Isaac玩轉蘭桂坊酒店 @ 澳門

30 Oct 10 爸爸見媽媽想揾地方不停食下野, 所以話請媽媽同Isaac去澳門, 順便住返晚. 呢晚Isaac就開心囉, 兩日澳門之行, 最開心係响間房玩.

我地中午到左澳門蘭桂坊酒店, 以為無得上房, 諗住先放低行李先啦, 殊不知可以有房, 媽媽多口問句有無得upgrade, 又有喎. 我地upgrade左去套房.

一開房門, Isaac唔敢入去, 因為要佢行第一嘛, 媽媽爸爸入左去, 阿仔即變樣, 爸爸媽媽都唔望, 顧住周圍玩. 基本上間房除左地毯, 凳同埋窗簾外, 房間內任何東西都不停比Isaac 當玩具

Isaac: 咦, 拎走個收音機既remote先

呢間房好特別架, 就係房既位置, 右邊有隔簾望到浴缸. 阿仔成晚就係咁揭開呢個基本上唔揭都裝到入去既簾, 係咁叫爸爸媽媽.....當爸爸或媽媽沖涼時, 阿仔的節目就係咁, 幾咁忙呢.

床既左邊位, 又有一度隔簾, 係正床頭. 基本上又係唔揭開都裝到入面洗手間洗面刷牙. 阿仔每次聽到我地洗手, 就會爬上床頭, 揭開度簾, 大叫爸爸或媽媽, 跟住又踎低, 係到玩僕厘厘咁. 然後自己係度大笑, 阿仔咁都玩得好開心, 基本上邊度都唔駛去.

  阿仔忙緊搞床頭部收音機連ipod iphone叉電器. 呢間酒店好hi tech, 唔可以睇少佢三星級, 但媽媽好鐘意佢夠新淨之餘, 仲有好多先進設施. 至少有部收音機連iphone叉電器先, 仲有, 窗台附近仲有個各式電話都岩用的幾十條叉電器, 真係夠哂體貼.

仲有呢台迷你咖啡機. 媽媽大肚唔飲得, 唯有貪玩沖杯比爸爸飲.

Isaac: 等我打個電話返香港揾婆婆先

 呢部無線電話, 媽媽臨走都唔係好明, 做乜打親去front desk要用speaker, 唔用得聽筒囉. 個聽筒好似淨係for打電話用咁.

阿仔乜都玩, 連水喉都自己開黎玩. 無佢符.

 Isaac: 等我試下水温熱唔熱先

唔知真定假, 呢間蘭桂坊仲提供埋bvlgari沖涼用品. 媽媽呢晚就諗, 究竟真定假呢.....唔怪得三星級酒店收五星級價錢啦. 咁點解佢明明咁靚又係三星唔係五星呢, 真係唔明了.

夜晚, 出面黑哂, 終於見到牆上面有兩朶玫瑰, 不過太高, 阿仔玩唔到.

呢晚阿仔玩到成十點都仲好high, 要爸爸熄哂燈, 阿仔至肯收恰心情瞓覺.

但翌朝, 又玩過

呢度明明係好重既全鏡門黎

Isaac: 我唏....

  阿仔唔止玩全房既櫃門, 連呢度咁重既大鏡門都唔放過, 又開又關, 不知幾開心, 笑到卡卡聲.

阿仔呢朝玩到唔願走, 賴係張床到. 要爸爸出動到拖喼, 阿仔至肯落床離開呢間房.

Isaac: 等我睇下本書, 附近有乜好食先

酒店lobby一隅.

下次再黎澳門, 媽媽會再住返呢間囉, 一黎價錢同澳門有些五星級價錢差唔多, 但地點就腳d. 但呢度房間好似設施體貼d, 仲要朝早有埋送報紙服務, 係媽媽住過既酒店, 印象很好的其中一間黎.