BB要瞓喇

9 May 13 Isaac 雖然係男仔, 不過都會鐘意同阿妹一齊玩公仔架. 好似呢日咁, 忽然拎住阿妹個公仔, 話BB要瞓覺.

Isaac: 好喇, BB要瞓啦.



Isaac: 要幫佢冚被架.

Isaac: 好喇, 乖乖地瞓囉喎.

當佢玩緊公仔時, 媽媽就會覺得佢好可愛同好乖, 因為一副照顧人既大哥哥性格出哂黎.

港式肉燥 （附已調節食譜）

之前請過鐘點， 整過肉燥飯比我地食， 阿仔個時超鐘意， 自始愛上食冬菇。個時聽到鐘點話識整肉燥飯， 覺得好厲害呀。但佢就話好簡單架咋～～～～

而家唔駛返工， 多左時間去諗下整乜， 原來肉燥飯真係好簡單架。整多左， 留左成碗肉翌日食， 阿仔拎哂黎撈飯， 個餐飯就食得快囉， 連當晚有佢至愛既蕃茄炒旦都唔吼。媽媽跟住諗， 唔通日日都要整黎比佢送飯食？？！！

上網睇， 肉燥都係半肥瘦， 又加酒。唔係好岩我地。所以， 媽媽就改左少少， 變左做港式肉燥， 好似我地出街食個D咁。

材料：
紅䓤頭 （似洋䓤不過係紫紅色外皮） 半個 （切碎）
蒜頭    一辨 （切碎）
瘦肉  我無量幾重， 好似平時買餸咁自己因， 我煮左份量有十元
冬菇    浸軟兩隻再切碎
生抽    半杯
老抽    適量 （只係上色用）
片糖    大半片
水        一杯半 （我用埋浸冬菇既水， 貪佢有少少香味，唔好嘥）

先炒香紅䓤頭， 蒜頭。再放瘦肉一切炒熟。下冬菇碎， 生抽， 老抽及水， 一同煮滾。呢個時候要試下味， 至落片糖 （其實片糖都要下， 不過如果太咸， 可以加多少少片糖）冰糖片糖作用， 令肉煮耐D都無咁硬。

我就落左近一片， 覺得略甜， 所以， 我建議下次可以只下大半片 （如材料所寫）

蓋上忟煮約廿分鐘， 需要時需略攪動， 免焦底。
話咁快， 香噴噴的肉燥飯上枱了。迎合自己同仔仔口味， 仲特登整埋溏心旦（九唔搭八， 台灣肉燥飯係配卤旦， 不過我地鐘意食旦汁， 所以改佢做溏心旦）

原來肉澡飯真係好易整架咋， 仲無街食咁肥（出去食， 肥肉多過瘦肉）。以後阿仔話想食， 隨時可以整到。最好就係， 紅䓤頭雖然好大味， 但煮左之後， 一家人食， 唔食洋葱的仔仔和爸爸， 都食唔出有洋葱， 幾咁好。不知不覺食左有益的洋葱了。


溏心旦食譜按此

臭脾氣實錄

Claire 脾氣同哥哥好唔同， Claire 係正宗小姐脾氣， 郁D就大聲喊嗲人呵呵（當比人蝦個時）， 想借D 意要大人鬧對方， 幾古惑。一係呢， 就係唔如意時， 就發哂小姐脾氣， 媽媽係手機揾返呢條片， 可以想像， 日後Claire 會點對兩老， 又或者佢未來男友。真係不敢想像。

鮮奶燉旦白 / 黑糖燉鮮奶 / 鮮奶燉旦黃

一直很喜歡食牛奶公司既鮮奶燉蛋, 呢輪整旦糕面包, 剩返既旦白旦黃, 除左煮餸食埋外, 仲諗到整燉鮮奶, 反正阿仔唔肯飲奶, 拎黎燉旦, 變相小朋友吸收多左奶, 好似好過索性唔飲吖嘛.

原來燉鮮奶好簡單, 比例係每隻旦白, 或每隻旦黃, 用100-110ML 奶發埋隔水蒸十分鐘就得.

材料:
鮮奶 110ML
旦白 一隻
糖   三茶匙 (太少無乜味, 三茶匙岩岩好)

打好後, 隔篩落碗 (唔隔都得, 不過隔左真係滑好多架), 筆走泡泡, 封好碗面後, 水滾後落鑊, 蒸十分鐘, 再焗一分鐘. 拎出黎時, 個面好似浪下浪下未熟咁, 但其實已經熟架啦, 仲好滑TIM.

我試過, 以為浪下浪下未熟, 再蒸, 搞到老哂就唔好食.

