SHOW 勞作仔

20 Mar 15 呢日上完畫班，媽媽就帶住兩兄妹出荃灣去。其實都唔記得點解要出到咁遠了。ANYWAY，想講既係，一上巴士，妹妹Claire 急不及待SHOW下佢個獅子沙槌頭。

Claire: 嘩，似唔似我呀～～～WOW～～

哥哥係隔離見到，又要有樣學樣，今次媽媽索性錄VIDEO啦（按此去片）。雖然片短，不過睇返，感覺到兩個傻豬仔係到SHOW野比爸爸睇。

孝順仔

19 Mar 15 Isaac 一向聲稱鍾意媽咪。幾乎日日掛咀邊。不過男孩子，亦都幾乎每日激死媽咪。

呢日放學路經數字屋，Isaac 一見呢盒綠茶，即拎起手同媽咪講： 我請你食吖。

當然，返到屋企，Isaac 好有信用，真係向銀包拎錢比媽咪。嘩，都未食呢盒餅，媽媽心都甜埋。呢盒簡直係最好味既綠茶餅啦。

之前幾個月日操夜操學校表演比賽，而家連最後一樣既唱遊比賽都完埋。難得呢日下午唔駛又返學練習，媽媽索性帶兩兄妹落樓下踩單車。雖然無左工人姐姐，不過一個女人拎住呢兩部單車上落十級樓梯，其實無問題。不過係辛苦D。但為左兩位小朋友可以繼續過有工人一樣既玩樂日子，媽媽辛苦D都要架啦。

睇住佢兩個踩得咁過癮，其實乜都值得，尤其係Isaac 咁孝順。媽媽相信佢大個仔左，都仲會記得照顧年老的媽媽既。最衰媽媽一個唔敢比佢地踩到出巿中心公園，否則玩埋公園，實更開心。

67屆校際唱遊比賽

16 Mar 15 日練夜練，練得仲多過鼓隊，練到Isaac 同某D同學仔都頻頻呼喊唔想再唱（都幾陰公，唱到驚，不過媽媽見到個加唱時間表都覺得自己一樣唱到驚），卒之等到校際唱遊比賽當天了。

Isaac 被安排做樹。佢話比媽咪知，其實佢想做蝴蝶喎。不過媽媽覺得可能佢唱得唔夠認同大聲，所以被安排做樹掛。

Isaac: 你睇我唔到，我變成一棵樹了。

成堆樹企埋一齊，真係好難揾邊個係Isaac. 不過得佢一個整古做怪，其實明眼人一望就睇到。

其實蝴蝶得兩個男同學，蝴蝶都係女同學擔當。難怪Isaac 都要做樹了。雖然練到厭，不過呢次校際比賽，拎到榮譽奬呀。大家都替呢班校際唱遊班高興。

開心生日會

 15 Mar 15 呢日我地跳舞比賽後，跟住趕去梓枱生日會。其實我地差唔多生日會完結至去到。主人家等埋我地一齊切旦糕，真係幾咁唔好意思呀。

Isaac BB班同學，大家咁高咁大，顯得Isaac 並唔係特別高大。

BB班同學中，以呢位朋友仔最鐘意周圍搶野撩事。

KINGS： 喂，比個波我吖。

Isaac: 唔比呀，我架～～
KINGS： 嘩，駛唔駛咁大反應呀～～

 呢兩兄妹黎到生日會，雖然唔係好多朋友都識，不過佢兩個一點都唔會悶。尤其係妹妹Claire，自細跟哥哥出開去，已經懂得自得其樂。

Claire: 哥哥，好多波波呀，執個比你吖！ 

Claire: D波好搞笑架，識飛架。

去生日會，就睇到兩兄妹性格好唔同。哥哥Isaac 如果無人陪佢玩，就會發脾氣； 反而妹妹Claire，每次無人同佢玩，Claire 都可以一個人玩得好開心。

Isaac: 唉，都係跑出去玩滑梯好玩D。

Claire: 係喎，我都係唔掟波啦，去跑跑跑先。

Claire: 哈哈，好開心呀，有BB陪我玩。

Isaac: 妹妹，你係邊呀？？？？

Claire: 哥哥，我係上面呀～～

Claire: 快D跑去揾哥哥先。

 就係呢兩兄妹，好時糖痴豆，唔好個時水溝油。

Claire: 乜野叫水溝油呀？

唔知佢地成日打交，仲以為佢地好温馨TIM。

Claire: 嘻嘻，都係爸爸最錫我，唔會同我打交。最多係打我既姐。

呢班同學仔，曾經同窗一年，而家各有各大，有D有小學收，有D 同哥哥一樣，等電腦攪珠。無論結果點都好，希望大家都入到心儀小學啦。

第一次出賽 －－ 拉丁舞

15 Mar 15 呢日好緊張呀，因為係Isaac 學拉丁三個月後，第一次出賽。地點仲要係老年咁遠既黃大仙個頭。所以晨咁早，我地就坐車出發。點知⋯⋯去到⋯⋯等好耐。等到發哂霉至出賽。比預定時間遲好多呀。原來參賽手雖然年紀細細，但個個打扮到成隻雀咁，有D仲化哂濃粧。好難想像妹妹第時要咁著咁化粧。

