4D 我的囡囡

又係產檢日子. 呢胎媽媽主要肥係個肚到, 無第一胎咁由面肥到落腳. 不過, 迄今已經重左15磅了經過六個月特"瞓", 每晚食完晚飯就同哥哥一齊撻落床揾周公, 諗住到今日好似主要肥哂落個肚到, 以為囡囡都可以吸收做大隻 b 啦....點知, 仲輕過 Isaac 喎.....同哥哥一樣, 比醫生話都係細碼 B.........點解? 因為 Isaac 去到 37周都仲係停留係五磅十三安既重量.....好在哥哥叻叻, 肯繼續留係媽媽肚裡面吸收, 所以第 38 周同 39 周, Isaac 係每周重一磅咁迎接新世界. 臨出世個兩日去檢查, 卒之係可以重到七磅四安士, 囡囡呀囡囡, 你快 d 吸收啦, 再唔係你唔好咁快出世, 要足四十周至好出黎呀, 好似哥哥咁, 有七磅出世就好了. 婆婆話呢個磅數, 出世後至容易湊喎.

呢次產檢原來已經去到25周, 媽媽都唔知tim, 仲以為得 24 周. 醫生好好人, 幫我地睇下照唔照到囡囡個靚樣, 不過阿囡又係囉, 次次照超聲波都要用手遮住塊面仔. 要醫生好大力咁推媽媽個肚, 至推得開囡囡對手, 你知唔知媽媽個肚比醫生推到幾痛呀

好勉強至影到囡囡個樣, 醫生今次已經係第二次話, 阿囡似爸爸喎.

究竟係咪呢....睇返哥哥當年既4D, 點解又好似同阿囡差唔多樣既呢....除左個高鼻樑之外.

點都好啦, 醫生話今次個角度麻麻地, 下次產檢睇下可唔可以照多次囡囡樣比我地睇......不過媽媽公司的老闆S, 已經唔鐘意媽媽請假去覆診, 可能下次再去檢查, 已經太大, 照唔到4D了.

囡囡生長情況		哥哥生長情況
6wk 2d                 0.57cm		6WD 6D                0.96CM
10wk2d                3.40cm		10WD 1D             3.16CM
11wk2d                4.50cm		12WD 5D              6.39CM
11wk6d                5.24cm		14WD 5D               8.91CM
17wk1d                 6安士		20WD 1D               12安士
20wk1d               13安士		24WD                 1磅 8安士
25wk2d          1磅 7安士		27WD 5D           2磅 6安士
		31WK 5D           3磅13安士
		33WK 5D            4磅 7安士
		34WK 6D           4磅12安士
		35WK 5D            5磅 4安士
		36WK 5D            5磅 9安士
		37WK 6D           5磅13安士
		39WK 0D          6磅11安士
		39WK  6D           7磅 4安士
		出世                  3.25 kg