滑溜溜的鮮奶燉旦白.

轉用黑糖, 就變左傳說中的黑糖燉奶. 睇下, 好滑, 仲滑過豆腐花. 又唔會好似街買咁甜. 好正.

至於鮮奶燉旦黃. 做法一樣, 不過就落少D奶

材料:
每隻旦黃同奶比例, 大約60-70ML奶. 加兩至三茶匙糖. 做法同以上燉旦白一樣.
燉出黎, 又係好滑架.

 

開車車

阿妹最興學哥哥, 其中一樣, 就係開車. 有模有樣架. 當然, 哥哥梗係又學爸爸架啦.

Claire: 我開車車先, 要入匙架

嘩, 成條匙真係插住黎開車架喎

Claire: 要"吞"返架車出黎先可以出發架.

Claire: 我可以出發LU, LET'S GO.

成日都學哥哥玩車車, 媽媽真係無眼睇, 唔知佢大個會變成點既女仔了.

我其實係好哥哥黎

Isaac 自小就好有英雄本色， 好鐘意照顧人。而家有妹妹，梗係成日照住佢啦。

呢日出街， 媽媽忽然見到阿哥趴左係地， 同妹妹著襪， 真係有板有眼架喎

 Isaac： 嗱， 咁樣著

 Isaac: 跟住拉上去。咁就著到架啦。

 媽媽跟住叫 Isaac 影相， 點知又唔知佢望左去邊， 真係吖。

我愛爸爸

17 Apr 13 呢日, 哥哥煮左餐早餐比媽媽呀, 你睇, 幾咁豐富.


16 May 13 呢日, 本來媽媽打算同哥哥去PLAYHOUSE, 點知食飯食到慢一慢, 仲發悔氣話唔去PLAYHOUSE玩喎. 加上大雨, 所以索性留係屋企. 見咁熱, 又悶悶地, 帶兩兄妹落去食個雪糕先, 睇下, 哥哥自己筆得幾咁靚. 選料十足.

Isaac: 你影比爸爸睇, 佢咪好唔開心囉. 佢無得食.




19 May 13 呢日爸爸都要返工應酬. 哥哥話要影相比爸爸睇喎.

 呢碟係泥膠香蕉船, 其實係整比媽媽食. 

臨瞓, 畫左隻貓, 又話要比爸爸睇, 仲不停擺pose, 得呢張見到全樣同幅畫.

 哥哥感情一向比妹妹內歛, 好少直接講自己感受. 但哥哥成日提住要影相仲要send比爸爸睇, 可想而之, 哥哥係幾咁掛住同愛爸爸架.

 

 

繼續臭脾氣

27 Apr 13 而家電腦真係發達, 呢兩張相都唔記得係手機到幾時影落. 但一放上電腦, 就睇到.

阿妹Claire 脾氣真係臭, 越大越臭. 不過有一樣, 就係同佢BB時一樣不變, 就係瞓地示烕. 睇下, 幾咁樣衰.




睇返14個月大既Claire

16 個月既時候. 一模一樣瞓地發脾氣.  估唔到16個月大既阿妹, 大脾仔都幾有肉架喎......雖然瘦不過係佢暫時人生中, 叫做最有肉既時刻黎架啦.

而家, 24個月既Claire, 瞓地進步左~~~就係, 識擰轉面發哂脾氣咁鬧你: 唔準影我 唉, 都唔知學邊個既. D 脾氣真係成個公主咁, 大個點算呀

芒果果醬 （附已調節食諎）

呢輪經開街巿， 見到芒果真係好靚， 可惜兩父子成日病， 一係阿仔長期都咳。所以要忍手。咦，呢個星期， 阿仔好似無咳了， 卒之可以買芒果食下。第一舊芒果， 係阿仔食左， 十隻手指拎住黎吮， 不知幾咁開心， 可惜忘記影相。

