大個仔女遊迪迪尼

27 Jan 14 係酒店瞓醒， 第一件事梗係落去食個自助早餐。呢個早餐最令Isaac 興奮， 梗係呢半枱既脆脆片， 有成七種咁多， 加埋超甜芒果乾， 杏甫提子乾等等， 真係好難唔食多幾碗。

呢次食自助餐， 話自己夠高， 想出去拎野食。媽媽就比Isaac 係視線範圍針水， 睇佢返黎個樣， 肯定好有滿足感啦。DIY喎。大個仔的証明黎。

Isaac: 媽咪， 我做到呀！

之後， 我地就坐車去迪士尼。諗住較岩平日加埋晨早， 以為無乜人啦。點知算錯哂。香港人係無乜， 但全部內地人。排隊買飛都超長龍。真係睇見都驚。跟住之後玩既機動遊戲， 全部都要排一個鐘。唉。

係入口已經超多人排影相。見呢隻公仔無乜人排， 就排下啦。

之後我地直闖迷離山莊。又見到唔駛排長龍既影相， 又排左一陣去影先。

咦， 點解唔見左我對仔女架～～～

Isaac 少有地捉住公仔， 唔知係咪公仔主動拖Isaac 呢。

跟住爸爸帶頭入左間迷離屋。媽媽見入口咁奇怪， 特登問企門口職員， 職員答少少恐佈。不過已經足夠嚇死兩兄妹。兩兄妹對恐佈野既反應原來有少少唔同， Isaac 怕到百分百唔睇；Claire 就縮埋一舊裝下， 不過兩隻拳頭仔握到好實了。真係陰公豬。

事後， Claire 不停講唔好再坐呢架火車啦， 好恐佈呀。佢好驚呀。真係表達能力好叻。

之後， 去反斗奇兵睇下有乜玩， 但人流已經開始多， 彈弓狗排到好長呀。所以我地就咁排影相算。

Isaac: 媽咪， 我想扮升上去呀。

Isaac：點解無呔盤架， 咁點渣車呀？

其實咁磨下， 又到一點巡遊時間。爸爸好叻， 十二點半踢左我地出去坐地下霸位。我地至可以坐到前排睇巡遊咋 。

 睇得咁清， 影唔到人影， 因為我地真係企最前。以後要睇巡遊真係要早好多坐出地下霸住。今次好在媽媽有聽爸爸講姐。

之後， 我地玩左巴斯光年。係 Isaac 自小黎迪迪尼必玩既ITEM黎。

巴斯光年：嘻嘻， 細路， 乜原來你係我FANS黎架？
Isaac: 咁都比你識穿左TIM。

 之後， Claire 瞓著左。Isaac 同爸爸就走左去玩小小世界同轉轉木馬。Claire 瞓醒時， 就再同Isaac 玩多次小小世界。仲話小小世界唔驚啦， 不過火車驚， 以後唔好再坐火車啦（講緊迷離世界個個）

之後， 我地都好晏了。因為好多機動遊戲都要排一個鐘。迫於無奈Claire 死人都要玩小飛象。所以， 我地用左一個鐘時間去排， 排既時候， 輪到 Isaac 瞓， 不過係瞓係爸爸膊頭上。牛高馬大， 第時 Isaac 真係要好好孝敬老爸爸了。

Isaac: 放心， 我同妹妹都好錫爸爸架。
Claire: 做乜拖埋我落水姐？

玩完小飛象， 又要輪到滿足Isaac 要求：就係去渣車車。 

嘩， 又要排一個鐘， 真係好暈。排隊個度， 仲要幾部強力大風扇吹正。真係披肩都出埋（用黎扮印尼人遮Isaac 頭）， 當場好多大男人同媽媽級都帶埋帽。可想而之吹到幾正， 裡邊幾咁凍。唔知係咪咁， 媽媽翌日就病左。

不過睇見兩兄妹坐車車坐得咁開心， 媽媽都無所謂了。

 嘩， 好英呀。好專心渣車呀。

話說排到就黎到我地時， Claire 忽然話要去VV。媽媽話咁不如我地唔好玩， 去VV啦， Claire 又唔制， 唔肯走， 佢話想玩喎。咁醒， 知去左VV媽媽就唔會再同佢排過。於是點？ 忍到上車再忍到落車， Claire 真係好叻， 媽媽真係好佩服你， 三歲未到已經控制VV得咁好。兩歲正日生日就識戒夜片。女仔果然自理能力真係好突出。

玩埋呢架車， 都成七點。我地搭車去東涌食飯。真係攰到散。不過難得爸爸肯擲千金出黎玩兩日， 兩兄妹又咁開心， 攰都值既。