聯校畢業典禮鼓隊表演

26 May 14 呢日鼓隊既 Isaac 又要出動。仲要晨咁早就起身， 真係陰公。其實早一個星期既周五， Isaac 已經比學校CHUR到行，朝早返學後， 得一個小時LUNCH， 跟住搞到成五點九至放人。媽媽已經好心赤， 話哂得五歲人仔，返到好似人地返工咁長時間， 真係辛苦死。

點知呢朝仲話要七點半返到學校， 計返即係六點半要起身啦。嘩， 諗起都覺得 Isaac 辛苦呀。咁早起身， 加埋著到白色， 有點像彊屍咁。

Isaac: 嘩～～～我咬你架， 你咁話我。

 今次聯校畢業典禮，表演學生只可以帶一個家長出席。所以， 呢日由爸爸做代表， 同 Isaac 一齊去到老年咁遠既伊館。

鼓隊好在一早出場表演， 負責帶嘉賓入場。而 Isaac 今次唔係負責打鼓， 而係做旗手。其實早兩個月， Isaac 已經興高采烈咁講比媽媽聽， 佢做旗手， 到時我係會見到佢渣旗既。

Isaac:爸爸， 你專心D睇啦， 唔好掛住影我啦。

Isaac: 好悶呀， 仲未出架～～等我操下腳先。 

嘩， 終於出場了。

表演片段按此

Isaac 企正係鼓手隔離， 好易認。

其實自從 Isaac 呢兩個月練旗手後， 媽媽都好心痛。因為支旗可能太重， Isaac 好多時都同媽媽講， 手掌位好痛。唉。希望今次之後， Isaac 唔駛再渣旗啦。

表演完後， 輪到 Isaac 睇其它表演了。媽媽雖然無去， 不過睇返相， 媽媽覺得 Isaac 算係專心既一個了。

Isaac: 做乜又影我呀？

坐左成個幾鐘， 成個典禮結朿了。爸爸可以接返 Isaac 走了。

Isaac: YEAH， 搞掂。

 不過， 臨散之前， 都要同返同學仔YO YO合照先。睇下 YO YO 呢日幾咁靚女。

表演後有得跑就精神哂。

玩到趴哂地係度互扯。

不過呢張相又好似好合拍咁喎。估唔到 Isaac 同芷卉忽然間又咁岩擺到個襯既POSE喎。

臨走， 當然少不免， 要同 Isaac 最鐘意既莫老師影相啦。莫老師都幾鐘意 Isaac 咁， 次次見到佢， 都要HUG實 Isaac。

 不過好明顯 Isaac 係好眼瞓了。睇下老師同 Isaac 對眼就知。

下次鼓隊表演， 係六月底， 咁短時間， 睇黎學校又要加行操FIT佢地了。好在 Isaac 由心底鐘意打鼓， 否則媽媽心赤都無理由再比佢咁落去。如果 Isaac 做每件事都咁用心， 咁就好了。

自得其樂 ﹣﹣黃金海岸遊艇會

18 May 14 Claire 呢日跟哥哥去黃金，同姐姐哥哥哥一齊玩。不過 Claire 無有怕， 雖然有年齡隔膜， 但Claire 已經習慣左自得其樂。

睇 Claire 一個人跳彈床都可以跳到咁多表情， 就知佢一個人， 都可以玩得好開心。

 呢張咁矇本來唔打算POST， 不過見佢跳起哂。就POST一下， 留念下人仔細細既Claire, 跳起彈床有幾活力十足啦。

面露兇狠目光的Claire: 你POST我 D 咁核突既彈床相， 你找死呀？？？

 因為之前落雨， 加上又熱， 我地好快閃左入室內玩。人仔細細既Claire, 坐落架車到， 好似好FIT咁喎。

 本來係有個哥哥帶住呢頂安全帽， 卒之比Claire 等左好耐， 人地至除低。Claire 即刻拎黎帶。咁冚住， 又好似幾靚女喎， 哈哈哈。

Claire: 嘩， 好危險呀。樓上有高空擲物呀。好在我有安全帽， 快D 走呀～～

 雖然係成班朋友仔一齊玩。不過同 Claire 年紀相若既真係無。所以 Claire 唯有自己撩媽媽玩。

Claire: 媽媽， 我個樣夠唔夠可憐呀？ 點解都無人肯同我玩既？

 無計， 人地咁大個， 好似咁， 人地玩梗單粒叠高， Claire 好想JOIN， 不過無人幫之下， 唯有遠觀。

不過唔緊要， 慣左自得其樂既Claire ， 一於少理。至緊要晚飯後， 有一杯甜品過下口癮， 咁就心滿意足了。

雖然人仔細細， 好多時大朋友唔騷Claire；不過Claire 成日都好努力咁嘗試撩人玩架。

Claire: 唔比你過。你嘟咭先過到架。

Claire: 媽咪， 姐姐唔嘟咭， 話入錢比我喎～～～

唔知幾時， Claire 可以同自己年紀一樣既小朋友， 一齊出黎反呢？ 真係令媽媽期待呀。

開心一聚＠黃金海岸遊艇會

18 May 14 呢日我地好忙， 朝早 Isaac 要綵排， 因為下午要出上環考TRINITY 既DRAMA試。一完左綵排我地就搭車出上環， 出到去HEA左陣 M 記， 就走去試場。好在早到， 原來話係1：28分考， 但佢地成班就1：15分左右入哂去。話咁快就考完出返黎。咁早， 我地梗係返屋企HEA陣先啦。

