Isaac 六月節錄

21 June 15 呢日收到畫班老師圖片，係Isaac 堂上做既父親節禮物。一返到屋企，呢份厚禮就即送左比爸爸。其實Isaac 好少做手工比爸爸架，真係唔知爸爸收到呢份厚禮，有乜感覺。又唔知呢份厚禮，係咪純粹當飾物咁擺。因為Isaac 曾經要求爸爸攬住呢個CUSHION瞓覺架。

22 June 15 呢日，係學校門口，見到Isaac 個樣呀，哈哈，係當日校際音樂節比賽既造型黎。當時Isaac 仲古靈精怪。可惜，經過叩門一役，Isaac 好似成個人變哂，成日返學都無乜開心既感覺咁。

30 June 15 點解咁講？因為好似呢日咁，明明成班同學仔好開心，忽然話影合照，不過Isaac 一D表情都無。唔通，佢心底裡好唔捨得呢班同學仔？但問極都唔講，真相係點，真係只有佢至知了。

Claire 出席小小生日會

21 June 15 呢日收到畫班老師傳黎既圖片。係Claire 造既手工，係父親節信插黎。不過，做完當日，我地順道去公公屋企切蛋糕，Claire 一片孝心，把呢個信插送左比公公。唔知公公有無好好保管呢份孫女既禮物呢？

下午，Claire 第一次出席同學仔棽棽生日會。陣容好鼎盛，淨係同學仔，都有呢排咁多。真係坐爆左M記呀。

Claire: 媽咪，我迷失左係同學堆中呀⋯⋯
媽咪： 梗係啦，你好似係最細粒個位喎。

換個角度睇⋯⋯Claire 真係唔算大隻架，哈哈哈。

可惜Claire 入讀全日班，有大部分同學仔，媽媽係唔識既。想保持聯絡都幾高難度下⋯⋯下次生日會，唔知又係邊個全日班同學生日呢？

妹妹獨自去玩一天

13 June 15 呢日哥哥要四出撲校面試小一叩門位，走投無路，唯有寄託Claire 去鄰居家中一日。幸好鄰居有同齡小朋友，可以一齊玩。

好在大家都係砌大LEGO，哈哈哈。阿妹有個伴。

之後，佢地仲帶Claire 出去玩ROLLER。不過呢對鞋真係好搞笑，媽咪真係未見過。又唔似鞋，踩起上黎，真係有點難度咁。

按此去片睇下Claire 踩成點。

除左試踩ROLLER，兩個小朋友仲係咁玩捉人。難得妹妹有機會可以同其它人玩，又唔怕羞。（按此看）

因為鄰居係樓上樓下，寄託妹妹之前，媽媽已經放埋架單車比佢，等兩個小朋友有節目。睇返D相，實在真係好感謝鄰居幫忙。我地仲好似未多謝人TIM。哇卡卡。

Claire: 嘩⋯⋯乜攬咁埋呀⋯⋯媽咪話唔可以架。

因為哥哥呢日全日都去面試，所以，Claire 去完放電後，就索性同樂樂一齊LUNCH。難得Claire 都玩埋車，可以同樂樂打成一片。

樂樂： 你放心啦，我好錫呢個妹妹架。
Claire： 你咪攬咁實吖⋯⋯

 平時食野慢吞吞既Claire，聽聞呢日食飯食得好快喎。唔通真係要同同齡小朋友食飯，佢至會識得鬥快？

樂樂： 咁多D一齊同我食飯囉。
Claire： 好呀⋯⋯我都想呀。

 食飽飽，Claire 仲係人地屋企食TEA。又係聽聞食得好快趣囉。

Claire: 媽咪，我仲食埋大蛋糕TIM呀。

樂樂： 嘻嘻，好似食得快過我TIM呀。

 食完仲玩埋搖控車先返屋企。

好在，夜晚哥哥辛苦完一日，都有機會去玩。其實係搏慒跟埋樂樂一齊去同教會打保齡。

呢三個小朋友，百無禁忌，夾到三文治咁。

Claire: 哇⋯⋯夾死我啦⋯⋯ 

Isaac: LUR⋯⋯ 我就係想夾走妹妹，得我同樂樂影相⋯⋯

睇返D相，忙碌既媽媽至醒起，都未請返樂樂一家食飯TIM。因為佢地幫忙湊妹妹一日，之後知悉我地叩門成功，話食飯慶祝，慶到而家都開學一個月，都未食TIM。真係要行動至得。

妹妹愛閱讀

2 June 15 話說 Isaac 仔細就好好好錫媽媽，記得Isaac 仲係兩歲幾，就話第時返工，會買牛仔褲比媽咪，因為個排媽咪成日懶型咁，著破爛牛仔褲。但Claire 暫時都仲未會好似哥哥咁冧媽咪。不過，呢日去食飯，媽媽叫左兩件炸鮮奶，比兩兄妹分。點知，Claire 望住呢兩件，諗左一陣，居然話佢自己唔食，留返件大既比媽咪，仲叫哥哥食細個件。嘩，真係冧死媽咪了。妹妹終於都識氹媽咪啦。

9 June 15 未讀K1 時，Claire 成日比媽咪形容為馬騮。入左幼稚園，情況有所改善⋯⋯好似。不過，一入到𨋢，呢隻馬騮又發作⋯⋯

Claire: 我想玩吊架咋嘛⋯⋯鬼叫今日無得去公園咩⋯⋯

 10 June 15 媽媽自從放下工作後，唯一一個寄望，就係培育兩位小朋友成為愛書之人。所以，兩個小朋友，未到兩歲，媽媽已經捉住佢地去圖書館講故仔，比佢地習慣下係圖書館既環境。可能係咁，兩兄妹都好愛去圖書館，亦都會自己摷書睇。尤其係妹妹，成日忽然失蹤左好耐，原來係自己呢埋一邊細閱故事書。當佢睇完一大堆後，就會再選兩三本叫媽媽講比佢聽。睇到咁，媽媽真係好安慰。

