103 CAFE 。圓方平台公園遊

9 Aug 14 呢日我地約左姨姨去103 CAFE食堂HIGH TEA。因為姨姨牛一，我地早成個月打去BOOK，最快都要呢日至可以BOOK到有得食。其實都遲過姨姨生日，好在姨姨唔介意。

既然要食TEA。呢日媽媽只係整左沙律比兩兄妹食，一食完就出發。途經VCITY既公仔，Claire 又例牌要影相。呢個表情，好似人地女生同男友影咁，一臉幸福樣。

Claire: 我有哥哥錫，真係好。

其實媽媽特登早少少出門，因為一心想比兩兄妹去下圓方平台既遊樂場玩下。呢個遊樂場既玩意，平時係公共公園好難找到架。尤其係呢架超高又危險既滑梯。要夠膽攀至可以上去SIR。

攀得咁辛苦咁小心，最後迎接佢既係開心刺激。

Claire: 哇～～～～

Claire: 好好玩呀～～～

 呢架超高滑梯，Claire 每次黎都必玩。仲要係爬完又爬。咪睇佢人仔細細，其實膽子大過人。好多家長見住Claire 爬，都會同自己個小朋友講： 睇下，妹妹都咁爬呀～～～
媽媽心諗，其實可能Claire 係姐姐，只不過細粒咋。

除左滑涕，仲有呢個慳水慳力既氹氹轉。

好明顯，Claire 係最舒服個位，坐係度享受緊人地辛勞既快樂。

Claire: 媽咪，你咪拆穿我至得架。

Claire: 媽咪呀，點解忽然間無哂人架？？

又真係突然間大仔走哂，淨返個BB同Claire，Claire 即忟哂。問媽媽點解無人，個氹氹轉好慢呀～～～～真係公主病黎。

跟住錫妹妹既哥哥即走黎踩郁個氹氹轉，認真乖仔。

圓方平台公園除左上邊架單車氹氹轉外，仲有呢個會上落既氹氹轉。媽媽估計呢個係比小朋友企上去既。不過安全為上，有自知之明既Claire ，就全程趴低。為保唔跌。

由好哥哥推郁個氹氹轉，去片。

玩左陣，我地都係時候上 103 樓食下野了。嘩，風景真係好靚。媽媽之前係夜晚上黎，反而無咁靚。

 一望無際既海。以上係由女廁影出黎既。

103 CAFE 有一邊梳化，可以睇到呢個尖咀灣仔海景。撞岩呢日天晴無雲，好正呀。

影完相返埋位，原來兩份TEA SET 已經到左。呢兩兄妹急不及待要食。不過成五百幾蚊，梗係影返張相留念下。

Claire: 唔好理三七廿一，食得快好世界，可以再黎下一杯。

Claire: 你地有無储過呢D有朱古力金薄既泡芙呀？
媽媽： 你抺好咀至講啦。

食飽飽既Claire，又黎整古做怪。因為三份SET 清哂，無野好做了。唯有周身郁。

Claire: 你唔好立亂講我壞話呀。我碌大對眼射死你架。

Claire: 其實頭先個係幻象黎。我好斯文架。

 食完 TEA，我地就走了。可能係全層樓最快走既一枱。無計，兩個小朋友加埋姨姨好似鬥快食咁，一食完就嚷住走。好似食多過享受景觀。

食完入廁所影返張太陽相。

撞岩呢輪圓方擺設係轉轉木馬。最得意係每隻木馬都有不同衣著打扮，好靚。可惜吸引唔到Claire 影相。佢個心只係掛住繼續玩公園囉。所以我地又再戰公園了。