SEOUL DAY 4 （愛寶樂園）

10 Sep 14 哇卡卡，終於等到旅程第三天，就係小朋友最鐘意既大型遊樂園區 －－ 愛寶樂園。左度右度，又要轉車仲要臨出發至知韓國長假，為免轉黎轉去跟住係無位坐既巴士企一個鐘。媽媽諗過，都係花多少少錢，坐SHUTTLE BUS算。好快，一個鐘去到。弊處就係來回只得一班車，MISS左就無。

去到旅程第三日，兩個小朋友唔願起身，扭眼瞓，搞到有人早餐食得好少野，媽媽見附近有間冬甩店，吖，有個小朋友夾左個朱古力冬甩，一上車，就係咁食喎。明明食早餐又唔食野架～～～

Claire: 咁我行完好肚餓吖嘛。

黎愛寶都幾煩，轉車去巿政府站坐架叫做最快最方便既SHUTTLE，但都唔係直達樂園。要係出面既巴士站落車再坐樂園專用既SHUTTLE。跟住走個時，原來又分SHUTTLE係去A巴士站定B巴士站。好在我地懶係理性分析岩左，上岩車。搭到專車出明洞。

一入樂園，係真係幾靚。兩個明明好攰既小朋友，都即刻變哂樣。

一場黎到愛寶，雖然無得睇佢PORORO套劇，我地都同PORORO紙板影返張相先。

愛寶有好多唔同即場表演睇，不過要預早取飛。媽媽無做定功課，所以全日只係睇左兩套。其中一套係動物區個邊睇雜技表演，唔算好睇，但小朋友睇得好開心。Claire 仲執左好多金帶當手鍊帶TIM。愛寶真係好靚，D佈置好真實咁。成個氣氛比小朋友好開心既感覺。

睇完雜技，我地去左小朋友區個邊坐THOMAS火車。估唔到唔駛去日本，都有THOMAS車坐。

Claire: 嘩，好曬呀，不如快D去坐火車啦。

 以為哥哥一樣咁冧THOMAS啦，點知佢毫無反應；反而Claire 就好鍾意，不停走去肥總管要求合照。仲笑到咁既樣，都話異性相吸係天生架啦。

連坐上小火車，睇哥哥一點開心都無，係得Claire 笑。

明明架火車係咁靚架嘛。

仲有肥總管同我地SAY GOODBYE。

坐完火車又要合照。唔知肥總管認唔認得Claire 呢？

坐完火車，哥哥已經唔耐煩話要走，不過Claire 反而想係呢度留多陣。咁唯有影張火車合照算。

坐完火車，行返出去，居然見到花車巡遊～～～不過完左。嘩，乜原來同迪迪尼一樣架，早知媽媽做足功課，睇哂咁多野啦。Claire 話要同花車合照，但可惜連人龍都截埋。行到最後，忽然有一間花車放鬆人龍管制，我地至可以趁佢地走之前，影一張相咋。好橙呀～～

之後，見到有得騎駱駝同驢仔。兩樣都好乾淨無味既。媽媽負責影相，由爸爸陪佢地去騎。睇Claire 幾咁冧挨住爸爸。

除左騎駱駝，仲有可以餵雀架，Claire 好叻呀，若無其事餵得好輕鬆。可惜爸爸反對POST佢相，否則有張笑得好燦爛既餵雀相可以放埋。（按此去片睇Claire 餵雀）

Claire: 斑馬，我餵埋你食草吖。

 愛寶好似海洋公園MIX迪迪尼咁既加強版咁，有卡通機動遊戲玩，又有好多動物可以親近，仲可以坐巴士睇獅子老虎黑熊。

Claire: 咩咩羊，乖呀下～～

睇完羊羊，去餵倉鼠。

第一次見咁既方法餵，好似都好衞生。OVERALL呢度係乾淨過日本既動物園TIM。感覺良好。

Claire: 媽咪，睇下我，縮左入去喎。
媽媽： 係你細粒姐～～

 係愛寶，成日見呢種雪糕賣，貪得意買黎食下，感覺唔似雪糕。因為好有質感，定係雪得太凍，唔溶呢可？

Claire: 真係好凍呀～～凍到我縮埋個咀。

Claire: HI，我叫Claire，鍾意食甜野。

 講漏左，仲鍾意做危險動作。睇佢副惡樣。

Claire: 無呀，我擺POSE 咋嘛。

 愛寶最長龍，估唔到係排坐JUNGLE BUS睇野生動物，我地排足一個鐘呀陰公。最搞笑係見到好多黑熊企係度行，仲見到豹企係私家車頂向司機拎野食。

Claire: 我睇完黑熊行路，我覺得佢地好可愛呀。

Claire: 媽咪，頭先見到既獅子呀。

 因為直出明洞既SHUTTLE 係六點半由巴士站開出，我地要由愛寶再坐返SHUTTLE出巴士站。所以五點幾，我地就要走了。其實我地行左成個愛寶都無1／3呀。下次黎，真係要諗下好無玩兩日。尤其係我地用左唔少時間周圍睇動物。雖然行唔哂又玩唔哂，但兩個小朋友答媽咪，最開心係呢日囉。既然係咁，咁媽媽都無咁遺憾。

臨走前影張合照，睇返好温馨。阿仔咁大個都挨住媽媽，過多一兩年，可能媽媽想佢挨，佢都唔挨了。唔怪得D人成日話，父母可以擁有小朋友無幾多年架咋。