Isaac: 媽咪，你望住我啦，唔好周圍望人啦。

Isaac: 唔好理人啦，我自己跳好至再睇人地點靚。

 雖然只係學左三個月，但好似有哂姿勢咁。

第一次出賽，估唔到一點都唔怯場。仲跟足拍子TIM。

媽媽其實一點都唔識教，唔識幫佢惡補。所以跳錯我都唔知。只知要企埋一邊支持佢，讚下佢。咁Isaac 就已經好開心，繼續跳下去。

Isaac: 媽咪，我型唔型呀？

跳得好投入既Isaac，佢話好鐘意跳舞。媽媽已經同佢講，跳到六月，係時候要選擇一項課外活動，估唔到佢會選擇跳舞。

初初我地只係預一個鐘就走。因為趕住下場去生日會。點知，去到等左一個鐘至開始跳。跳完原來仲要等結果，等完仲要等再跳決賽，唉，真係等了又等，等到肚子凹，要爸爸係附近揾食，真係缺水又缺糧呀。由早上十點係個度，等到下午三點，卒之完哂成個賽事。Isaac 最後取得兩個三等一個二等奬。只係三個月習舞，取得呢個成績，算係咁啦。

 有了今次經驗，下次跳舞比賽，我地就知會預足一日比佢了。仲要買定糧食去等，哈哈。

生活雜錦

11 Mar 15 話說呢日下午又要返去學校加操課外活動，去到學校未開門。咁岩有個女同學緹緹一見 Isaac，即跑黎HUG住Isaac。不過通常緹緹媽咪在場，緹緹係唔敢咁做架。哈哈哈。話說Isaac 同媽媽講，緹緹曾經同佢講： 我鐘意你。

唔知係咪咁，Isaac 見親緹緹，就好唔自然。明明話一齊影相，點知Isaac 不停咁郁身郁勢。其實遠在K1個時，Isaac 有一段時間，係鐘意緹緹架。個時學校旅行，仲死都要跟實緹緹TIM。估唔到三年後呢日，情況係完全掉轉。

15 Mar 15 話說脫離工人姐姐存在既生活已經一周。媽媽日日兩頭撲照顧好忙課外活動既兩兄妹。呢日哥哥又要遲放學，之後又話趕住上英文課，媽媽接左妹妹後，同妹妹係圖書館做左一陣功課就去買包包接哥哥放學。之後，兩兄妹坐街邊趕住食LUNCH，過去一年，Isaac 已經習慣左放學坐係呢張BENCH 快速吞LUNCH之後再上堂。估唔到，咁快有妹妹一齊加入。當然，一如所料，係有限時間內，妹妹係未能成功吞哂佢既LUNCH不特止，仲分左一半比哥哥。之後，送左哥哥上堂，妹妹仲要繼續完成埋佢既LUNCH。

如果妹妹進食速度正常返，咁一切就好辦事了。因為，而家一周總有幾日，因為要考慮妹妹進食速度問題，我地迫於無奈放學要係街邊食（可以慳返來回屋企學校時間），同埋因為妹妹，我地特別請左個鐘點，方便媽媽掉低妹妹，送哥哥去學劍。希望妹妹可以學識食快D，咁我地可以慳返鐘點之餘，又可以返屋企食多兩餐，健康D啦。

義務打中國鼓

9 Mar 15 話說年尾，Isaac 同媽媽講，佢要去香港大會堂表演打中國鼓，當時媽媽仲未收到通告，仲諗緊真定假呀。點知，過左無耐，聖誕假前，就收到學校通告要加操。因為Isaac 被挑選左做義工，幫中國武術班打中國鼓。打中國鼓都無問題，但媽媽睇到佢個加時綵排時間，真係心都痛埋。咁細個人仔，駛唔駛日操夜操呀。朝早提前返學，傍晚又要返去綵排。咁都不特止，原來第一日表演時間，係晚上七點至九點半。嘩⋯⋯過哂Isaac 瞓覺時間呀。想SAY NO都唔得，因為學校乜都定哂至比通告。而Isaac 又鐘意打鼓，咁唯有安慰佢，努力多一排就完。同期，個兩個月都CUT左 Isaac 自己既校外課外活動，等佢無咁頻撲。始終小朋友都係要有自己休息時間比較好。