有時，媽媽見到頑皮小孩時，其家長都係一臉佢天生係坐唔定，係你兩兄妹生得聽話姐⋯⋯
可能真係兩兄妹聽教啦。不過，媽媽都好相信，每個小朋友都係好聽教，問題在於，有無人肯教姐。如果呢個馬騮妹妹，當日媽媽任佢爬高爬低爬埋上窗口，唔薰陶佢閱讀，媽媽相信，今日Claire 仲係通街尖叫，唔肯睇書既小朋友黎。

希望，兩兄妹長大後，入讀小學都可以繼續閱讀。咁就好了。

小記一則

27 May 15 學校早前出通告問要唔要借畢業袍，媽媽都唔知借黎做乜，因為我地家族都比較獨立，好少親戚來往，除左爸爸媽媽同Isaac 影畢業相外，基本上都無人會抽空同我地影。見又差唔多時間還袍，媽媽索性帶著袍來接放學，讓Isaac 同佢愛既莫老師影張合照留念。

30 May 15 呢日放學要陪妹妹去學拼音，當妹妹在學拼音時，媽媽就會同Isaac 去圖書館睇下書，吖，一向好學既Isaac，呢次忽然自己提起本字典，一副認真研究既樣，真係得人喜歡。

不過，認真還認真，究竟幾時先可以戒掉一切小動作呢⋯⋯

K3幼小滙演交流活動

29 May 15 又係一年一度，K2 K3 要出去隔離友好小學表演。其實去年悶過一次，都唔係好明個活動目的係乜。都係兩間幼稚園互相表演比自己家長睇。家長其實都只係對自己小朋友出場節目比較有興趣，小朋友自己又無份睇返對方演出喎。實在有點，揾小朋友黎辛苦囉。

Isaac: YEAH～～～不過我好眼瞓。

 平時郁身郁勢，上到台打鼓，就好專注。

Isaac: 好野，終於打完⋯⋯可以玩住等放學。

 我地幼稚園出場既小朋友陣容幾咁大⋯⋯真係辛苦哂各位老師同同學。佢地真係要額外加操，就係為左呢日咋⋯⋯真係值唔值呢？

其實呢日，期待已久既高潮，係同Isaac 最愛既老師合照。

當然，唔少得呢一班由K1玩到K3 既同學仔啦。

呢班同學入面，Isaac 最掛住既，應該只有芊攸同學。點解？只有佢自己至知了。

還有，係佢好上心既莫老師。可惜，暑假之後，我地至知莫老師已經無再做了，莫講話Isaac, 其實，連媽媽聽到呢個消息，都好傷心好失望。Isaac 雖然唔講出口，但媽媽都估到，Isaac 應該係更加失望的。只望有日，能在街上遇到莫老師了。

中午去打波

25 May 15 呢日熱到屎，有個爸爸居然話去戶外打籃球，講緊仲要係中午時分。真係睇相都覺得係火爐呀⋯⋯爸爸話駛乜驚中暑喎，只係媽媽怕熱⋯⋯卒之？？

爸爸： 喂，快D話比媽咪知，我地唔熱，呢度唔曬啦⋯⋯

Claire: 哼，我無波打⋯⋯

Claire: 好在我有帶私家皮球黎拍⋯⋯

兩個小朋友，兩個波。其實係爸爸特登帶個皮球比小朋友玩，自己去專心打波。

岩岩入到球場，兩個小朋友好投入咁拍波⋯⋯媽媽影左幾張相，就去買水。

點知，一買完水返去⋯⋯見到呢個樣，都嚇死。

Claire: 媽咪，我好辛苦呀⋯⋯好熱呀⋯⋯

媽媽見到阿妹紅哂臉，一臉辛苦，就知佢熱到上心口。卒之，Claire 話佢想嘔⋯⋯其實，呢個係幼兒中暑先兆。點解爸爸仲話中午咁熱黎曬，都話唔怕架。

卒之媽媽抱起妹妹呢埋陰位比佢坐下。坐左一輪，好似無咁想嘔時，有人又走去玩擘腿。

Claire: 媽咪，我叻唔叻呀？

 叻完之後，忽然玩兩玩又想嘔囉。好明顯仲未散完熱。所以，我地呢轉，有驚無險咁返歸，實在好感恩。好在媽媽堅持同行，如果得爸爸一個，佢又堅信中午12點、三十幾度曬落黎，邊會中暑的話，如果妹妹真係中暑到抽筋，爸爸識唔識分真係幼兒中暑呢。

 大熱天時，真係返歸玩下LEGO好D。呢堆，就係妹妹自己砌架。媽媽睇見，真係要甘拜下風。估唔到妹妹日子有功，都開始識利用LEGO砌出各種交通工具同動物。

畢業相後記

22 May 15 後記⋯⋯當晚去同學仔屋企開PARTY，同學仔爸爸負責影既相。

Isaac: 呢個叔叔吖⋯⋯想影我污糟咀呀嘛⋯⋯

Isaac: 嗱⋯⋯影啦⋯⋯快D影啦。

 細路仔，有電視就好專心，齊齊睇⋯⋯

佢地好厲害架，識得自動分前後座，仲有貴賓座。勁。一套卡通片可以整到成班咁安靜。

呢幾張跳高相，真係影得好正。清到不得了。好有動感呀。

Isaac: 你地快D跳高D啦⋯⋯

唔記得邊個媽媽帶頭，話要影張畢業袍相喎⋯⋯估唔到，大家著完，作袍仲可以完好無缺。