Isaac 住院記

30 Nov 10 呢日爸爸去北京公幹. 原來係惡夢既開始. 呢晚媽媽一返到屋企, 做乜阿仔咁滾既呢, 媽媽第一個反應係, 發燒呀......工人話唔係發燒, 係阿仔百厭通屋走所以咁熱.  不過阿仔係維持係37.x度, 所以仲係觀察緊.

Isaac: 我個樣似唔似發燒吖.

媽媽九點幾就同阿仔昏睡左. 十點幾忽然扎醒, 醒起阿仔可能係發燒喎, 一摸額頭, 嘩, 仲熱過放工返去個時, 拿拿臨拎支温度計睇, 38度......跟住又37.x度, 持續左成個鐘, 忽然去到成39度, 跟住又跌返落37度.  嚇到媽媽即刻打比婆婆, 喊住問婆婆, 究竟係咪支探熱針有問題呢....明明好滾架喎, 做乜長期停係37度幾. 但又忽然39度. 爸爸係北京話, 梗係即帶阿仔出私家醫院睇啦....嘩, 但媽媽好攰呀, 大住個肚, 唯有折衷方法, 係屯門揾間夜診睇. 一睇都搞到成凌晨至返到屋企.  

1 Dec 10  呢日媽媽工作好好好忙, 請唔到假, 唯有留低仲發緊燒既阿仔係屋企. 呢日, 成日都無退過燒, 仲要keep住38.x度, 39.x 度, 好恐怖, 媽媽係公司聽到, 真係想快d返去同佢睇醫生

Isaac: 我好似病到對眼都無神..........

呢晚, 媽媽放工即撲返屋企, 又同阿仔去睇兒科醫生, 一等成兩個鐘, 又餓又攰. 媽媽同工人既晚餐, 係齊齊食面包. 

返到屋企食左退燒葯, 阿仔仲係無退過燒, 媽媽第二晚無得瞓咁滯. 係咁半夜起身探熱, 呢晚半夜仲要叫醒工人幫手塞肛. 因為半夜燒到39.8度.....真係好近40度囉. 媽媽仲繼續諗, 究竟支探熱針有無問題. 但無計, 屋企附近無葯房, 放工又要飛返去睇住仔仔, 所以買唔到替換既探熱針.

2 Dec 10 呢日早上以為退左燒, 好開心啦. 中午諗住去食lunch買支新既探熱針, 工人話佢退左燒喎, 咁就唔買住了, 等爸爸返黎係護協買平好多.

點知下午三四點鐘, 打返去問工人, 原來又燒過, 哎呀, 點解會咁架.

Isaac: 發燒都無損我睇電視既精神 

3 Dec 10 兒科醫生話, 呢日仲未退燒, 就要再去覆診. 媽媽諗左好耐, 都係揾婆婆幫手, 下午帶仔仔睇左醫生先. 免得等到媽媽夜晚返去等到成九點幾至睇.

點知, 婆婆打黎, 話醫生懷疑仔仔手足口病喎, 要入院觀察. 係公司忙緊既媽媽, 一聽到, 唔知點解, 眼淚好自然咁標上黎. 覺得好可憐呀, 要入院.

放工又即撲去法國醫院, 同仔仔辦入院手續. 唉, 點知又要等醫生睇左先喎, 大家一齊坐係大堂等醫生. 好在媽媽醒目, 一早買定"痴"飯當晚飯.

係大堂等到無聊, 阿仔拎架車車自己玩.

等到夜晚九點幾至上到病房, 仲要抽血又成. 私家醫院原來唔比家長陪同一齊入去抽的.係門口聽到阿仔比人抽血抽鼻液抽到喊, 又無媽媽係身邊, 真係心up. 抽血房門打開, 見到雙眼通紅一隻手貼住左棉花既仔仔行出黎, 真係點比安慰佢都無用了. 因為呢個夾硬比人的左入房又無親人係附近既經驗, 仲要比幾個人輪住抽野化驗......仔仔入返病房, 開始出現醫護人員恐懼症. 連續幾日, 一見到醫護人員行埋黎, 可能只係隻手掂一掂佢, 阿仔已經大喊到收唔到聲.

呢晚凌晨爸爸趕返香港了, 不過爸爸話係因為媽媽喊住咁講仔仔要入院至返黎囉  >_<

4 Dec 10 呢日公司無咁忙, 終於可以抽身請假, 晨早五點幾, 廿四孝媽媽同爸爸一齊飛的去醫院. 因為仔仔平時七點就起身, 媽媽好想仔仔係陌生環境下瞓醒, 都望到熟悉的媽媽面孔. 減少仔仔恐懼症.  所以幾早都要起身, 趕住仔仔起身前出現.

去到醫院, 見到仔仔又貼住塊退熱貼, 唔知點解媽媽又好想喊. 點解燒咁多日都未燒完, 又揾唔到原因呢.

好在, 呢日除左入院個晚半夜有燒外, 仔仔都無再燒了, 仲好精神咁玩同發脾氣.

因為同房有個好嘈既小朋友, 仔仔半夜瞓得唔好, 日頭比平時瞓多左, 仲瞓得好林.

5 Dec 10 呢朝終於出得院, 化驗報告一切正常, 唔係病菌感染, 只係病毒感染, 但乜病毒又唔知喎. 總之無事就好了. 呢日爸爸陪仔仔過夜, 話隔離床的小朋友嘈到不得了, 到半夜三四點至停, 阿仔都要三四點至瞓得到. 所以呢朝, 仔仔係攰到係咁瞓

瞓完終於出院了. 無事就好囉. 媽媽經過呢次, 終於明白, 細細個讀書時, 講乜野兒時生病媽媽係會坐床邊無微不至咁照顧兒女, 個時就唔明.而家, 終於明白了. 原來半夜發燒, 媽媽真係無得好瞓, 除左keep住要探熱, 敷毛巾外, 仲要出動到抱住仔仔瞓. 好在大肚媽媽仲撐到姐.

6 Dec 10 Isaac: 多謝各位關心, 我好返哂啦.