自得其樂的生日會

16 Mar 14 嘩哈哈， 又係時候痴住哥哥去玩去癲。做Claire 真係好， 成日可以名正言順去玩。

Claire: 呢頂帽係爸爸幫我做架， 靚唔靚呀？

 整完小手工， 等齊人到既時候， 正正係Claire 專心睇電視既時候了。

Claire: 咁唔睇電視， 仲可以做乜呢？ 

Claire: 快D 影合照啦， 我想出去玩呀～～

因為等得唔耐煩， Claire 一食完野， 就不停話出去玩。所以，Claire 好快就出左去放電了。

人仔細細既Claire 動作唔可以睇少， 真係快到無人有。仲好自得其樂TIM。

Claire: 媽咪， 快D 黎一齊SIR 啦， 好好玩架。

Claire: 哈哈， 真係好好玩呀～～～

最後， 居然有個姐姐肯陪Claire 癲。咁岩Claire 又忽然鐘意左姐姐， 不停痴住佢玩。呢個忘年朋友真係少有地發生。

點知， 同大姐姐大哥哥玩， 玩到忘哂形。

就係咁， 居然同男仔玩埋一堆瞓埋一舊。真係無眼睇。大個如果仲係咁， 點算呢？！！

扮船長之生日會

16 Mar 14 又係時候去生日會了。都唔係好明， 係咁岩Isaac 同學仔興搞生日會吖， 定係而家媽媽無返工， 識左Isaac 同學仔媽咪， 所以成日都有生日會呢？ 好似呢一年加加埋埋， 我地差唔多個個月都去一次。好在每次Isaac 都好開心姐。

今次係同學仔CASEY生日。CASEY媽媽好有心機， 為各小朋友準備好小手工。早去既小朋友， 可以專心咁做自己獨一無二既生日帽。不過媽媽好有信心都好放心， 所以百分百放手無幫手做。

其實做父母要信得過仔女至得架嘛。做呢D 小手工都要落手落腳幫手， 咁佢地咪會越來越倚賴囉。

除左小手工， 各大小朋友仲可以專心咁坐係度睇電視， 大家睇到眼都唔眨。

Isaac 等左好耐，都未可以出去玩PLAYGROUND。塊面寫滿左不耐煩。影合照都無乜表情。

稍為有少少表情， 就係完哂集體遊戲（其實Isaac 全程呢埋唔玩囉。又唔肯同小主角壽星仔影相， 真唔比面），主角分回禮時， Isaac 至有丁點兒笑容。

Isaac: 媽咪， 呢隻熊仔靚唔靚呀？

 連個回禮汽球縛住隻熊都襯埋色， 媽媽真係服左CASEY媽咪。

嘩， 終於放監了。可以出去玩了。睇下Isaac 即時笑容滿面，同之前呆呆的樣子， 判若兩人。

唔知點解， 呢日Isaac 好鐘意扮渣船船。

渣完上邊又落下層渣。

Isaac: 我要望清楚有無海盗先

Isaac: 嘩， 個度有海盗黎緊呀～～～

Isaac: 等我落去打海盗先～～～唏～～～

Isaac: 壞人已經比我打死左喇， 你地快D上船啦！

YO YO： Isaac 呀， 點解你咁勁， 可以打死哂壞人既？
Isaac: 唔， 呢個係秘密黎架喎。

ELEMENTS 遊樂場

15 Mar 14 呢日晨早陪哥哥出尖沙咀睇比賽。Claire 算係咁架啦， 坐成個鐘都唔嘈。只係臨尾扮下大小姐攤左係度。

完左比賽， 我地路經1881， 嘩， 好靚呀。一向好女仔性格既Claire 當然話要影相啦。

呢朿超大紫玫瑰， 原來仲有另一邊， 係附草椅架， 好搞笑。呢兩兄妹一齊坐。希望大個都咁相親相愛。

影相唔係哥哥杯茶， 反而女仔性格既Claire 就見得意公仔都要影。

影完一堆相， 我地順勢去埋九龍站既ELEMENTS （其實都唔順勢， 因為都幾隔涉。不過媽媽見反正出開去， 不如去埋， 總好過特登搭車去吖嘛）

大個女的Claire, 雖然就話成日去公園。不過行會郁既吊橋， 就真係少之又少。所以， Claire 其實好好好驚架。

Claire: 救命呀～～～～上左黎又落唔返去。媽咪又幫我唔到～～～頂硬上啦。

卒之行左幾次吊橋後， Claire 放棄左， 走左去玩更高難度既滑梯。媽媽見到都服。

傳聞中呢個AREA 係比大仔玩。因為好高下。要SIR到條高滑梯， 必須要先爬兩層。

睇住Claire 一次又一次咁踩上呢幾舊攀石到， 穿過個隆， 又轉身再攀另一層石至去SIR 滑梯。媽媽真係對Claire 另眼相看。估唔到人仔細細， 動作快快不得止， 仲膽色過人。同場有高大過佢既男孩子唔敢爬上去。但Claire 卻一次又一次做親身示範。真係服。

