喊驚 @ 龍騰

30 Oct 10 去完大三巴到此一遊後, 我地好辛苦至揾到架的士, 去氹仔睇龍騰. 原來龍騰唔駛等好耐架咋, 早知係咁, 就臨走個日至去啦, 反正臨走個日都會再黎新濠天地.

五點半去到新濠天地, 龍騰每半個鐘一場, 我地都可以拎到六點場既入場票. 噓, 睇完又要走返出氹仔, 嘥哂 ---- 其實可以係氹仔食埋晚飯, 但阿仔又未沖涼又無乜點正式瞓過, 已經疲態盡現, 最快方法, 都係出返酒店附近食晚飯. 所以呢場免費既龍騰, 其實係要錢既, 就係來回的士錢, 仲有, 爸爸最後用左160大洋買左張龍騰家庭照, 所以呢場免費龍騰其實唔係免費.

未入場時, 阿仔比呢個超級大龍珠吸引左, 因為又有波又有水, 岩哂佢個範

龍騰一開場, 都無乜野, 點知無耐有隻老虎出黎, 環繞成場咁咆哮, 加上環迴立體聲, Isaac 嚇到喊左出黎. 其實唔知係眼瞓過龍喊吖, 定嘈得滯喊, 因為環迴立體聲真係幾嘈下, 對於一個細路黎講.

廿分鐘既龍騰, 阿仔應該伏左係阿媽膊頭放棄睇龍騰有 17 分鐘. 但當環迴立體聲一停(即完場無哂聲時), 阿仔唔駛半秒, 已經由阿媽膊頭彈起身, 再係咁拍手, 好搞笑. 爸爸媽媽即打眼色, 做乜阿仔咁醒目既咩下.

爸爸話阿仔拍手係示意, 好野, 走得.

Isaac經過呢一役, 之後佢見到老虎獅子物體, 都會學龍騰睇到呢隻老虎咁咆哮.

係新濠天地等的士又要時間, 臨走個日, 比媽媽發現, 最快方法唔好係新濠天地門口等的士, 而係行去hard rock 酒店門口, 係打尖攔截哂新濠天地既的士最快方法.

晚飯去左酒店附近個間皇朝既葡萄園餐廳食飯, 上到去至知原來好高級, 好在職員無岐視我地帶埋小朋友姐

Isaac 第一次食燭光晚餐

Isaac: 我又攰又肚餓, 成日得半份三文治同朝早支奶落肚, 又眼瞓, 阿媽你仲有心機影相..............                   爸爸: 係囉, 我都好眼瞓, 做乜你仲咁好精神

左邊係爸爸既牛尾湯, 右邊係媽媽既蘭度豆湯, 但點解係橙色既蕃茄湯咁既呢, 真係唔知了. 仲有爸爸點既蜜瓜火腿冷盤, Cova好食好多呀, 呢碟野一 d 味都無 (包括蜜瓜同火腿都無味)

好好味既葡式乳豬炒飯. 一向唔好乳豬既媽媽, 食左一啖都同爸爸說好味........可能係皮唔油唔膩掛, 總之係香口啦. 配埋佢個炒飯, 好正.

飯後甜品有木糠布甸, 好好食, 阿仔可能太攰, 呢次無同媽媽極速爭食, 呵呵.

有少少酒既芝士餅, 留返爸爸一人獨享算.

呢餐晚飯好貴, 四百蚊......貴係因為唔知食左乜落肚 ~_~