環保慳家之自製肉鬆

有次無無聊聊上網， 無意中見到肉鬆食譜， 原來好簡單， 仲要材料係唔駛刻意去買。因為我地煲湯實會有瘦肉餵垃圾桶， 與其係咁， 不如用黎炒肉鬆， 又變多幾道菜出黎。YEAH。夠哂慳錢。

呢碗就係煲完湯既瘦肉， 為左易摵碎， 呢次煲湯特登貴少少， 買豬展。摵完好細碗架咋， 其實都唔駛點摵， 用叉一桔， 就散哂（因為用豬展嘛）


跟住用白鑊， 即油都唔駛一滴， 用細火烘炒方式炒呢碗煲湯渣﹣﹣﹣肉鬆。邊炒邊再摵碎肉鬆， 同時落自己鐘意既調味料，媽建議唔好參考人地， 都係按返自己口味去加好， 所以， 當係煮餸咁， 邊炒邊調味， 包無錯。因為屋企有小朋友， 媽媽今次特登唔落咖喱個D濃味料， 只係落左胡椒粉， 老抽糖等等咋， 因為諗住比小朋友做飯糰夾飯食架嘛。太多味唔係咁健康。

用烘炒方法去炒肉鬆， 即係用力少少按落鑊到等佢水份無哂， 又不停炒下， 等佢唔好一邊受熱或燶左。直至炒到肉鬆開始卷埋， 可以再炒多一陣等佢乾身一點。頭先碗肉， 就炒左約半小時， 就炒到變肉鬆了。估唔到頭先明明一細碗， 炒起黎， 有兩碟呢個份量。有排食。放涼後， 可以入保鮮袋再入合， 可以保存耐一點。