迷上海洋公園

11 Aug 12 爸爸牛一， 又去海洋公園了。嘩， 時間過得真快， 雖然係爸爸牛一， 但一年前既呢日， 係 Isaac N 班既開學日。媽媽仲記得個時父母一齊帶佢返學， 爸爸陪佢入去， 媽媽即返屋企拎個生日旦糕， 等仔仔放學同爸爸一齊切旦糕TIM。個時 Isaac 邊識咁流𣈱講咁多上文下理。呢一年， Isaac 真係大個仔了。大個左好多， 可能好快就十年後， 廿年後， 到時唔知阿仔會變成點呢

去海洋公園遇著落雨， 媽媽鬆一口氣， 嘩哈哈， 落雨點都無曬正咁攰吖嘛。不過落雨天， Isaac 就玩唔到好多戶外遊戲了。但大個仔的 Isaac， 已經不再怕坐轉轉木馬， 叻仔。

 比爸爸錫到燶的仔仔。希望大個會聽聽話話啦。

 入紀念品店， 又要周圍玩一餐。呢頂帽係爸爸比佢帶的， 隔離個隻係乜？ 咪企鵝妹妹囉， 不過妹妹太細粒， 好明顯帶左帽係冚實哂成個頭囉， 哈哈。
 有相為証，Isaac教壞妹妹FING呢條野， 卒之有工作人員黎話～～～好在係個時， Isaac 已經停左手。所以工作人員只係話其它小朋友。其實講返古仔， 當年第一次第一個教 Isaac 利用呢 D 黎FING 同玩既， 咪就係爸爸囉。個時媽媽有勸阻爸爸唔好咁教， 仲比爸爸駁返轉頭。點知到而家， 阿仔玩呢 D 時， 十次有八次都比爸爸話架。

天時暑熱， Isaac 話要食雪糕， 咁岩呢檔無雪糕賣， 唯有食住西瓜先啦。
 Isaac: 西瓜好好味呀～～～

Isaac 最鐘意坐車， 坐交通公具， 因為佢最鐘意既係睇門門點開， 門門點關。果真係男仔一名。仲有， 係鐘意坐吊車， 好開心架， 你睇下佢笑得幾咁開心就知啦。睇風景又可以睇下點解會轟轟轟， 點上點落。足教 Isaac 問好多問題了。

最後， 祝爸爸生日快樂， 呢張相， 唔知可以重覆幾多年既爸爸牛一都咁父子融洽呢可？

呢次去完海洋公園， 阿仔好似迷上左咁， 係咁成日話要去海洋公園。回程時又話聽日再去過。嘩， 仔呀仔， 你知唔知去一次海洋公園， 好大工程架～～～等天氣無咁熱， 你地又大返少少先啦， 好無？！