第一次上體操彈床班

9 Jun 14 Claire 正式第一次參加課外活動。其實等左好耐架啦， 不過撞岩新工人姐姐到埗加埋媽媽個段時間要返小學幫手。所以， 等左好耐Claire 滿左三歲， 媽媽都未敢放手比新工人姐姐帶兩兄妹出去學野。直至呢個月， 媽媽唔駛再返小學， Claire 終於可以學彈床了。

我地呢堂早到左， 一早換好鞋既Claire ， 好興奮， 但又要忍住唔顯露， 搞到個樣幾搞笑。

Claire: 耶！你拆穿左我， 我打你架～～～

 等呀等， 等左十分鐘， 仲未夠鐘上堂， 有個妹仔好愁了。唔通等左成年， 都未可以跳咩？

嘩， 終於上堂了。Claire 果然係全班最細粒既一位。

第一次上堂， 都幾認真做動作架。至少認真過佢哥哥。希望下個月哥哥一齊上堂， 唔好教壞Claire 求其既態度， 咁就好了。

唔知係咪Claire 太細粒， 所以呢度既導師都唔係好主動要求Claire 跟足動作。搞到個一字碼變左咁。不過算啦。話哂第一次。媽媽收貨架喇。

熱身完， Claire 被分組去左跳床先。彈床佢之前去PLAYHOUSE成日玩， 所以都跳慣跳熟了。

 雖然彈跳依然力度唔夠， 不過至少Claire 可以原位跳， 最後可以好努力咁試下擘腳合埋擘腳合埋咁既組合黎跳床。媽媽覺得佢好叻女啦。

之後， 要埋位做倒立。唔通Claire 以為自己已經做緊？？

卒之， 要導師幫手（睇片）。可惜好快跌低， 唔知有無維持到五秒呢？

其實之前媽媽有預先係屋企同佢試。不過Claire 可能人仔細細， 手仔仲係超細， 唔係好夠力撐起。

之後， 去打筋斗（睇片）， 同埋跳過欄（睇片）， 一點都難唔到Claire, 因為屋企做慣做熟嘛。

不過， 到最後既跳彈， 似乎阿蛇頭都大埋， 望住Claire 好似好唔知點咁。

咁岩又比媽媽影到佢跳落黎一刻， 哈哈。

傻妹彈跳一刻片段

呢個SUMMER， 希望Claire 可以借跳彈床呢個活動， 跳返高佢。等佢九月入K1時， 高返正常SIZE， 咁就好了。