九州之旅 DAY 1 (乜都無做過)

 為慶祝媽媽生日, 爸爸諗唔到送乜喎, 所以就話請媽媽去旅行......媽媽都無IDEA去邊好, 拖下拖下, 拖到二月底, 爸爸再催多幾次. 卒之求其揾個地方去, 三月二號凌晨打去ASIAMILE換機票. 目的地係福岡.

一換左機票, 好大壓力呀. 嘩, 得兩個禮拜就出發, 酒店行程乜都無. 每晚仔女瞓哂後, 媽媽好努力咁刨下網址. 一如以往, 去日本都係經樂天訂酒店, 跟住去埋TOCOO租車. 跟住仲有爸爸問幾次去到食乜~~~咁媽媽梗係不敢怠慢, 又好似之前咁, 上日本當地食評網睇下我地行程附近有乜係受日本當地人歡迎啦. 所以, 我地呢次行程, 有八成都係去食評網當地人推介既食店食. 無乜點跟旅遊書.

16 Mar 13 終於等到出發日LU. 不過我地太遲至換飛, 早機比人換哂囉. 我地只可以換下午機. 即係下午3:15分至起飛. 不過算啦. 唔駛錢既飛, 仲想點. 一家四口出發去福岡, 唔計稅同燃油費, 我地只係比左阿妹張一成機票錢咋嘛.

一家四口行李迫埋係一個大喼到, 比地勤貼左張HEAVY 既TAG, 重25KG. 不過我地係四人加埋, 所以唔當超重.

呢架機仲要係台灣轉機. 原來轉機係一共有兩餐飛餐食. 不過由香港飛台灣個轉, 得舊硬崩崩既包, 一D都唔好食. 到台灣飛福岡個轉, 都唔好食架. 但有個兒童餐就好吸引咁囉

不過之前只係記得幫妹妹買機票時ORDER, 所以忘記ORDER埋哥哥個份. 故此, 咁吸引既兒童餐, 去程只得一份.

係台灣轉機, 我地又去返之前去台北機場間育嬰室. 睇真D, 嘩, 原來除左尿片拎之外, 仲有好體貼既乳墊比人奶媽媽用, 仲有BB潤膚液. 真係同香港差好遠呀

仲有, 媽媽爸爸第一次轉機, 以為轉機入口 = 落機個度門. 好在一直有個台灣地勤盯住我地, 唔怪得佢一直盯住我地隔離啦.....因為我地HEA 下HEA 下都未上機......跟住地勤忍唔住, 勸我地係時間要上飛機啦......跟住我地又以為係同一個地方入返去, 點知原來要上一層再安檢至入得飛機. 真係大鄉里.

夜晚, 我地八點落機, 我地仲諗住可以放低行李係酒店附近行下啦....點不知呢, 搞出境等左一個鐘. 九點仲係度排緊海關. 我地有BB已經打哂尖架啦, 難為個班無小朋友, 係度排長龍.

 

過哂海關, 我地就出去搭接駁巴士, 由國際機場去國內機場. 免費的, 兩個站就到. 落左國內機場個站, 個情境同國際機場爭十萬九千里, 國內機場個邊繁忙到人流不停走......穿過國內機場, 我地就落左地鐵站, 又係搭兩個站去博多巿中心. 呢日行程就係搭機轉機搭機搭車轉車再搭車.

我地酒店距離車站五分鐘路程, 算係好方便. 係經樂天BOOK既SUTTON HOTEL. 媽媽覺得算大架啦, 又唔會太熱. 只不過周六價錢要12800YEN, 但後黎我地返博多住時, 只要5800YEN咋, 爭幾遠.




放低行李, 拿拿臨係酒店對面間餐廳食少少野, 其實媽媽唔肚餓, 不過飛機餐又怕小朋友唔飽. 所以點都係要食少少既.

呢份一上枱, 爸爸就話: 午餐肉飯~~~~

哈哈哈, 日本點會有午餐肉呢家野呀. 其實佢係まぐろたたき....金槍魚來也.

媽媽幫爸爸點左個最安全既牛肉飯. 一家四口一齊食呢兩碗飯.



之後, 去隔離便利店買第一晚既消夜.

係爸媽兩個獨食, 仔女無份. 因為太夜了, 要踢佢地上床瞓

咁就無左第一日, 真係有點可惜. 如果兩個仔女大左或者得爸媽兩個去, 媽媽實搏到盡, 一落機坐夜火車或夜車去第二個縣, 慳返日頭渣車時間的.