陪哥哥去玩

4 Jan 14 呢日， 我地一家四口， 陪哥哥去玩去朗誦比賽。未比賽之前， 先黎玩下先

Claire: 嘩， 好好玩呀， 會彈得起我架。哈哈。

Claire: 媽咪， 呢度幾好呀， 有得玩又有爆谷食。

Claire: 哥哥， 好無食呀？

 等到咁上下， 比間學校老師學生昆左上去平台話有開典禮。焗左成校家長學生企係呢個平台後邊， 前邊呢？ 咪就成班嘉賓老師塞住個唯一一個入口， 唔比你地走， 睇哂佢個開幕禮， 做SHOW比嘉賓睇原來咁多 “家長捧場 ”。真係陰公。我地被焗係後邊， 自己玩波算。

好在對於小朋友黎講， 有得玩就夠。唔理好唔好。不過呢間小學， 真係令爸媽反感。希望唔會唔好彩被派入黎啦。

2014年第一次朗誦普通話比賽

4 Jan 14 呢日， 我地報左名參加區內某小學攪既朗誦比賽。學校打黎話1：15分報到， 但比賽要2：00開始。跟住焗你等到4：45分至公佈結果。由一點撐到五點， 真係好漫長囉。原來學校係利用參加者撐場， 幫佢學校做乜野開幕， 仲請埋好多唔識但好老既嘉賓， 係台上講爛GAG仲要唱老歌。唉，真係叫哂救命。呢間學校既老師們（係們， 不是一兩個）加埋呢個活動既目的（幫佢撐場撐到五點比嘉賓睇）， 媽媽已經BLACKLIST左呢間學校。萬一唔好彩入到呢間， 真係死人都要叩門揾其它學校。

比老師老點左一早去報到， 報到完仲有成45分鐘， 我地索性係操場玩埋佢攤位。其實攤位好少架咋， 我地玩哂都未夠鐘， 真係好漫長囉。

其中一個平時好受歡迎但係度唔受Isaac 歡迎既環節， 就係吹泡泡。同學老師唔知想點咁， 求其比支野你。但支野係無乜泡泡出既。

Isaac： 好悶呀～～～都無泡既。得水FING出黎既。

跟住玩其它攤位， 呢個攤位係附近社區中心搞既， 幾好， 有得跳有得叠。岩哂好動小朋友郁下。

跳完要叠包包。雖然簡單， 但有得郁。

跟住另一個好玩， 係釣魚。係中學搞既。不過個圈佢地整到都幾難圈架。所以搞到條龍好長， 因為一個小朋友都搞好耐。但係咁， 因為佢夠慢夠長龍， 所以拎到呢間小學頒既最受傑出攤位設計。爸媽真係 O 哂咀。呢間小學可唔可以認真小小去諗下呢。

呢個又係中學搞既， 叫做可以用下腦， 就係找相同顏色既數字排1﹣13。

呢個坐彈彈波係小學搞既。媽媽一入去學校， 即行去呢個攤位問老師點玩。點知個位負責老師無乜禮貌，都無叫媽媽等等， 我問下人先之餘此類。反而好大聲咁大叫， 阿乜乜（個位乜乜係同學仔）， 喂， 點玩架。～～～之但係呢， 佢口中個位阿乜乜， 啋都無啋佢， 走左。然之後， 呢位老師都走開埋。想點呀， 學校老師黎架下？ 媽媽去咁多次學校開放日， 呢間學校比媽媽感覺老師最差囉（成個過程不只一位老師令媽媽 O 咀， 而係陸陸續續出現的老師都叫媽媽大開眼界）。好在， 攤位中途開始無乜人理呢個攤位， 我地自己拎波波求其彈兩野就算。叫做開心下。

因為攤位真係少， 時間又多， 我地不停咁跳左N次彈床。之後， 就去左朗誦比賽。比賽完都未夠3點。唉， 又要迫人捱到4：45分至有結果。媽媽其實好想好想走， 因為呢間學校真係不值一留， 入到黎讀真係要喊咁口。不過爸爸睇過Isaac 表現， 覺得Isaac 應該有機會拎奬喎。所以爸爸話要等。見爸爸病住咁辛苦都話等， 咁唯有等下啦。繼續揾野磨。

