極度泥hea + hea 爆沖繩之旅 DAY 1

29 Jan 12 我地一家四口加埋婆婆出發去沖繩, 開始好泥hea 既旅行, 同埋我地發現, 的住兩個細路既行程, 係比的住一個細路既行程, 係慢一倍架......暈...

我地搭既係出名delay 既香港快運. 一如預期, 真係delay左.....一個鐘咁多. 好在我地係機場餐廳醫左肚, 唔係實餓死.

因為班機delay, 我地成四點幾至落機, 之前預先係OTS租左架車, 因為我地住沙灘酒店, 交通唔方便, 所以最後決定係由DAY 1開始拎車, 可惜一出閘, 比OTS職員昆左, 叫我地坐埋一邊等.....等呀等, 等到頸都長埋. 老公話等左一個鐘了.....原來OTS SHUTTLE BUS 係出面架, 要排隊, 上滿就要再等, 真係等到火都黎. 等既期間, 見到有人黎呢個COUNTER換野, 望下, 咦, 原來係FREE 單軌電車一日票喎, 卒之拿拿臨換左四張, 打算臨走個日係那霸巿搭黎玩下. 點知最後四張原封不動帶返香港, 唉.

等到唔耐煩, 不如影下相, 那霸國際機場細到可憐, 好似去左武漢個國內機場咁.

仔仔就自己玩, 幾HAPPY.

之前上網睇話, 係機場OTS拎車, 要等, 因為幾多人係機場拎車但講國語既台灣職員數目有限......所以BOOKING 時, 講埋自己識日文, 所以拎車個時, 我地都算快拎到架車. 

咪就呢部野囉......夾死人.....因為兩個CARSEAT鬼咁硬定, 媽媽夾係中間, 兩隻手要桔起放係CARSEAT, 真係難為了媽媽我了. 母親真偉大. 就係咁, 夾足五日. 仲要二小姐嘈到爆, 大少爺又係咁講野, 媽媽要申請公傷, 因為雙耳聾左了. 

離開OTS已經五點幾了. 以為有時間去一去泊いゆまち買刺身, 點知去到岩岩六點, 關門大吉. 我地遊左第一個車河. 跟住往北走向酒店了.  

呢次行程, 我地選左最方便既美國村JUSCO隔離既THE BEACH TOWER, 真係好方便, 我地晚晚都去JUSCO掃刺身同零食做消夜 (除左第一晚外)

最滿意係間房了. 之前一路諗緊點安排兩兄妹瞓覺又唔會碌落床或者怕壓親妹妹呢個問題. 一打開房門, 原來一邊係たたみ, 另一邊至係床

呢個たたみ竟然就變左兩兄妹既遊樂場.  

爸爸: 等我比你地睇下有乜先....

爸爸: 係咪好新奇呢?    哥哥: 唓, 被黎既, 唔好玩

哥哥: 我繼續跑先    妹妹: 我繼續爬下揾玩具算

妹妹: 咦, 我揾到個垃圾桶做玩具喎     哥哥: 係喎, 不過點玩呢?

overall 我地好鐘意呢間酒店, 佢既豐富自助早餐同望海露台不在話下, 而係佢沖涼,洗面, 同埋馬桶係分別三間獨立房架, 正. 岩哂我地咁多人既一家幾口, 唔駛下下爭廁所洗面去廁所同沖涼.

呢邊係梳洗室. 其實個廳都有個洗手盆架, 呵呵, 好方便咁多人住埋一齊, 洗個手洗隻杯都唔駛等廁所入邊個位出黎至洗得手.

呢間係暖笠笠既馬桶, 頂有個水喉係洗手用既, 一按沖水制, 就會自動出埋水比我地洗手. 但我唔明點解無皂液囉. 爸爸話, 因為馬桶都有水沖洗pat pat , 所以咪唔駛用皂液囉.....

仲有右手邊呢個, 我呢d cheap 慣既平民真係好愛佢, 第一次見酒店咁user friendly. 有左佢, 唔駛揾地方掛毛巾了.....因為係一個插電既晾衣架黎架, 好有用呀

帶住兩隻細既, 五日四夜行程, 每日指定動作係返酒店同細既沖左涼, 至出去食晚飯. 所以我地晚晚都好夜至食飯. 呢日第一晚, 就八點幾至出去食晚飯.
 
第一晚, 去左網上好多人讚好味既グルメ回転寿司市場醫肚. 阿仔餓到暈, 一埋位好快手咁隊左兩碟玉子壽司同半碗烏冬.

好平民feel 既一間店黎架咋. 去呢度, 係貪佢酒店行十分鐘就到, 唔駛咁夜再渣車出去食飯. 但老老實實, 我地都覺得唔係咁鮮既姐........唔怪得日本本土食評網對呢間店都唔係咁 top 位. 不過叫做近近地好過無. 唔鮮既壽司, 我地三個大人都食左770元港紙. 真係有點暈.

食完壽司, 人地差唔多打烊收門. 但第一日黎到, blue seal又係酒店附近, 無理由唔食佢既鹽味雪糕架嘛. 點知去到, 老公話要食呢個新地喎, 但我揾唔到邊個係鹽味囉. 側邊既紅芋芝士餅....無紅芋味既,得芝士味. 又有借口黎緊幾日再食多次blue seal 食到鹽味雪糕至收手. 呵

呢座雪糕同呢舊無紅芋味既紅芋旦糕, 得爸爸媽媽ko, 真係肥死.

食完哂都好夜了, 又要返酒店抖下, 因為之後幾日, 爸爸要做長途車司機, 媽媽要長途比兩隻細路轟炸對耳同埋夾實雙手....諗起架車真係恐怖, 點解個職員仲話可以坐到三大兩細架.....莫非媽媽太肥?