每次SIR落黎都幾咁開心。就知Claire 完全唔當攀爬係一回事。

之後， Claire 又同哥哥走左去玩單車氹氹轉。唔知下次再黎， Claire 對腳可以踩到未呢？

Claire: 哈哈， 我今次無得踩姐。但我都開心架。

除左玩， Claire 仲坐呢架軍車。

Claire: 點解前面兩個唔坐低既～～

ELEMENTS仲有個好考細路平衡既氹氹轉。不過大人就好辛苦， 不停咁推。推到媽媽都無力， 都係專心影下相舒服D。

如果下次有機會。媽媽都會再帶兩兄妹黎呢個公園， 尤其係哥哥最近又問媽媽幾時會再去喎。咁梗係好有吸引力至會令哥哥記得架啦。

ELEMENTS 空中花園放電記

15 Mar 14 等左好耐， 呢日終於到Isaac 2014年第二次出場朗誦比賽。其實呢次比賽， 媽媽無打算報國語的， 個時諗住只係報英文， 咁諗住反正都要出巿區， 不如索性報埋國語。點不知主辦機構真係把呢兩項朗誦分左兩日。搞到我地呢日特登出去只係國語朗誦。

好耐無出過場， Isaac 出場前不停話好驚。真係傻豬豬。不過點都好， 最後Isaac 都做到吖。結果係點唔緊要， 最緊要係過程。咁又多一個經驗， 好難得， 而且今次表現同屋企一樣， 媽媽覺得好叻了。朗誦比賽表現按此

最後， 全場成40個小朋友參賽， 只有三名頭奬， 我地分到優異奬， 已經好好了。不過Isaac 唔肯影相。媽媽唯有偷影。

Isaac: 究竟呢度寫乜呢？

完左比賽， 我地係附近既藝術中心逛下。咁岩撞正台灣藝術大師朱銘展品展示， 離遠望呢排， 媽媽仲以為係一排軍裝警TIM。點知原來係石雕。

兩兄妹難得正經的合照。Isaac 一臉保護妹妹既樣子。

之後係1881見到好靚既玫瑰呀， 仲有張超大草椅。哈哈， 好有春天FEEL。睇下， 兩兄妹又無厘正經。

媽媽加入一齊影， Isaac 忽然嗲在媽媽身旁。唔知做乜呢？

好， 搞左一大輪， 又話去太空館睇戲點知又無哂好位。我地DOU左好耐， 最後去左ELEMENTS既空中花園放電。

咪睇呢條斜台好易爬， Isaac 話好辛苦， 好攰喎。

Isaac: 唉， 我爬唔到了， 我唔玩呢個啦。

之後， 就搏哂命玩左一陣全場最大仔玩既高滑梯。之所以係大仔玩， 因為點都要攀過呢兩級先， 睇Isaac 神高神大， 但對佢黎講， 都仲要擘大腳至爬到， 就知都幾吃力下。

其實除左個兩級， 仲有係一上左去， 要“攀石”至可以再越級玩SIR 滑梯。而係“攀石”個度， 仲有個大隆隆會跌落去。初頭Isaac 上左去見到個大隆， 話唔敢玩，不過當佢見到其它小朋友照攀無懼， Isaac 就放膽玩了。睇下， 辛苦過後， 由咁高SIR落黎幾開心。頭先點攀既辛苦都忘記哂啦。

真係好好玩架。SIR完又SIR就知啦。不過相對妹妹， Isaac 無咁鐘情呢個攀石滑梯囉。

因為除左滑梯， 仲有呢個踩單車既氹氹轉吸引佢。

仲有仲有， 呢個又係氹氹轉， 不過Isaac 玩到係又瞓又趴又坐。睇黎好刺激咁喎。

嘩， 原來呢個氹氹轉又高又低架， 少D重心都會飛出去。好似以前套掌門人咁。

轉呀轉， 究竟Isaac 有無頭暈架。

趴趴下又忽然坐低， Isaac 變身大爺。點解？ 睇下幾多小朋友一齊推佢個氹氹轉就知啦。

Isaac: 我都係努力趴低， 唔好比人飛出街至得。

有小朋友係用企既方法去行。不過行行下～～～

唔通呢個小朋友覺得落地推會好玩D？Isaac 唔理咁多， 一於好舒服咁趴左係度。

今次黎ELEMENTS空中花園， Isaac 反而無咁鐘意坐呢架車仔。可能周邊都太多更新奇既玩意。

Isaac: 媽咪， 你唔好影啦。

係ELEMENTS放左成兩個鐘電， 我地都係時候打道回府沖涼洗白白了。今次居然比我地見到V CITY呢架馬車放側邊， 卒之唔駛比錢消費都可以任影了。兩兄妹等左咁耐， 梗係要影返張先啦（因為之前黎親， 都寫住要消費至可以影架）

完美的一天， 咁就完結。相信兩兄妹呢日真係玩到夠本。下次我地會再去ELEMENTS度玩的。因為真係太多野可以比佢地發掘。