賀年傳統年糕 （附食譜）

好耐無POST煮食既野了。一來懶寫， 二來煮來煮去都係個D又無乜特別， 所以更加唔想寫。

臨近新年， 愛子不停叫媽媽整年糕， 整油角整蘿蔔糕賀年。好在婆婆有多出既美心蘿蔔糕， 媽媽可以慳返時間， 只係整年糕同包油角。

油角參考左韋太個免炸既焗油角食譜， 唔知係咪碌到好薄， 食落無哂脆既口感， 哇卡卡， 所以都唔係好滿意。下年再整油角， 塊皮試下唔碌得太薄睇下效果如何。

至於年糕， 呢次係參考基絲汀@簡易食譜 整既， 材料有少少改左。OVERALL口感好正， 係媽媽想要既口感。美中不中係好似唔夠甜， 同埋椰汁味唔夠出(嘩， 媽媽已經買KALA個隻印尼椰汁了， 落左好多都唔夠味咁）

我改左既用料如下：

糯米粉 200G

澄面枌   70G

片糖     250G （個人食後覺得可以加到270G）

水         1杯

椰汁     100G （已比原食譜多左20G但都唔夠椰汁味， 建議可以加多20G， 係水到扣返多出既20G）

菜油       30G

做法：

1） 1杯水煮滾，加片糖煮至完全溶解。倒進椰汁和油拌勻。過篩隔去幼粒。待涼備用。

2 ） 把糯米粉及澄麵先過篩，逐少加入糖水中。一邊加麵粉，一邊不停拌勻，直至完全混合無粉粒。如果想麵糊更幼滑，可再過篩。

3） 倒進預先掃上菜油的糕盤內（我係用焗磅旦糕既旦糕盤），放入鑊中，用大火隔水蒸75分鐘。

4）放涼後，置入雪柜中冷凍至少三小時。年糕硬身一點後，就可以脫膜，切片。蘸蛋汁，用平底易潔鑊，用中慢火，把兩面煎至金黃色，及至軟身。趁熱供食。