首爾之行 －－ DAY 2 （ 南怡島）

8 Sep 14 首爾之行第二天，我地晨早坐火車

 去龍山站再轉青春號去南怡島。因為假期關係，南怡島真係好多人呀～～～

不過之前半夜機加上呢日又晨早出發，Isaac 好明顯好眼瞓。一臉木獨。

直到Isaac 見到餐車售賣小食，佢話要食香腸，媽媽其實唔會買，不過見呆坐火車一個鐘都幾辛苦小朋友，所以呢次順應民意，買左支香腸比 Isaac. 

Isaac:好野，我有香腸食。

一去到南怡島，有呢座咁奇怪既噴水池物體供人拍照留念。

之前無做足功課，一去到南怡島，分左右兩方，又見有人踩單車，媽媽又心掛掛要BOOK之後旅程愛寶樂園既接駁巴士位，所以要去旅客中心一趟。期間爸爸就同兩兄妹留低睇表演，不過Isaac 好明顯無妹妹咁專心睇囉。

之後，Isaac 一見草地，就精神哂。完全同之前兩個樣。

咁大既草地，除左用黎跑之外，Isaac 仲執大松果黎拋. 

係大草地另一盡頭，有三間草屋佈景。因為三隻小豬故仔深入兄妹心，所以一見三間草屋，嘩，邊敢亂黎。你睇Isaac 幾咁小心奕奕係門口裝。

草地既盡頭，有動物，有好多怕人既松鼠通地走，又有好大隻但無異味既駝鳥。來回左兩三次，Isaac 終於出聲話要同駝鳥影相。

Isaac: 好喇，我地而家去左邊玩單車。

由入口旅客中心問路，話租單車行前十分鐘會有～～～我地其實應該行左有近兩個鐘。都未到租單車既地方，所以，我地只係踩左呢架路軌單車，媽媽好驚呀。

驚乜？因為側邊無圍欄，下邊無安全網，尤其轉彎個下，真係好危危乎既感覺。呢一個單車圈，其實唔係耐，不過坐左上架車到，感覺好漫長～～～～

之後，見到好似香港智樂會個D自然遊戲。兩兄妹一齊上去踩搖搖板，不過有個輪盡豬自己一跳～～～坐左落地。

爸爸好衰，仲擘大口笑～～～～Isaac 而家睇到張相，話唔想要呢張相，因為唔想見到爸爸笑佢喎。

再接再厲，兩兄妹繼續踩板。

南怡島其實都幾多新鮮經驗比兩兄妹，除左跳板同單軌單車外，仲有呢條一失足會跌落河既獨木橋。

行下行下，已經夠鐘趕火車走人，臨走，係南怡島揾左間最企理既餐廳醫肚，呢間餐廳好好，有好多繪本比小朋友睇住等。媽媽好欣賞韓國呢種咁體貼既配套呀。