13 Apr 17 下午我地出發去ECOLAND。坐著小火車開行，第一站一落車，感覺係好似去左濕地公園咁⋯⋯
初初感覺係⋯⋯唔係呀嘛，乜又係咁呀。乜濟州各大景點都咁大自然無乜特別⋯⋯
原來，沿著橋走，去到盡頭，會有野玩架⋯⋯終於，兩兄妹終於無咁悶了。
 |
| 爸爸：喂，見唔見到我呀～～～ |
兩兄妹嚷著要玩，一隻船只限兩人⋯⋯迫住媽媽都要落埋去玩，不知幾咁驚反艇。
媽媽顧著專心地踩，都唔敢分心同婆婆打招呼。
婆婆終於識用相機，ZOOM近影了。
終於玩完個親子艇。可以抖返啖氣了。
 |
| Claire: 但我想玩多幾次呀～ |
時間關係，我地又要坐小火車去第二站。因為媽媽知道第二站有小童公園。但有幾好玩呢？？網上好少資料⋯⋯為免到時又話唔夠喉，不如早少少去第二站好過。
一落車，有個人仔係咁問： 公園呢？？離遠望見到就跑去了⋯⋯
原來呢個公園好BB架咋⋯⋯小學生其實麻麻地岩。
 |
| Claire: 好彩我仲未升小學姐。 |
 |
| Claire: 我都似巨人啦。睇下我仲高過度門呀。 |
Isaac 難得揾到少少野岩玩，兩兄妹又黎爭過。
 |
| Isaac: 媽咪呀，我上先架。阿妹又要迫埋黎⋯⋯ |
綜觀呢個站係另一種風味，好令人RELAX 反老還童的童話區咁。連小食亭都係一卡火車黎。
無無聊聊，媽媽獨自去買杯綠茶雪糕試下先。睇下濟州的綠茶雪糕係咪咁正。結果係⋯⋯不是我杯茶。
有個小朋友離遠望到媽媽手上的雪糕，有咁既反應⋯⋯
 |
| Isaac: 我又食呀⋯⋯ |
哦，原來等小火車時，兩個無聊地玩起上黎。
 |
| Claire: 哥，你睇下我⋯⋯ |
 |
| Claire: 唏⋯⋯幾勁。 |
第三個站原來無野睇⋯⋯建議可以多花時間係第一個站同第二個站到。
落左站，我地見無乜野行，真係揾路標指示揾野去行下⋯⋯幸好路經這個小玩意，比兩兄妹可以玩下。
 |
| Isaac: 阿婆，你係咪打水比我架⋯⋯仲未有水出既？ 婆婆： 我影緊相呀！ |
 |
| 婆婆： 有水出未呀？ |
 |
| Claire: 等我又試下先。 |
第三個站真係好簡單，係有呢幾個打水器，同埋幾張吊椅。裡面有間無人既餐廳。
要揾野行，就只有家庭遠足路一大段。可能我地四月去，全條路無乜野睇，真係得個行字⋯⋯唯獨這個昆蟲酒店最特別。媽媽第一次見識有地方用昆蟲酒店黎形容昆蟲住的地方⋯⋯同埋，佢地好有心咁刻意搭間屋比D昆蟲住。
捱過悶悶的一大段遠足路，終於可以坐火車走LU⋯⋯甩難。
最後一站⋯⋯一樣無野睇。不過好過第三個站。至少一落車，有兩隻巨兔迎接你。
我地覺得無咁悶既原因係，有間似樣既雪糕食等緊我地。叫做有地方可以坐下。
店外還種著一盤盤鬱金香。
各種雪糕口味，悉隨尊便。
終於我地都叫做去過濟州名景點ECOLAND⋯⋯悶悶地，可能四月無乜靚風景。感覺係可黎可唔黎。ANYWAY，其實成個濟州好多景點都係咁。
黎到濟州，都叫做韓國地方，無理由唔食炸雞。自從上次係首爾食過橋村後，念念不忘。呢次旅行，揾左好多晚，呢日終於揾到間橋村係有開。特登揸車黎食橋村既蜜糖炸雞。婆婆和愛兒都讚佢好食呀，皮脆肉滑。
我地真係純粹黎食佢既炸雞。食完後，就正式再揾地方食晚飯。
媽媽係網上揾到間評價唔錯既食店。叫三代湯麵會館，電話：064-722-3366. 晚上要揾，真係唔細心都會走漏眼，因為周圍都好靜，佢門面又不顯眼。入到去，先知佢門口貼住係獲奬餐廳。
一盤紫菜任加⋯⋯望落好吸引。
又係時候看圖點菜。
碟豬手好似大碟左少少⋯⋯餃子又好似大碟左少少⋯⋯樣樣都好大份。
好似好出名既豬肉湯麵。其實濟州美食之一，係豬肉湯麵，因為佢地既黑毛豬好出名架。
岩岩先係橋村食飽左炸雞，而家又點咁多樣，真係個個食到捧住個肚走。返到酒店，不忘吃個濟州羅漢拿橘。可能我地唔識㨂，婆婆同媽媽同妹妹，都覺得羅漢拿橘都唔及濟州另一種普通橘好食喔。
沒有留言:
張貼留言