開心生日會。家中邀客

4 Apr 17 呢日係愛兒 Isaac 開生日會既日子，為隆重其事搞點新意思，媽媽特地係網上訂了三盒卡通饅頭，其中一款係 Isaac 新歡比卡超。不過比卡超造型太貴了，成二百幾蚊得六個，所以，媽媽混訂了其它款式。

襯返個生日CAKE既KITTY。

還有售價最平的BEAR BEAR（都要150定180蚊半打呀）。三款公仔混埋，感覺負擔得舒服一點。

三款造型上枱，好像有點CUTE喔。

呢次生日會，破天荒係屋企搞。成班小朋友黎到，唔知玩乜好，咁岩之前Claire 生日會有剩棉花糖，媽媽索性當係小手工的小玩意。一於齊齊落手為粒棉花糖扮靚。

Claire: 你唔好攞最大個粒喎⋯⋯

Claire: 我整得靚唔靚呀？

原來呢個小環節真係好小囉⋯⋯唔駛十分鐘搞掂⋯⋯大家已經各有成品，仲有些小朋友已經偷食左一粒，整緊第二粒TIM。

Claire: 我覺得我呢粒真係最靚個粒黎

 十分鐘玩完棉花糖，齊齊無野做，好在，媽媽有部夾公仔機，初頭諗住又係一人一硬幣⋯⋯

呢部機真係受歡迎，玩咁耐仲係排長龍既？？

點解⋯⋯點解⋯⋯點解咁快清哂架⋯⋯原來真係唔可以睇少班小學雞。同 K3同學真係爭好遠，呢班小學同學，居然當眾出猫，狂插硬幣口，於是無限復活。難為 Isaac 一心諗住同學仔走左之後，再抽個D剩餘物資架嘛。傷心死 Isaac.

幸好，生日會既歡愉，好快蓋過傷心（應該），我們屋子不大，枱面放滿了生日會美食。當中有 Isaac 指定的 KITTY CAKE 。

因屋環境不大，Isaac 只能選擇性地邀請數位同學黎同佢一齊切蛋糕。

睇佢地影相都咁開心，就知呢班小朋友真係好玩得啦。

大家為 Isaac 唱生日歌時，唔知係咪 Isaac 有些尷尬，所以選擇趴低呢？！（按此）

希望他們都享受這些少少美食吧！

雅雯： 妹妹，好唔好食呀？
Claire: 好食呀，媽媽整架嘛，梗係好食。

 食完野，班細路無啦啦係度玩馬騮。計馬騮，最快手應該係佑其，唔駛三兩秒已經到頂。

Isaac 就唔得啦，身型咁大，唯有屈住上。

妹妹見大家咁興起，又玩埋一份。

為左迎接呢班小學生，媽媽特地拎了一箱益智遊戲出黎，大家居然選了波子棋。

大家都好認真，究竟下一個輪到邊個出棋呢？

玩完波子棋，又玩LEGO。

幾個女孩子，唔比男孩子玩？

卒之，由雅雯媽媽出了個主意，大家各自砌一個成品出黎，由家長投票選。咁唔駛估，當然各自家長都投返自己小朋友作品一票啦。

睇大家家幾咁開心。原來一班聚埋，玩乜都開心。

好友雅雯真係送左 Isaac 想要既BARBIE公仔比佢，真係無得頂。

對妹妹照顧有加既雅雯，甚有姐姐風範。深得妹妹喜愛。

開心時刻好快過，夜晚九點班小朋友走了⋯⋯輪到爸爸應酬妹妹，為呢部夾公仔機加添物品，比兩兄妹玩下。因為，事前我地應允左兩兄妹，留比同學夾哂先比佢地夾⋯⋯邊有諗到部機會比人一晚清倉。

Claire: 好野，輪到我夾LU～～

Claire: 我一陣可唔可以夾多幾次呀～～～～

兩位可愛小朋友

3 Apr 17 呢日同兩兄妹出尖沙咀，路經 I AQUARE 出面咁可愛既復活節裝飾，有個小朋友好可愛咁走埋去，係都要留倩影。

Isaac: 等我扮下兔仔先～～

 回到家中沖洗乾淨⋯⋯咦⋯⋯乜有個小朋友擔哂凳仔嘆糖既？

Claire: 嘻⋯⋯你食唔食呀？好好味架⋯⋯媽咪買黎奬我朗誦之後食。

 邊睇電視邊吃零食，係呢位小妹妹人生一大享受也～～～佢真係咁講架，睇住電視嘆零食。唔知呢個習慣持續落去，長大後的Claire 會唔會變左大肥婆呢？

香港電台全港兒童故事演講比賽2017－－初賽

2 Apr 17 生日會翌日，又要晨早起身，因為Claire幼稚園幫佢報名參加左香港電台舉辦既全港兒童故事演講比賽呀。首次參加，Claire 好似一點著緊都無。爸爸話因為撞正生日會，令佢無乜MOOD 練習，玩了一又，玩散了個心，呢日表演好緊張，變聲都唔明顯了（按此）。明明係屋企練習係好地地的（按此）。