好在係二樓見有個CORNER比小朋友畫畫。又無人排， 就比Isaac 即場畫下。

陽光反射關係， 睇得唔清楚TIM。不過有云有BIRD有太陽有人有樹架。

見悶悶地， 夾硬捉 Isaac 係課室玩下。見過唔同小學開放日， 得呢間有胚胎模型。都唔知上堂係咪真係有用。

無無聊聊， 終於去換杯FREE 既爆谷食下。平時去開放日都病既 Isaac， 難得呢日無傷風咳， 就比佢食下啦， 睇下笑得幾開心。可惜雖則無咳， 但佢其實係病緊﹣﹣腸胃炎， 一食即嘔， 真係陰公豬。

有人食完自己個杯爆谷， 到妹妹用五元去買一杯時， 偷妹妹個杯食TIM。

Isaac: 媽咪， 我生鬚鬚呀～～～唔緊要啦， 我一陣比返妹妹食呢支棉花糖咪得囉。

Isaac: 嗱， 阿妹， 你想食自己摵啦。哥哥唔得閒理你呀。

等咁耐， 又聽爛GAG又聽老歌。仲要捱到成五點半， 至開始頒奬， 真係好痛苦囉。不過最後如爸爸所料， Isaac 真係得奬。K2 K3撈埋一碟分得個三個金銀銅。Isaac可以係百幾人裡邊， 拎到個幾個奬既優異奬。媽媽覺得佢真係好叻仔了。希望 Isaac 不滿足於此， 繼續學習， 進人一步。

與大姐姐哥哥玩樂

27 Dec 13 倒數返去年聖誔， Claire 伴隨哥哥去同大姐姐玩。第一次玩猜包剪泵， 真係睇住Claire 事前好專心咁留意其它大姐姐大哥哥點玩。終於輪到Claire, Claire 好專心咁聽。不過未控制到手仔出野。估唔到就咁， 佢就記得呢個同佢玩猜包剪泵的姨姨。

Claire: 猜完等我走個圈放下電先

身型嬌小既Claire， 坐埋係大姐姐大哥哥身邊， 顯得更加細粒。

3 Jan 14 新既一年，又同班朋友仔玩。唔好話Claire 係大朋友身邊顯得細粒， 其實佢真係好嬌小囉。睇下， 呢個BB細 Claire 一年， 但重過Claire 架， 所以呢個搖搖椅， 擺明唔駛玩， 哈哈， 因為Claire 比人升左上去。

Claire: 咁我自己同自己玩搖搖椅咪可以兩邊平均咁郁囉。

近鏡睇， 其實Claire 已經長左唔少肉架啦。睇件衫爆哂就知。

Claire: 我地唔好理咁多呢D 啦， 玩樂至上呀。

Claire: 趁無小朋友同我爭， 等我盡情SIR 滑梯先。

又聚聚

3 Jan 14 新既一年， N班同學仔又聚舊下。其實之前一次係一周前咋， 所以， 呢次大家都唔駛再WARM UP， 一黎就盡放電。

Isaac: 哈哈， 我好高呀， 仲高過間屋呀！

雖則話大個仔， 不過對呢個迷你滑梯依然咁有興趣。

Isaac: 等我黎個斷背版烈火戰車先。不過好重呀， 架車郁唔到呀～～～～

呢日我地係食盆菜。Isaac 食得兩啖， 唔知係盆菜污糟吖， 定係Isaac 真係無洗手， 個晚即嘔。仲嘔左幾日， 真慘。

究竟Isaac 同邊位美女一齊做倒立呢？

呢D咪叫做大既唔好教壞細囉。邊兩個咁曳呀！！！！！！

連續玩左兩次， 唔知下次又等到幾時， 至可以再同N班同學仔玩呢？

兩歲半模仿哥哥朗誦

話說成日睇住哥哥練習朗誦， 耳濡目染下， Claire 都學到一兩句。仲要無啦啦自己走出黎要媽媽叮佢開始， 跟住自動波講。雖然咁講姐， 但以Claire 心智發展， 媽媽都仲係唔急於比佢出去表演。因為Claire 對住咁多人時， 就唔會咁自然咁大聲架啦。等下佢遲下讀K1啦， 到時成熟少少， 可能會敢表演於人前。到時再幫佢報名都唔遲。

