跳彈床。非州鼓體驗班

11 Jan 14 周六爸爸返工， 媽媽又幫我地去揾節目。呢日又有區內小學開放日， 媽媽見佢有彈床玩喎， 晨早就催我地出門口玩。無計， 早D去， 少人D吖嘛。加上我地下午要去體驗非州鼓班， 所以， 朝早既放電彈床活動， 都係速戰速決好。最近呢一年， 媽媽無返工， 成日帶Claire 出去玩， 好明顯呢一年訓練有素， 體能進步左好多。咪睇Claire 咁細粒。其實好爬得。

話咁快已經學人爬呢座小彈床山仔。

真係有姿勢有實際架。

Claire: 唏， 好攰呀， 都係彈下抖下好D。

 呢間小學開放日， 其實COUNTER好少， 得六個左右， 唔駛一陣就玩哂。加上我地好早去， 彈床無乜人排， 我地前後玩左至少六次彈床。到差唔多12點， 人龍開始多， 媽媽就催鴨仔趕下場。

臨走， 換返兩支免費棉花糖。呢種棉花糖， 好受兩兄妹歡迎架。當然媽媽細個時， 都好鐘意呢款棉花糖。

Claire: 我地一人一支， 無得爭。其實我食左兩支架啦， 哇卡卡。

Claire: 點解我支棉花糖食得咁快架～～～ （梗係， 媽媽同工人幫手搏命消滅， 唔想妹妹一人食咁多， 嘻嘻）

Claire: 等我出絕招， LAM哂成支棉花糖， 睇你地仲點食我支糖先。

Claire: 年獸呀年獸， 比我摸下你先啦。

臨走， 係學校睇埋舞獅至走。仲同獅子影返張相。不過唔講唔知， 媽媽走去問領獅個位老師， 一開口， 原來係國內人黎。唔通老師都要請國內人黎幫手。定係教舞獅既係國內人會比較專D呢？

之後， 我地好快食個LUNCH， 就三個一齊去社區中心玩非州鼓。其實媽媽早係一年幾前， 已經想幫哥哥報非州鼓。不過區內資源有限， 好似唔覺有幼兒 非州鼓學。媽媽又唔想咁遠出到巿區學。所以一路無理。係有次無意中， 見到有間社區中心攪非州鼓體驗班， 都係廿蚊位。一於三個一齊玩， 又比Claire 試多樣野， 睇下佢有無興趣玩音樂。

個款好似似模似樣好專心架。

不過玩玩下， 導師叫小朋友走埋一邊玩下熱身運動， 去到單腳跳時， Claire 個心好想單腳跳， 無奈佢體能問題， 未做到， 望住媽媽個刻， 好無助咁。

Claire: 哥哥， 我唔開心呀， 我唔識單腳跳呀。    哥哥： 唔緊要啦， 哥哥返屋企教你。

就係咁， 我地呢日就全日放電。返到屋企都好晏了。不過最緊要Claire 夠體能運動， 發展佢空間感同手腳協調， 幫助日後讀書就得了。