因為要儲定電源， 下午再戰黃金海岸遊艇會既CLUBHOUSE。事綠又係 Isaac BB班既同學仔家長係呢度既會員， 所以我地可以用廿蚊玩全日。全日就無了， 因為我地HEA完都成四點幾， 入到去都近五點。比兩兄妹放個零鐘電， 都叫做仲有精力同大家食個晚飯。

一去到， 梗係要跳下彈床， 點知原來彈床係吹氣個隻。哈哈哈， 媽媽仲以為係室內個種彈網床TIM。

其實呢日落完雨好熱， 我地跳左兩分幾鐘， 頂唔順都係入返室內好D。話哂有冷氣嘆下。

Isaac: 媽咪呀～～～幫我吖

最近媽媽成日都鬧 Isaac， 皆因呢句：媽咪呀～～幫我吖～～～成為佢既名言。就黎要升K3入小學既佢， 真係需要時間去改下呢個倚賴性格。所以媽媽決心而家開始訓話， 要佢自己諗方法。

其實呢個PLAYHOUSE幾好， 夠哂大， 同埋我地成班包場咁滯。可想而之， 呢度真係無乜人黎玩既私人會所黎架， 正。不過望住咁多野， Isaac 開頭都唔知玩乜好， 乜都掂下。

另一端係黑漆漆的滑梯， 可能太黑， 成班細路都無乜點反。尤其係膽小的Isaac， 所以成日都步係度玩車。

呢兩個自幼一齊讀BB班既同學， 出生日期差幾日咋。兩個一痴埋， 真係好易反轉間屋。

大大隻既 Isaac， 仲玩呢D 車仔， 會唔會塞爆車呀？

臨尾， 終於見到 Isaac 笑了～～～就係大家鬥砌LEGO， 鬥高時， 一副戰鬥格既 Isaac 卒之提起精神， 搏命砌。

 朋友仔都係單格式咁砌上去， 危危乎危危。唯獨 Isaac 打孖上， 安全至上。莫非真係咁醒， 知道咁砌無咁易跌？！ 不過爸爸一句：我平時教佢打孖砌架嘛。所以， 係平時教道有方吖， 定係 Isaac 個腦咁快轉到， 真係得佢自己知。

鬥高後， 玩到無野好玩， 成班係度玩保齡， 不過唔係用波都唔係用樽。而係用車撞。吖， 媽媽留意到， Isaac 九成半機會都會撞冧條柱架喎。眼界同手部肌肉發展都唔差喎。

之後， 我地齊齊去左CLUBHOUSE既酒樓食晚飯。其實大家都好攰， 不過一聽到食完飯仲可以去玩， 各小朋友搏命食。尤其係當食哂飯， 仲有個咁大杯咁吸引既芒果布甸， 梗係各小朋友都開心過人啦。本來媽媽係咁叫 Isaac 同媽媽SHARE既， 點知 Isaac 死人都唔肯。哼。

晚間生日會

16 May 14 呢日我地應邀出席 Isaac 同學生日小PARTY。時間係夜晚， 真係有史以來參加生日會最夜開始既時間。無計， 佢地要加操鼓隊， 所以，傍晚六點半至開始招呼。兩兄妹去到， 二話不說， 當正自己屋企咁。

Isaac 都好D。有埋位做下手作仔， 做返頂用廁紙筒整既環保生日帽。

好專心架。

Isaac: 我頂帽靚唔靚呀？

 呢日主角既妹妹好搞笑， 平時好怕生寶。呢日係自己地頭， 就係咁叫媽媽我幫佢影相。仲不停擺POSE， 要我再影多次， 再影再影。真係搞笑。

呢次係扮花喎。乜花係反白眼架， 哈哈哈。

Isaac 做好環保生日帽， 就埋位玩。呢部收銀機當晚超級受歡迎。個個都爭住玩。

連Claire 都同其它大姐姐大哥哥打成一片。

呢次生日小PARTY， 真係勞煩哂主角媽媽親手煮野。主角不知食得幾咁和味。

到食旦糕時間， 個旦糕真係夠哂特別。係雪糕旦糕黎。不過外型襯返彈琴好叻既YOYO，旦糕都係銅琴黎架。

小朋友呢晚食得不知幾咁開心。仲有， 就係大家成場都好期待﹣﹣﹣ 食完落去玩會所， 簡直成班都失控咁滯。

衰妹一見會所， 簡直阿媽姓乜都唔記得。HYPER到呢～～

 Isaac 都唔弱， 居然拎個BB玩具出黎推。

好在後尾都有追同學仔， 叫做正常返少少。

點知阿妹都追埋一份。

臨尾， Isaac 見同學仔芊攸做一字馬好正， 於是又學人做。

不過平時無練，無得同芊攸比啦。睇下人地成副身都貼哂地就知有幾柔軟。

見一字馬唔夠黎， Isaac 再整多個美人魚POSE。真係叫在場各家長大開眼界。

呢日不經不覺， 都玩到成十點幾十一點至走。真係攰到無人有。兩兄妹返到屋企， 好快就揾左周公了。下次唔知又去邊個生日會了。