而家， 梗係要睇下滿口BB話既Claire 表演啦， 雖然外人聽唔到佢講乜， 不過媽媽就聽得出(成日聽佢講野吖嘛）。媽媽覺得佢表現真係好醒架啦。希望大個會再好D啦。

普通話表演按此(最搞笑係臨尾無啦啦好似叮自己咁， 笑死媽媽同哥哥）



英文故事表演按此(好叻架啦， 媽媽無教佢， 自己聽哥哥練習都可以背到咁多）

Claire， 媽媽比個叻叻你。你模仿力真係好強。

健康懶人之選 ﹣ 超低糖超少油免搓包 （無需用砂鍋）

自從去年無意中發現左個免搓食譜後，就日日都晨早桔起整無添加包包。不過食左成年， 最近開始留意到， 用包機搞既粉糰無免搓咁多糖。雖則自製包包健康D， 但份量要咁多糖， 點都無咁好。又唔捨得買個LC煲入爐， 而且LC煲入爐法既免搓包， 焗出黎係歐式硬皮款。唔岩我呢D牙有問題既老人家。

有次不停咁SEARCH， 見到有人用我之前既免搓法造包， 不過佢寫左唔落蜜糖， 加多40G水。把心一橫， 等我再改一改， 索性改埋無乜油先。

連續造左兩次， 效果好好， 發得好正 （室温仲要得14度）

材料：

高粉 250G

旦     一隻

糖     10G

温水  150G

酵母  1／4匙 + 1／8匙

油      1／2匙

把以上材料撈勻變左咁。

跟手放室温等三個鐘。因為呢幾日幾凍， 得14度。所以我都係趁煲湯時間， 放係廚房， 等蒸氣令室温提高， 幫助呢舊粉糰發起。

三個鐘後既樣。

明顥發大成倍。跟手放入雪櫃雪三個鐘（不過我就雪足一晚， 無理佢）

晨早起身整包既樣。比之前室温發三個鐘既樣更多氣泡。不過唔好桔破氣泡呀， 因為呢D氣泡可以令包更鬆軟。

要食包前， 先分割合適大小既粉糰， 勁力用碌推壓平，造型， 再放入未開爐的焗爐（下放熱水一盆）待二次發酵30分鐘左右。

二次發酵後， 取出包型。預熱焗爐170度約十分鐘。此時可按自己需求，在包上塗旦汁， 或者放其它配料。之後可以入爐焗約13分鐘便可享用。

呢三個包， 其實係用好細舊既粉糰搓成既。但焗起發到好高。比平時發得更好。

切開來， 好多洞洞。其實似用砂鍋焗免搓包既歐包質感。不過我呢個方法， 試左幾日都無用砂鍋， 當普通包咁做， 其實係軟既。岩我無牙食。

第二次搓粉出既效果， 一樣多洞。但無損口感。當然要同街比的湯種， 真係無得比。不過呢個質感， 都好岩我， 因為真係發得起， 好有食包包既感覺。而且呢條方， 用糖用油都好少好少。絕對係健康之選。

終於玩到氹氹轉＠冒險樂園

1 Jan 14 呢日又去好同學生日會。連續幾次都係去冒險樂園， Isaac 去到熟哂。不過次次都未坐到呢個氹氹轉， 新既一年， 終於摸到撓門， 坐到唔跌了。笑到Isaac 見牙唔見眼。

一坐到唔跌， 就學人做高難度動作。Isaac 你真掂。

Isaac: 好好玩呀， 但點解爸爸無望住我既。

 除左個氹氹轉， Isaac 仲好鐘意呢個波波池。係都要拎住咁多野SIR落波波池，真係牙煙。

玩完食旦糕， 唔知呢件旦糕好無味呢？？？

開完餐， 又黎排隊拎紀念品。排隊都要玩餐飽， 呢個Isaac 真係．．．

Isaac: 唉， 到正經時間， 我就會變得好正經架啦。

 

Isaac: 到有需要時間， 我又會變身好哥哥， 照顧阿妹啦。我其實係變身超人黎架。

Isaac 成日都話要黎呢度開生日會。不過媽媽同佢約法三章， 要朝早起身返學前要快手出門， 如果起身之後30分鐘搞掂所有野， 就可以開生日會。諗諗下30分鐘好似有難度， 所以媽媽暗地裡計時係40分鐘。暫時 Isaac 都叫有進步了。希望可以越來越快手啦。