一家貓頭鷹: 台中之旅DAY 1 （上）－－埔里大黑松小倆口元首館。埔里木生昆蟲博物館

11 Aug 16 爸爸生日，不過，爸爸話唔駛特別慶祝，生日正日照樣同ZAC ZAC 一家去旅行。地點係台中。其實我地都好少見ZAC ZAC了。長大左，大家都忙左，最近個次係四月生日會，之後，就係八月呢日了。

不過，年紀相約，好快破冰。反而係妹妹埋唔到堆。一臉愁容。

Isaac: Zac，睇下我地幾CUTE⋯⋯
Zac: 唔好阻我睇LEGO書呀⋯⋯

小朋友互動情況就係咁⋯⋯直到我地上飛機，Claire 繼續好努力咁嘗試埋堆。媽媽係好欣賞佢呢種性格既。

我地呢次台中之旅，經民宿推介，我地用左個台中師傅。真係好好人，真心推介佢

－－名叫小傅。呢位司機勝在唔商業化，真心真意比意見，通常網路介紹好食既食店，有些時候，佢會反對，話個間反而係最難食，只係名氣而已⋯⋯而行程中間，小傅亦會建議我地可以加插某些景點等等。真正不計較時間，同其它逐鐘計的司機，好不一樣。下次有機會，會再用他的。

落機後，我地行程係直驅上清境既。不過，幾個鐘路途，其實我地會經某些景點。所以，我地呢日會選擇先停係大黑松小倆口元首館，之前做"功課"，以為都可以值得一去⋯⋯點知⋯⋯

呢個教堂仔係幾靚，可惜入閘要再付錢⋯⋯我地見無乜吸引，所以無比錢入去。

元首館其實真係無野好行。我地一落車⋯⋯大家唔出聲，心照啦⋯⋯呢個行程可以SKIP。唯有行上山丘，只見有一對BEAR BEAR，反而呢個吸引到小朋友埋去影相。

我地一家都黎個合照先。

叫佢地做高難度動件影相⋯⋯原來，咁就係高難度。Claire 好明顯係抄哥哥啦。

Claire: 梗係，我唔學哥哥，點埋到堆呀？

其實山丘都無乜好行⋯⋯唔怪得小傅師傅都話好快會搞掂。我地行返落元首館。叫做有架馬車影下相啦。只係影相靚架咋⋯⋯現場睇其實個景一點都不吸引。

Claire: 我地似唔似灰姑娘坐馬車呀？

元首館出面無野好影⋯⋯連媽媽都提唔起勁影相。唯獨元首館裡面，呢班小朋友真係唔願走。因為入面滿佈手信、玩具、糖果等等。

Isaac: hmm....揀邊件好呢？
媽媽：你駛乜諗姐⋯⋯我都無話買！

雖則大黑松小倆口元首館無野好行，但三個細路大家擾擾嚷嚷，其實都搞左一個鐘。之後，我地係小傅師傅介紹下，去左呢間台灣店食午餐。

內裡好似好有名咁，貼滿名人照片，雖然媽媽都唔識佢地係乜水。

一行七人，大家都話食無所謂⋯⋯呢下真係好難諗。媽媽就唯有叫個專比遊客食既套餐，比人當水魚咁"湯"下。

其實碟碟都好新鮮，材料係台中特產。香港真係食唔到，果然師傅係帶我地食地道野呀⋯⋯地道還地道，小朋友就有D唔岩口味。不過我地叫做試過吖嘛。

食完飯。按行程，本黎我地應該係去埔里紙教堂既。但師傅接機之後，一路渣車一路講，紙教堂唔值得去⋯⋯因為，個度D紙有濕氣，搞到成個區都有陣味。小朋友去到又無野做，根本唔值得比錢入去。食完飯，師傅又重覆多次，意思叫我地取消紙教堂⋯⋯比佢數到咁不值得去。唯有聽佢意思，好在媽媽之前做功課，知道往清境途中，有間叫做木生昆蟲博物館⋯⋯網上寫有兩層高。佔地好大⋯⋯仲以為要預一日。點知同師傅講開，佢話實夠時間，加上為小朋友著想，昆蟲館既景點好過埔里紙教堂喎。好，一於去下。

原來呢個木生昆蟲館分為温室區同樓層博物館的。入口就係温室，種左好多植物⋯⋯同埋好多好多唔同品種既昆蟲。對於住石屎森林既小朋友們，呢D真係大開眼界喔。至少，就算我地行山，都未必見到呢D昆蟲喔。