K3 英文故事比賽－－銅奬

27 May 17 經歷毎半月既地獄式背誦訓練，Claire 終於識得背呢篇故事了。老老實實，媽媽三月底收到呢份野時，真係嚇左一跳⋯⋯乜咁鬼長架。哥哥當年英文故事比賽既稿都無咁長，呢次仲要係妹妹參加喎⋯⋯唉～～～～心知不妙。果真，復活節都未開始放，老師已經反映妹妹仲未識背，梗係啦，媽媽都未幫Claire 背。咁長既文，唯有拎埋去旅行，一日背一句。終於係比賽呢日，死掂左。

平時練習都好崩緊，老師成日話佢好緊張，OVERALL都真係三個參賽者裡最勉強的一位，就算平時媽媽幫佢練，佢都只係得呢一次叫做好好笑容架咋（按此）

媽媽帶比賽經驗豐富，一入賽場，一個箭步坐正係台中央，方便Claire 出賽時，眼神扮係"正望前方"其實係望媽媽。所以，旁人會覺得Claire 好淡定架⋯⋯但相比之前既練習，Claire 表現算失色左少少，不過，應該都好過係幼稚園對住老師練習。因為次次老師都話佢無動作架。（按此觀看比賽片段）

完賽後，仲未宣佈結果，先同評判合照。

英文故事組其中一課室。有兩個NATIVE SPEAKER，帶隊老師話，Claire 輸在口音，好唔抵。如果Claire 係有NATIVE SPEAKER既口音，就應該第一名了。

辛苦老師帶三個同學去英文故事比賽，平時放學仲要同佢地練。平時係學校練習，彤彤表現係好好架，媽媽仲諗住佢實拎奬，點知出場反而跌水準，掉返轉係Claire 表現好過平時學校練。真係估呢個衰妹唔到。

終於等宣佈奬，Claire 獲得最佳造型奬。睇佢個樣緊張到呢～～～

Claire: 我終於拎左奬，唔駛再練了。

 對於呢個傻豬豬黎講，最佳造型奬其實已經係奬，Claire 當時都唔知乜黎。只係落左台，不停遠望媽媽⋯⋯我攞左奬啦⋯⋯

點知，又要再上台⋯⋯可能Claire 都唔知乜事呀～～

Claire: 做乜而家先比個杯我既？我第二次上黎囉喎。
校長： 傻豬，你拎左銅奬吖嘛。

就係發音不準，明明精彩過頭兩名，但只能獲銅奬。原來，發音純正，好緊要架。

 成班中普英文故事比賽參賽者，濟濟一堂黎個大合照。

果然，黃色鴨鴨真係好搶鏡呀～難怪得到最佳造型奬。

我地幼稚園既參賽者。年年係呢個比賽，都收獲豐富。

返到屋企，Claire 十分興奮咁衝落街⋯⋯仲要幫媽媽拎環保袋。

因為，佢要大購薯片呀～～～媽媽話，佢呢次比賽表現好，就比佢去士多選零食，愛吃香口食物的小妹妹，即刻拎哂薯片埋單去也。

Claire: 係呀⋯⋯平時無得食吖嘛。