獨自返學去---偷拍實錄

呢日係第三日既返學日了, 呢日開始由一個鐘變兩個鐘. 一返去又係全校做運動....其實成班N1都唔知做乜囉, 個個一係喊既喊, 唔喊既就呆哂咁望住校長做運動.

呢朝做運動, 仔仔心靈感應媽媽會走, 所以做左樹熊, 後黎有個老師叫媽媽呢埋唔好比佢見到, 一呢埋, 媽媽睇到仔仔喊, 不過一分鐘唔駛, 真係一分鐘, 咁就收左聲. 好堅強呀仔你.

以下全部係媽媽偷拍仔仔上學既片段, 好珍貴架, 因為之後無得再睇佢返學了.

眼角仲滴住半滴眼淚, 強忍淚水睇住個台.

Isaac: 點解呢度有個媽媽既......我媽媽呢.....

呢張都係偷拍, 只係伸個相機去玻璃窗影既姐.

 Isaac: 媽媽呢......

好聽話呀仔仔你, 幾個同學一齊坐.

剛開始既課室, 有點狼狽, 不過之後仲狼狽, 因為好多家長湧返入課室照顧仔女食茶點, 不過媽媽依然堅持原則, 等仔仔早日適應無媽媽照顧既校園生活.

好快已經投入哂, 仲出黎拎唔知乜野TIM.

後黎仲周圍行, 可能悶得滯啦, 因為課室實在太亂,  喊既喊, 出黎既出黎. 基本上我跟過一日就知, 係裡邊聽喊聲仲大聲過老師講故仔既聲音囉.

跟住到自由玩樂時間. N1班真係好亂下, 亂到大家都唔知邊對鞋係自己就咁著左就算. 媽媽後黎都發現係滑梯到有一撻唔知邊個小朋友既尿尿.

偷拍阿仔既玩樂樣.

Isaac: 我唏....等我學爸爸先.

 Isaac: 等我執返個波波先

玩樂完排隊去完洗手間, 回程時媽媽竟然比仔仔發現左呢埋係防煙門後邊......乜仔仔你咁遠都望到架. 好在仔仔走埋黎笑一笑, 跟住自己返番去老師到咋, 媽媽幾驚佢見到媽媽, 會失控撲上黎喊.

媽媽好堅持呀, 去廁所時間都唔會出現陪佢...雖然比佢發現左. 不過無理由咁就要陪架嘛, 不過既然都比佢識穿左媽媽既存在, 所以都無謂在呢埋遮遮掩掩了, 之後, 媽媽就索性企係玻璃窗前面影相算.

仔仔食茶點, 好叻仔, 茶點一埋黎就即食, 仲要好快手

唔知點解忽然間課室係好多家長架囉, 去完廁所個個家長都衝入課室幫手餵食定點. 但阿仔已經標左出黎啦~~~~~tidy up. 嘩, 媽媽係出面望住, 真係四萬咁口笑哂.

老師拎個箱比仔仔tidy up.

殊不知呢頭tidy up, 個頭埋位阿仔又可以食第二輪, 媽媽眼都突埋......乜老師比咁多你食架.

食完無所事事, 仲走出黎玩白板.

又想同老師講野, 可惜媽媽見到老師好忙碌咁湊仔女, 唔得閒聽仔仔講乜. 呢下媽媽真係心急, 不過無計, 做阿媽都要學習接受.

完哂茶點, 又到故仔時間, 阿仔真係開始悶, 睇佢楝高隻腳就知, 仲要擰埋後面唔知想點.

不過可能阿仔忽然回神, 知道要留心上堂, 居然自己擔凳仔拉前坐.

點知坐坐下又悶到要周身郁, 媽媽係出邊睇見真係好笑.

到放學時間, 接放學時, 阿仔又出乎媽媽意料, 居然無喊喎, 仲好聽話咁跟住老師行出黎tim. 叻仔, 希望以後都係咁啦.