學校就係挑選左呢十位同學仔打鼓，黎FOR 綜藝表演之用。其實有幸被選到，媽媽其實係開心的。好在Isaac 都好ENJOY，事後仲話想繼續打中國鼓。

難得係夜晚表演，我地一家人齊心出席支持。

原來佢地唔係打中國鼓咁簡單，原來仲有動作架。真係好似難過佢打西洋鼓多多聲。

Isaac: 哎，EASY JOB啦。

台上一臉認真既Isaac，同平時好唔同。

Isaac: 好野，終於打完，可以返歸瞓LU。

 同行有Isaac 最愛既兩位老師一齊，難怪Isaac 話鐘意打中國鼓啦。

話咁快就表演完，估唔到Isaac 係台上仲好似好精神⋯⋯不過一完左就人，Isaac 就大喊好眼瞓呀～～～～其實都幾辛苦架。返到屋企都十幾半打後，仲要同佢落粧洗頭，Isaac 眼瞓到喊哂口。翌日仲要出去表演，媽媽睇見真係心都痛埋。現今小朋友真係唔易做，只不過六歲人仔，學校就要咁要求。不過好在成個過程，Isaac 都好開心，好ENJOY。

一人一花－－死左

5 Mar 15 一年一度一人一花活動又黎。呢日老師比我地一人一盆苗。返屋企比Claire 裝飾下個花盆至移植。度一度，新苗仔原來咁細少架咋。

例牌動作，要同盆野影下相喎（老師本野寫住要架）。

因為屋企細，花盆長期放窗邊。呢日媽媽收衫，唔小心跌左件衫落妹妹盆野到。即時斷左。媽媽即刻試下幫佢殖殊。睇下救唔救得返。好明顯，被斷個截過幾日直情死埋。另一有根個截，半死個態捱左好耐都唔掂。後黎，媽媽剪左哥哥個盆花落去，諗住多一支啦，吖，點知連哥哥原本好地地個枝草，最後一齊死埋。都唔知係咁岩吖，定呢盆野本身就有問題，搞到連哥哥本來好強壯既草都捱唔到。

媽媽見交花日子就到，同妹妹講，我地今年無花交。妹妹好唔開心，不過都接受。真係乖女。希望出年可以有花交啦。

一等奬＠展我繽紛2015

6 Mar 15 路經商場應節裝飾，Isaac 大多數會走埋去話要影相。跟住妹妹就會痴埋一齊。Isaac 唔知幾時開始，識得擺POSE既呢？真係唔睇返相都唔知TIM。

8 Mar 15 呢日係畫班老師完成埋幅畫，係參賽用既。媽媽睇到幅畫，嘩，真係好鬼靚呀。完全諗唔到Isaac 畫功咁厲害。老師指導果然係好特別呀。爸爸媽媽見到呢張畫，都覺得為之一振，原來自己個仔可以畫到咁厲害架。最近，收到機構通知，呢張畫得到一等奬。不過Isaac 無驕傲，佢仲鼓勵妹妹，讚賞妹妹第一次參賽就拎到優異奬，好欣賞妹妹TIM。媽媽聽到，真係好安慰，Isaac 大個仔了。好懂事。好生性。如果可以再少D激媽媽同妹妹，咁就更好了。

忟薑女

Claire 由細到大，脾氣都忟忟地。最近Claire 一發脾氣，媽媽就好笑地叫佢做忟薑。因為媽媽細個，都係比婆婆咁叫架。有時望返Claire ，就好似望到自己細個咁，好搞笑。真係對呢個衰妹又愛又恨。

好似呢日咁，Claire 無意中發現爸爸食言，無換電，佢又坐係度發哂忟。（按此去片）

難怪爸爸冧到屎。爸爸一睇到呢條片，當日即刻打黎搖遠控制媽媽去買電。跟手仲自己去埋買電比妹妹TIM。

妹妹真係幸福呀。咁多人錫。

媽媽生日天

25 Feb 15 呢日媽媽生日。特登同小朋友黎返呢間TOMATO食LUNCH，貪食完可以叫CAKE食。點不知，食完之後，媽媽同妹妹飽到上心口。滯到不得了。最後"生日CAKE"只係得唔係壽星食。

Isaac: 唉，其實我都好飽呀～～

Isaac: 仲有咁大舊，點食呀？？？

最後，件CAKE食唔哂，淨返少少CREAM。估唔到生日諗住應下節食返件CAKE，點知件CAKE得仔仔一個有位裝。

食飽飽，又同兩兄妹去公園玩。有人飽到上心口，話要瞓下草地抖下喎。

呢D咁優閒既日子，相信好快唔會再有。因為Isaac 好快要面對繁忙既小學生活了。到時放假，可能日日留係屋企做功課同温習。估唔到，開心的六年，咁快就過。