. 不過仔仔同妹妹玩得好開心就真.