夏天好多生果特價好平， 屋企唔少存貨， 本來有諗過把再早買落的提子做醬， 但要去皮好煩喎。索性用芒果做醬， 出乎意料之外，好香呀， 好好味。

我自己做果醬， 好少跟網上食譜的， 因為怕肥， 又唔想落太多糖， 對小朋友無咁健康。

加上， 自家果醬， 梗係要有果肉至有滿足感嘛， 所以， 芒果肉我求其起肉， 無刻意切到好細（切得細， 下煲煮後， 會唔見哂的， 因為溶哂）

材料：
芒果兩個 （我起左肉磅， 有為210G）
糖  60G
檸汁 半個

芒果本身都好多水同埋好甜下， 所以我無刻意用糖撈埋放雪櫃幾個鐘
先放糖同芒果肉一齊中火煮滾， 滾後調返細火， 煮左十分鐘， 就杰杰地。呢個時候放埋檸汁入去煮， 邊煮邊試味。唔夠甜就加糖， 因為每個芒果甜度不一的， 所以試味好緊要。跟住繼續要不停攪動以免痴底。煮到好杰好杰， 無哂水份咁滯， 同埋你會見到芒果肉開始無乜， 水份都無乜時， 就為之OK的果醬。我兩個芒果， 煮左約廿分鐘。我係用匙黎煮， 所以， 要CHECK果醬杰既程度， 只係筆一匙再側個匙， 睇佢流落既程度係咪好水， 就知果醬係咪已經成形。當果醬係匙到好慢咁滴落，就係可以熄火了。

果醬變杰後， 倒扣入焗爐低火焗佢十分鐘， 當作最後消毒過程 （入樽前都要消毒樽架）兩個芒果煮出黎得半樽。份量剛夠我地食幾日。

翌日比仔仔早餐搽埋自家製既包包食。咁為之百分百自家製早餐嗎？

老老實實， 我對果醬無乜興趣， 因為怕肥。覺得唔健康。但呢個芒果果醬， 煮左出黎， 真係好香， 好好味， 食落好似食緊超香既芒果乾個種香味。阿仔食左兩片包， 仲要話搽多塊。就知呢個芒果醬幾咁好食。

西瓜雪葩??

其實我都分唔清沙冰同雪葩既分別. 只係知道, 上網CHECK 雪葩食譜時, 居然有食譜係就咁雪硬生果打碎, 為之雪葩.

正宗雪葩做法又複雜, 所以, 都係取簡單算.

就係把一碗西瓜粒放冰箱雪硬, 我連埋攪伴器同所有會用到既器皿一切冰雪佢, 因為打碎生果時, 實好快溶, 所以索性所有野都冰一冰.

之後, 一碗西瓜粒加小小牛奶放入攪伴機攪碎, 就變左下邊咁款.
其實係西瓜雪葩定沙冰呢.

男仔去沙灘玩法

勞動節無節目, 又唔係太熱. 我地一早起身, 食完早餐就執哂工具去沙灘開工.

男仔真係男仔, 平時除左比媽媽發現佢特登拆爛玩具, 研究裡邊係乜外, 原來去沙灘, 都係鐘意渣車.




扮哂鏟泥車不特止, 仲要潑沙TIM

Isaac: 媽咪, 你睇我筆左幾多沙.

玩車玩到搞到沙都有車痕.

Isaac 係一個好哥哥黎, 睇下, 去到海邊, 都踎低同妹妹講野, 真係乖. 如果兩兄妹大個左, 仲係咁好感情就好了.

紅棗千層糕 (附食譜做法)

自從去酒樓食過紅棗糕, 就愛上了. 不過呢兩年, 酒樓食既紅棗糕質素越來越下降. 見阿仔又鐘意食, 呢個廿四孝阿媽就應允過佢, 媽媽揾日整比佢食. 講過就係架, 之後真係身水身汗走去材料鋪做姑厘, 抬粘米粉木薯粉等等.

其實上網摷左好耐, 都揾唔到紅棗千層糕既份量. 最後, 都係用左個紅棗糕同椰汁千層糕既混合版黎整算. 當然, 好在有大少奶BLOG有整過紅棗糕. 所以, 份量都係主要參考大少奶, 不過, 我既份量有加油, 等D 糕滑身D.

材料:
去核紅棗 我用左 175G
水  600G
油  5G
棗味片糖  按個人喜好調. 不過我發覺我落哂成包, 都唔係好甜 (千層糕部份, 可能我白漿無落糖)
木薯粉 300G
粘米粉 4G

1) 開邊去核紅棗略浸一會, 用少許滾水下紅棗, 水再滾後保持蓋合上, 焗十分鐘左右.

2) 紅棗軟身後, 入攪伴機, 再加兩湯匙熱水 (我用返煲紅棗的水)打爛紅棗, 目的在於第三步驟

3) 紅棗蓉隔渣.

功夫有限, 175G去核紅棗, 隔完得咁少. 下次都係比工人姐姐隔可能會好D. 佢大力D嘛.


4) 紅棗漿加水, 加棗味片糖去煮. 記得試味, 調到岩自己想食個種甜味再多兩三成左右. 因為溝左粉後, 甜味會減左架. 糖溶後即熄火, 否則紅棗水會蒸發左, 變相少左溝粉

5) 紅棗水放涼時, 同時混合好粉. 待紅棗水完全涼後, 伴入粉攪至無粒. 完全伴勻後, 過篩. 過完篩, 加油伴勻

6) 開鑊煲水, 預備糕盆, 面薄塗油, 水滾後, 可落粉漿蒸 30 - 40分鐘.


