SEOUL DAY 1 （N 首爾塔）

7 Oct 14 一年一度既旅行又到了。講緊係陳家旅行，唔係學校旅行，我地今年目的地係韓國首爾。本來媽媽十分之唔願意去首爾既，不過濟州FULL 爆，基於幅射關係，唔去得日本，又唔想再登陸台灣，所以只好選首爾。順便掃下仔仔愛既韓國玩具。

半夜三更起身，坐左成四個鐘頭飛機，一抵埗，媽媽去GS25買T MONEY咭，順便買當地既香蕉奶比兩個寶貝飲。衰妹Claire 一見有野飲，一個唔該即開黎飲，難為要哥哥服侍佢。不過Claire 越大，越奉旨咁，開始變得霸道同無禮貌，成副小姐脾氣出哂黎。唔該都無聲，唉。

當哥哥幫完佢後，Claire 依然繼續陶醉係飲奶當中，唔知佢記唔記得感恩呢？

Claire: 我擰埋一邊唔理你地，當聽唔到～～～

飲完我地落月台等EXPRESS 火車，個個企哂係度，得Claire 一個坐係喼咁嘆，仲可以玩支野飲整古做怪氹人笑。

嘩，成副爸爸樣出哂黎。

坐EXPRESS TRAIN好快到，我地今次住SEOUL STATION既民宿，網上評價好好。媽媽就覺得一般。如果唔係民宿搞埋網上評價可享免費一次住宿一天，我估網上唔會咁多人讚囉。住落又唔覺有幾好。

呢間民宿話就話有兩層，人仔細細既Claire 企係中間，感唔感覺到有兩層咁大？其實只係樓底高，介開左閣樓仔放大床，但上層好矮好焗。

放低行李，我地徒步行去南大門，行到隻野咁，熱死人。難為Claire 仲有心機要停低影相。哥哥則一副無眼睇既樣。

原來香港中秋節，正值韓國都係中秋節，仲要係大節。連放四天，唉，好多店鋪都關門大吉。我地變左真係遊街。大熱天時行到去南大門，睇住好多商場都係落閘，好似執哂笠咁。好無癮。只係街邊有幾檔小販攤檔。包括呢檔雪條雪糕店，媽媽無食，只係兩兄妹食左。不過睇個樣，好似幾特別囉。

第一次大鄉里，見到有中蜂巢蜜糖放入雪糕。不過媽媽一心去左搜羅有無店開左鋪，所以無心食。

呢個價錢，唔知好食無？下次有機會，會試下。

超快速DOU左個無野睇既南大門（因為中秋長假關門大吉），我地又係徒門行去明洞再行去明洞六號地鐵出口對面既玻璃扶手電梯上N首爾塔。唔好話當日，而家寫返篇文，乜我地由SEOUL STATION行去會賢站再行去南大門站再行左去明洞站再行埋去玻璃扶手電梯。諗起都覺攰。去到仲要用腳企呀企呀～～～企企企，排隊排到天黑至上到呢架半空吊住既纜車。真係唔黎好過。

卒之上到去N 首爾塔，不過我地唔係要上塔頂，只係向下層望返落去巿區姐～～～不過呢兩兄妹，好似醉翁之意不在酒。不停咁玩水。

趁未天黑，好快D影了。兩個心，不過爸爸要影相，無得變全家幅。

女仔性格既Claire ，一見公仔都唔放過影相既時候。好明顯，Claire 真係識擺POSE了。女兒長大了。

呢個背景，同心鎖同埋呢張凳，成了N首爾塔既標誌。梗係影返張至走。不過張凳其實唔靚，現場好多凳好靚，不過我地見天黑，同埋真係超級多人（可能遇著韓國長假），所以我地都無心機慢慢等人影完再影靚凳。

之後，我地行落大斜坡，等巴士企返落明洞食晚飯，咁就一日了。N首爾塔，個個都話你靚，可惜我發掘唔到，下次會唔會仲黎睇你呢？