K1頌親恩表演

22 May 15 以前哥哥K1時，聖誕節會比家長入去睇佢地唱歌表演，點知阿妹呢年無左。原來，係改左去母親節個月份，叫頌親恩點唱站。D家長一早黎排隊入去，我地無遲不過都排到好後。所以，成場都係周圍攝影前面。好在，座位對正佢地綵排休息室，一開門，嘩，呢個仲唔係阿妹。

Claire: 媽咪，呢度學校黎架，我要扮COOL架⋯⋯唔好叫我呀⋯⋯

成班一出場，先黎一曲早晨歌。（按此去片）

好在Claire 身高矮，可以企前排，原來表演呢刻都幾著數，嘩卡卡。

次次係學校見佢，都係木無表情。真係只有佢本人，至知點解。

早晨完左再黎做早操（按此去片）

Claire: 點解媽咪佢地唔一齊做架⋯⋯咁唔公平呀。

 去到呢首，真係唔知叫乜名堂。哥哥以前好似唔覺有呢首。（按此去片）

全級出場後，跟住輪住各班分組出場。幾經等候，終於到Claire 出場了。老師眼中既醒目女，當然係負責拎咪既一個黎。

Claire: 呢支咪咁大支咁既⋯⋯

Claire: 死喇，我一陣記唔記得要講乜架⋯⋯

 嘩，估唔到Claire 記得自己要講乜喎⋯⋯不過媽媽好似無錄到，有點失敗。

Claire: 大家好，我叫頌恩。我媽咪好慒豬豬，掛住影相，唔記得錄低我講野片段。激死我喇。 

Claire: 你仲影⋯⋯仲唔錄低⋯⋯

 好在，係同學仔傳比媽咪有條片。時間太久，都忘了時個係咪拎住支咪只介紹名TIM。（按此去片）

之後，交左支咪出去，Claire 終於可以有埋動作一齊唱一齊做動作了。

（按此去片）

唱兒歌都一臉木樣，呢個女真係呢⋯⋯

Claire: 再嘈，我用對眼射你架⋯⋯

 之前，主任漏口風話有神秘節目，媽咪都估到係咁架啦。所以，媽咪無好似其它家長咁，喊到變豬頭。尤其係當見到Claire 咁死COOL⋯⋯拎住支花笑都唔笑，木無表情咁塞比你時，想SWEET 都幾難。

Claire: 嘩，點解呢個姨姨喊到好似後邊個位芷晴媽咪咁既⋯⋯佢地做乜呀？

 岩岩剝完智慧齒，塊面腫到方哂，都要除口罩同Claire 影個合照先。有幾何，阿囡會"送"花比我吖。

你話，邊有仔女送左花比媽咪後，仲死渣實支花唔放手架⋯⋯呢個表情，KEEP 到放學一刻，暈～～

Claire: 其實支花都唔係想送比媽咪⋯⋯

 睇下，影合照都咁勉強⋯⋯唔知幾時，Claire 至可以係學校用寬容既表情去見人呢？

Claire: 我而家咪好寬容囉，媽咪，你見唔到咋嘛。