點都好啦，出唔出到線進入決賽，真係靠運，睇呢組有幾多對手⋯⋯咁岩，呢組有一個女孩子講故事同Claire 差不多，咬字仲無Claire 咁正，但人地勝在變聲明顯，一扮喊聲，已經贏Claire 了。唔駛諗⋯⋯最後係個位小女孩進入決賽。香港電台呢個遊戲真係好高難度，全日三組，只會有兩個出線入決賽。所以，有幸參加而又順利講哂成個故事，已經好叻了。

叻叻Claire 四萬咁口，可愛地大合照。希望呢個能成為你成長的寶貴回憶。

Claire 生日會

1 Apr 17 Claire 牛一，等左好耐亦都興奮左好耐，Claire 終於等到呢日了。為左呢個生日會，媽媽特登問人借會所咭，左託右託，終於幫Claire book 左呢間大房，可以一償佢邀請全班同學一齊為佢賀壽既心願。

佈景用左 Claire 最愛的多啦A夢，加埋粉紅色公主的六歲主題。本黎Claire 為左玩遊樂場，唔肯著公主裙架，爸爸話主角一定要著裙，所以，Claire 先迫於無奈著住公主裙出席佢自己的第一個生日會。

Claire：好興奮呀⋯⋯唔知同學們幾點會入黎呢～

爸媽合力佈置的生日會，加埋得力助手哥哥，三個人合力搞掂，好有滿足感喔！

右邊的夾玩具機，特登淘黎比生日會用架。等小朋友入到黎有點世藝。

Claire: 今日係我生日呀～～我超開心呀

為左氹小朋友開心，媽媽今年又照辦煮碗，用棉花糖整左堆糖果，畫埋花。不過今次無哥哥個次生日會咁靚呀～～～不過Claire 都好開心。

媽媽花了好多時間，淘埋多啦A夢蛋糕盤同紙杯仔仲有紙碟TIM。

Claire: 我好想玩呀～～～一陣比同學夾哂我想要既野架⋯⋯

幸好淘了這部夾玩機，原來唔只進場時有人玩，就連大家開餐時，呢條人龍好似未斷過。

興奮左好耐，第一個到場祝賀既係喬喬。

媽媽把成個程序刻意掉轉，就係即場交換禮物。當Claire 接生日禮物時，順手亦奉上小禮物給來賓－－A4文件袋加小玩具。咁做，係唔想臨完生日會時，又要排長龍黎派FILE，好似有點費時失事。

媽媽忙到以為黎齊哂來賓，急急腳就要切蛋糕。因為怕成個流程唔夠時間呀～～

睇住各同學向Claire 唱HAPPY BIRTHDAY，Claire 個樣感動到⋯⋯又要扮無野喎，其實媽媽覺得Claire 係好開心（按此）。

這個生日蛋糕，係Claire 指定的。其實，媽媽好想自己做一個喔⋯⋯不過又要煮哂生日會既食物⋯⋯要再整一個生日蛋糕，媽媽擔心應付不來，最後都係貴貴地去訂個算了。

因為媽媽安排不善，有點蝦碌，最後，再多補一首中文生日歌比Claire （按此）。

數下數，原來這次生日會，都來了這麼多同學仔喔～

大家唱完生日歌，先開始見有些同學遲到，原來他們有發訊息比媽媽架，只係媽媽太忙於打點一切，無留意電話，真係有點不好意思呢～～～

開餐了⋯⋯要食既食，要玩既繼續排隊玩。

食飽飽，媽媽安排了小遊戲一齊玩⋯⋯點知低估左小朋友既噪音，喊破喉嚨都出唔到聲，激死。Claire 當下就企係出面，等大家出黎同佢講生日快樂呀～～～因為，呢個遊戲係以鵝傳鵝。

Claire： 咁耐架～～～仲未有人同我講野既

混亂之中，終於有一組完全讀出了媽媽一早寫定的紙仔，意思都係祝賀Claire 生日快樂的。壽星女負責分發奬品。

之後，再黎一個高潮遊戲，就係由哥哥拋糖果，接到的小朋友，就可以去到波波池蒙眼摷小禮物。真係又緊張又刺激。媽媽只知大家搶著接糖一刻，各小朋友已經好投入⋯⋯可惜最後沒有人拍到這刻的照片喔。

摷到小禮物，拿開眼罩，臉上都掛上驚喜。

幾經辛苦（媽媽），Claire 正式的首個生日會，終於完成了。Claire 終於可以去放電。

看他們兩個，開完生日會，食飽飽仲可以繼續玩，幾咁醒神⋯⋯

大型生日會，真係一次就夠，實在忙的很累（精神上的）。不過，若日後兩兄妹都要開的話，媽媽應該都會繼續奉陪既⋯⋯