第一次playgroup

20 Nov 11 呢日媽咪同妹妹去左個親子活動教授日, 係教下點郁大肌肉. 媽咪見平平地, 都係六十大洋, 仲要係會所喎, 一心當去玩下又學下點訓練大肌肉既心態, 就第一時間報左名.

我地少有地早成大半個鐘到達. 等到12點, 第一個入左房, 無人喎, 就比妹妹入波波到碌下. 點知妹妹係好TYPICAL 既貓頭鷹黎, 比我地其它三位家庭成員更貓....所以佢係定左形好耐都唔郁囉, 呵呵.
Clare: 睇定D 先~~~~~


卒之有個朋友仔黎到LU, 呢位豐豐朋友仔, 其實係大妹妹三日咁大把. 次次gathering都見面架, 但無次次都影相, 因為豐豐實在太活躍, 好難得至會咁坐定定影到相架. 仲要難得合照, 兩個表情都係咁呆, 哈哈哈.

其實頭半個鐘既熱身運動, 媽媽都識,有時仲會同妹妹做. 只可惜妹妹體格發展都徧慢, 婆婆有日問媽咪, 係咪陀住妹妹飲得好多瓜湯~~~~哎呀, 係呀, 個時成日煲瓜湯飲, 仲懶叻話自己個胎無事tim~~~婆婆話飲得瓜湯個bb會寒涼, 所以軟lai lai, 唔得硬淨. 唔知係咪咁, 妹妹到今日仲未坐得好穩. 呢日導師見到, 都有叫媽媽放心, 唔好心急去train佢上半身肌肉, 因為妹妹腰骨仲未support到. 見到妹妹咁, 媽咪更想繼續餵人奶~~~雖然有時都會懷疑, 會唔會唔飲人奶, 妹妹反而會發育得硬淨d呢~~~哎, 好矛盾, 理智上其實係知人奶係好過奶粉. 但妹妹既例証又好似唔覺人奶係肥d大隻d發育得好d 吸收好d架喎. 理智戰勝情感, 所以媽咪今日依然係繼續埋身努力餵妹妹的. 希望可以借此補償返之前既缺失啦. 如果時光可以倒流, 咁就好啦. 媽咪唔駛成日都咁掙扎.

呢個碌波波環節, 媽咪同妹妹都麻麻地enjoy, 所以媽咪索性影相, 妹妹索性趴轉周圍望.

Claire: 去撩下靚仔先

同場居然比媽咪揾到同年同月同日生既朋友仔. 係孖女黎架, 不過好明顯一眼睇得出, 兩個孖女係兩個極端性格黎, 媽媽只係同其中一個影合照. 因為另一個孖女忙緊.

臨完場, 導師吹泡泡. 話係比佢地眼仔去追蹤喎. 妹妹真係睇到好入神~~~~~不過隔離個孖女搏哂命喊, 喊到妹妹中途都扁哂咀忽然喊住揾媽咪. 媽咪: 媽咪係你後邊囉, 唔好咁嗲啦.