牛牛棉花糖棒 （仔仔學校生日會用）

呢篇野都成個月前做既事了。不過一直懶懶懶， 所以無POST返。話說今年決定幫 Isaac 開生日會， 見呢個月學校又有生日會， 唔知點解心血來潮， 係網上揾到有人整過牛牛棉花糖。所以就試下自己整。

首先， 買左杏仁片，係大粒棉花糖兩邊剪少少位， 用陰力插入去。陰力因為真係大力少少都碎哂。激死。插左都好似大半個鐘， 至插到半班份量。

之後， 先用熱溶左既白朱古力座大半粒棉花糖落去(即拎返上黎）， 跟手轉轉轉FING FING FING， FING 到白朱古力薄返又半乾時， 即刻用支棒棒吉埋入去插住。白朱古力乾哂後， 再用溶左既朱古力淋落一粒杏仁片上， 輕手FING 走多餘朱古力再等乾。乾左之後， 再用朱古力筆點睛畫鼻。制成品就變左咁。

搞左好耐， 終於有大半班出現了。不過都係唔夠。

最後， 死死氣又做多幾支。湊夠32支。

估唔到， 整下整下， 會上癮的。之但係， 都有少少後悔整呢個朱古力， 皆因四月個排都好熱下呀。日日都廿幾度， 幾驚未返到學校， 個PEI 朱古力溶哂， 白費心機呀。所以下次再整呢個， 都係留返冬天整了。