六個月了～～～哥哥餵食牙仔餅

1 Oct 11 Claire: 媽媽， 我今日半歲生日啦， 時間係咪過得好快呢？


大個左既妹妹， 最唔鐘意瞓係房。一放落床就大叫。無計， 哥哥病左咁耐都仲未好返， 唯有委屈下妹妹先啦。至多比個健力架你玩下。 Claire: 我想出去同你地一齊玩呀

呢日工人放假， 媽媽自己煲粥， 吖， 估唔到妹妹食喎。仲食到一啖跟一啖， 媽媽仲以為妹妹可以轉粥仔一餐TIM～～～～點知之後個幾日又係一啖都唔肯食，唉 Claire: 我比面你至食咋今日， 媽媽你唔好咁開心至得架。

半歲生日， 媽媽 R 爆頭都諗唔到去邊好。因為天氣唔好岩岩至打完風又話有另一個風球黎緊， 仲要預告係落雨。都係留返屋企算啦， 反正妹妹仲未正式成功咁食到粥仔當一餐。唯有食下餅仔當賀生晨先啦。

哥哥一早就話要餵妹妹食餅餅。雖然哥哥未好返， 但媽媽見佢咁有心， 咁錫妹妹， 好啦， 等哥哥睇完醫生返黎比佢餵妹妹啦。睇條片好搞笑， 阿妹好明顯係一臉愕然唔知你地做緊乜咁， 要睇到哥哥食餅佢至開始肯試下食。唔通食粥都要媽咪試食幾啖妹妹至肯代替一餐？

Claire: 等我又學下哥哥先， 見佢食得咁好味

食食下仲開始肯自己拎黎食。

不過越食越無譜， 對腳撐到行一行， 好明顯好肉緊下囉。

食餅都見到懶樣， 睇下妹妹食到手都費事拎。邊有人食野食到咁架。

食飽飽再入房玩下健力架。好明顯妹妹知自己夠哂懶， 所以呢次郁埋腳仔， 等媽咪唔好話佢懶， 手腳並用， 妹妹真係忙。


好忙呀妹妹你， 如果你食野食到咁就好囉， 一天光哂。


係度祝妹妹快高長大， 最緊要係肯食肯瞓， 唔好練仙。