日式蒸蛋糕

呢大半年， 日日食自家制無添加包包， 食多幾日， 有時又轉下口味， 做下旦糕。不過唔想下下入爐焗。卒之揾到個幾好的食譜， 係蒸的。仲要蒸出黎同山崎個隻迷你蒸旦糕一樣質感， 正。

朱古力味， 仔仔最愛。 內裡其實仲有紅莓架。

自己愛吃的芝麻味。不過仔女唔鐘意芝麻。

 食譜如下：
（每次只係做到四個旦撻咁大的旦糕﹣﹣﹣如圖咁大）
旦 一隻
糖 40G
牛奶 60ML
菜油 1 湯匙
朱古力粉 ／ 芝麻粉 2 茶匙
泡打粉 1茶匙
低粉 100G

做法：
1）反正都係蒸， 我會執材料時， 燒定一鍋水。用黎發旦用， 有助雞旦打發，幫助空氣進入， 咁旦糕會發得軟熟D。
2）執完材料， 煲水都煲熱了(唔駛滾， 有蒸氣就得）。開始發旦， 打發後，我會手拎住發旦碗放在煲上， 利用蒸氣幫助雞旦發大（咁真係見到一隻份量雞旦， 會發到好似人地兩三隻咁多）打發好旦後， 分三次加糖。每次都打發。直至旦漿杰身， 有帶紋路就可以。
3）暖奶慢慢注入再打發， 再加菜油打發（呢個時候可以唔打， 拌勻就得）
4）篩入低粉朱古力粉泡打粉， 並拌勻(呢個時候就唔可以打發， 要伴了， 仲要輕手）
5）粉漿入模， 放進已滾的水， 中火蒸13分鐘。

試過好多次， 13分鐘一熄火拎出， 係最靚仔的。唔會未熟， 又發得最高， 又無倒汗水。好味架。