濟州之旅DAY 1 （下）－－濟州大學賞櫻

9 Apr 17 係酒店瞓左一覺叉滿電後，我地就去拎車出發去濟州大學⋯⋯賞櫻。 呢次係媽媽咁好彩遇到滿街櫻花呀。次次去旅行諗住賞花，次次都遇著凋謝期。所以呢次真係大開眼界。

Isaac: YEAH～～我咁細個就可以睇到滿街櫻花。

濟州人都開哂車黎呢度賞櫻，搞到揾個位泊車都難。我地學地道人咁，求其泊埋路邊就落車街了。沿途擺滿小販攤檔，可以邊行邊食。早知唔駛係東門個邊食飯啦。

Isaac: 我一見到就想食呢個呀～～～好得意呀⋯⋯

支棉花糖又真係幾得意既⋯⋯但估唔到 Isaac 咁大，仲鐘意呢D小朋友食物，哈哈哈。

呢檔鐡板炒年糕勁多韓國人幫襯。不過我地唔係買年糕食⋯⋯

而係買炒肉食呀⋯⋯都真係幾香噴噴。不過媽媽已經係東門食飽左，呢D真係食唔落了。

沿途勁多櫻花，仲忽然襯埋粉紅色燈籠。好靚呀⋯⋯可惜人太多了。

最掃興既，係仲有毛毛雨TIM呀⋯⋯好在我地有帶雨褸。著住雨褸，都無損呢位小妹妹燦爛既笑容，天真漫爛，好可愛呀。究竟食雪開心D，定係玩櫻花開心D呢？

兩兄妹，有時都幾可愛。

媽媽都陪佢地一齊癲。頭戴櫻花，真係笑死人。

滿路都係車，想揾個位泊車都幾難。

我地最後無入到大學範圍，因為眼見好似無乜特別節目，而且出面條街都好多櫻花了。又有雨，時間又晏，所以，最後折返拎車。途中，見到呢個橙形車，好得意，順道買左兩杯果汁。

Isaac: 好野⋯⋯又有得食⋯⋯

 渣返車出舊濟州，都差唔多又要醫肚食飯了。第一天，我地索性選擇係酒店附近的東門巿場行下食下。行行下，見呢間人頭湧湧，勁排長龍⋯⋯我地又排下先。

原來係排呢個蟹蓋。

爸爸順便買了一大串炸海鮮⋯⋯論味道⋯⋯媽媽唔識欣賞，諗唔明點解咁多韓國人排既呢！

之後，走入魚巿場，無乜選擇之下，點了四隻鮮鮑魚⋯⋯好爽喔～～不過都唔及係日本鳥羽食既咁鮮美。

細既魚生壽司。食唔到特別好味，嘻嘻⋯⋯

全餐最好味，係呢個蒸蛋。哥哥最愛吃，食完仲想ENCORE TIM。

外觀麻麻既鮑魚粥⋯⋯

就係咁，我地第一天既晚餐，都係麻麻地裡噹過。第一天，都係快點求其食，然後去休息，繼續之後既旅程吧。