特技人員反轉冒險樂園

23 Feb 14 嘩嘩嘩， 呢日我地又反轉冒險樂園。今次特登早一個鐘去比Isaac放盡電。因為今次生日會去到傍晚六點， 如果之後STAY BEHIND， 兩隻馬蹓應該攰到沖唔到涼。所以媽媽就選擇早一個鐘去比兩個玩。

玩左幾次冒險樂園， Isaac 好明顯已經摸熟呢個氹氹轉， 今次仲做特技人員TIM。

嘩， 跳落去坐。好勁呀。

乜動作都做齊。真係同第一次黎玩差天共地。

次次黎生日會，Isaac 都病。今次無。所以媽媽答應佢換支棉花糖（係出席生日會都有得換架）， 嘩， 呢支售13元既棉花糖超巨呀。Isaac 你個頭變左棉花糖頭呀～～～

終於有機會同主角影合照。話說壽星女係Isaac BB班同學仔黎。到今日仲可以有聯絡。真係好難得。

一話埋位， Isaac 好快手坐左埋去，仲眼定定望實堆炸物。梗係， 媽媽平時好少會比佢食呢D香口野架嘛。所以Isaac 今次望到口水流。

食飽飽， 繼續做特技。

Isaac: 媽咪， 睇下我， 我而家唔跌架喇. 

Isaac: 係咪好犀利呢？

雖然最近成日黎冒險樂園生日會， 不過Isaac 次次都玩到好開心， 睇返D相， 真替仔仔高興。希望佢大個都有呢份童真， 唔好被填鴨式教育浸到麻木左就好了。