千層糕做法如下:

以上第五步驟後, 再調白漿.

木薯粉 120G (我用左100G 所以最後第八層唔夠漿, 搞到唔見左第八層咁. 無計, 因為包粉得400G, 用左300蒸原味, 淨返得100G咋)
粘米粉 20G
冰糖  適量
水   200G

1) 水加冰糖先煮溶, 然後落粉伴勻.

2) 水滾後, 糕盆搽油, 先下紅棗漿(效果會靚D), 約五分鐘後, 下白漿. 如是者重覆直至第九層. 每次下漿前, 必須重新攪勻粉漿, 因為粉漿會沈, 如果唔再攪就落鑊, 咁只係筆左面頭個層水咋.

3) 去到最後一層, 蒸30 - 40 分鐘
 消失了的第八層白漿??

 以上材枓, 係多左紅棗漿出黎的 (其實唔做白漿, 全部紅棗漿做九層, 用返以上材料係足夠的), 整完梅花隔竹的千曾糕, 見仲有漿剩, 淨埋淨紅棗糕. 不過呢次懶, 因為夜了, 所以無分層又無隔篩 (我之前整千層糕, 落鑊前都再篩一次, 即共兩次), 所以, 圖中可見, 無篩兩次同篩左兩次既分別 (純紅棗糕見到渣狀)

第二日雪凍左既糕, 原來係易切好多架, 下次都係整完由佢放雪櫃, 至切黎食.

睇下, 幾靚仔.

 

朱古力雪芳蛋糕 (附食譜)

呢排天氣成日落雨, 都係放棄造曲奇, 但做包呢, 又要搓粉又撻粉, 真係無咁好耐性. 所以, 又改返去做蛋糕.

之前做過一次雲石雪芳蛋糕, 效果唔滿意, 因為無乜花紋咁. 呢次, 索性簡簡單單, 做個阿仔指明既朱古力蛋糕算.

材料 (六寸中空模):

低粉 70G
雞蛋 3隻 (旦白旦黃要分開)
砂糖 30G X2 份
泡打粉 1茶匙
菜油 40G
牛奶 60G
朱古力粉 20G

做法:
1) 旦黃打至起泡, 其中一份砂糖分三次倒入旦黃打發至淺黃近奶白色.
2) 茶油座至少許温, 分三次倒入已打發之旦黃漿. 每次都要再打發, 以求完全混合
3) 逐少加入牛奶, 我都係分三次倒入, 邊倒邊打發.
4) 低粉和朱古力粉加泡打粉過篩兩次後, 分兩次倒入旦黃漿中. 用FOLD IN切伴 形式拌勻
5) 旦白打至起泡 (打到VOLUMNE 兩倍發, 泡密為止), 至落1/3 糖. 再打至泡變為細密, 接近無泡, 加第二次糖. 呢次加糖, 會開始見到好似忌廉旦糕個D忌廉咁款的. 就加第三次糖. 繼續打. 打旦白, 必須邊打邊轉動盆, 以達完全打發為止. 同時, 邊轉動盆, 都可以檢查到旦白是否變成硬性發泡. (濕性發泡似忌廉旦糕面個D 唧出黎的軟身狀). 硬性發泡, 就係倒轉個盆, 裡面的旦白完全不倒下, 發旦器起勾角. 如下圖 (盆是放直拍照)



見到旦白唔跌或唔會係個盆轉動, 為之OK架啦. 要停手, 否則過度打發, 旦白會起粒, 做唔到旦糕的.

6) 把1/3旦白放入面糊中, 沿盆邊開始, 好似摺衫咁, 向內 (盆中央)FOLD IN, 再隨意係中間打十字. 再FOLD IN, 不停做呢兩個動作, 令旦白完全混合至面糊.

7) 呢個係關鍵, 通常網上寫跟住放埋旦白入面糊的. 但新手黎講, 呢個STEP好易失敗, 倒入去時, 消哂旦白泡沬. 所以, 我就改為, 放面糊 (即STEP 6)入餘下旦白到, 又係用FOLD IN 打十字咁切伴混合.

8) 入爐以 170 度焗 35分鐘.

