極度泥hea + hea 爆沖繩之旅 Day 4 (Part 1)

1 Feb 12 呢日, 終於出太陽了. 我地終於見到沖繩既太陽伯伯. 又咁岩, 呢日係觀光日, 媽媽最期待既一日. 加上有太陽, 所以呢日係最開心.

酒店房望出既左邊海景.

酒店房望出既右邊海景.

再右右邊既美國村.

呢個就係對正酒店房既無敵大海景, 海邊呀海邊, 你係邊度呀? 我見唔到你既

呢日媽媽等埋哥哥起身至落去, 妹妹就由爸爸帶落去食早餐先. 唔帶帽既妹妹, 咬牙切齒, 邊忽似女仔

已經食左好幾日既自助早餐, 呢盤係爸爸第一盤, 亦都可能係最後一盤. 因為通常照顧完仔女後, 都無時間再拎第二盤了.

有左之前既經驗, 我地好快KO左早餐, 即渣車出去, 預一對仔女中途又梗有意外甩碌搞到遲哂個行程, 所以媽媽呢日不停咁講, 快D快D早去早回....結果係無得早回, 呵.
第一站係殘波岬...配上太陽, 好靚呀, 望到心情都舒暢.

殘波岬, 預左要登呢個應該高五層樓既燈塔. 不過兩件細既, 點上去呢???

就係有偉大的母親, 揹住囡囡上去. 我上呀上, 努力加油呀. 你睇阿囡幾咁嗲撲係媽咪到.

咁阿仔又點上燈塔呢? 掛住玩呢個日本買既三線琴. 不過又係三分鐘熱度, 放低左無再掂了.

阿仔咪就係由偉大的爸爸抱佢上燈塔囉. 背景係三架美國戰機.

我撐呀撐.....鬼叫仔女細咩, 努力撐......唔知N年後, 一對仔女會唔會有耐性扶我地呢D老人家上去睇呢

努力辛苦修成既正果係.....

係咪值回票價呢

一對仔女唔駛撐樓梯都咁攰樣.....難為撐完樓梯仲笑得出既父母.

好. 睇完. 返落平地了. 係燈塔吹到頭都温埋

做完運動成身汗, 第一件事梗係去食雪糕....由最唔為食既媽媽帶隊, 邁向雪糕車

媽媽: 做乜又偷影我地呀?

係咁椅比爸爸影下相啦. 分別係沖繩限定既紅芉雪糕, 盬味雪糕同仔仔情有獨鐘既士多啤梨雪糕. 食完後, 又向第二站萬座毛出發....