係鬆軟, 不過對於食慣 75% -80% 朱古力的我和姨姨來說, 好像欠了朱古力味. 但婆婆和仔仔就話好味. 可能佢地食開普通朱古力啦. 我初初有諗過, 係咪朱古力粉要買返75%的, 後黎, 我又走去幫襯開的旦糕材料店問, 原來朱古力粉係無75%架, 至多至多得30左右, 一般粉得廿幾%. 即朱古力味淡薄啦. 旦糕材料店老闆話, 整旦糕既朱古力係取色架咋, 要好濃好似 75% 咁味的, 不如去整朱古力或者其它甜品

 基於咁, 如果朱古力FANS想食濃味朱古力旦糕, 我又諗到, 其實可以橫切旦糕, 薄搽一層朱古力醬, 又或者朱古力忌廉. 再唔係, 可以諗下加一兩滴冧酒入去整旦糕. 因為冧酒可以帶出朱古力味的. 不過, 為左小朋友, 我就唔想放酒了.

 

溏心蛋 (附食譜做法)

自從識整温泉蛋後, 其實一直都想整溏心蛋. 自從N 年前係拉面店食過半粒後, 念念不忘. 但今時今日, 好難再食到蛋黃會浪下浪下既溏心蛋了. 所以, 就的起心肝睇下點整.

原來好易架咋, 至緊要摸熟自己個爐既脾氣.

好似平時烚蛋咁. 媽媽平時烚蛋, 十分鐘熄火, 蛋黃係剛剛熟, 呢個可以比大家做參考, 因應自己個煲同爐去調教.

整溏心蛋, 最緊要係汁. 所以, 特登去吉吉島買左兩支野, 一支係日本豉油, 另一支係味淋 (即係日本米酒, 有少少甜).

以我經驗, 坊間既指引: 1/4杯味淋, 1/4杯日本豉油加3/4杯水, 我發覺呢個份量, 其實可以浸到成六隻旦. 所以, 每次我都只取其比例. 就係1:3 (醬油同水, 另加糖適量~~)

做法:



醬汁:
日本豉油1/4杯
味淋 1/4杯
糖 適量
水 3/4 杯

先煮滾醬汁, 必須調味, 免得醬汁太咸. 按自己口味加糖, 直到醬汁係自己想食既溏心蛋味道為止. 滾後攤涼 (好重要, 免得放旦入去時, 浸熟蛋黃)

平時自己烚蛋用十分鐘岩岩熟, 係蓋上煲蓋. 所以, 整溏心蛋時, 我就唔會蓋煲蓋, 一樣煲佢十分鐘就馬上熄火撈上凍水到浸 (目的係易令蛋殼同蛋白分離, 容易剝殼)

當醬汁涼哂後, 可以放已剝殼的雞蛋入去浸 (放雪櫃), 到第四至第五天, 會最入味同埋最上色的.

五一玩水日

1 May 13 五一勞動節, 又係父母勞動日. 呢日爸爸一起身, 就陪我地三母子女, 一齊去屋企附近既沙灘玩, 真係好了.

對於沙, Claire一點都唔陌生, 因為最近去南丫島同長州, 兩兄妹見到沙灘, 不知幾咁開心, 仲死賴唔肯走. 呢日我地專程帶埋玩具黎, 兩兄妹真係玩到不知時日過.
一去到, Claire 就催媽媽拎玩具出黎筆沙玩. 忘哂我.

Claire: 等我用鐵沙掌, 畫個圖先

Claire: 爸爸去左邊呀~~~我鐘意爸爸架嘛

廿四孝偉大爸爸, 一個人走左去攞水, 真係唔話得. 

  Claire: 爸爸, 你下次唔好一個人走開啦, 知唔知呀.   爸爸: 哦...好啦.

原來拎水砌城堡. 呢下媽媽真係要學野, 原來要溝水至會實架喎.

玩到投入忘我的兩兄妹.

Claire: 等我學爸爸筆水先

Claire: 我倒~~~~  (係咁倒落地, 無眼睇)

Claire: 爸爸呢~~~ (都話女痴老豆, 呢輪成日揾爸爸, 一唔見左爸爸, 就同媽媽講, 我鐘意爸爸架, 冧死老豆)

落沙灘, 梗係要玩下水. Claire 太細粒, 雖然唔係太怕水, 但太多浪, 都要捉實佢, 免得沖跌就嚇親.

 睇下, 有水浸住妹妹對腳架.

Claire: 爸爸, 點解d浪走哂既......



呢次係沙灘玩左兩個鐘, 走既時候, 兩兄妹都依依不捨. 但爸媽就繼續開始繁忙的阿四, 又要沖水又要沖玩具仲要返屋企同佢兩個沖身. 所以去一陣沙灘, 事後功夫唔簡單.