SEOUL DAY 2 （南怡島）

8 Sep 14 首爾第二天，出發前掙扎左好耐，去南怡島好吖，定去踩路軌單車好。綜合左好多意見，原來路軌單車十歲都好勉強至掂到個䟿去踩，仲要個半鐘。既然係咁，媽媽決定放棄路軌單車，改為去南怡島。所以好遲至係網上買火車票（買定來回包有位坐）。好在我地住SEOUL STATION，所以去龍山站只不過係一站之隔，唔怕火車太早出發。

龍山站個大堂都幾靚架。可惜帶住小朋友，時間無多，無謂搏少少時間都去行下商場，唔少旅遊書都話龍山商場好多電子野賣。

兩兄妹，兩副樣。

可能我地遲買票，出發都成十點半，所以，火車無乜人，坐唔滿（不過回程爆哂，仲要好多人坐地下）。又係個句，正值韓國長假期，周圍都係人。我地落左火車，都未過對面巴士站，已經見到的士一條龍，巴士一堆人，全部等車去南怡島渡輪碼頭。我地都等左幾耐下，至上到架的士。嘩，曬到呢。一於幫Claire 變身村姑。

去南怡島，最方便但亦都最少人提既方法，就係向龍山站坐火車，坐到去加平站落車再轉的士／巴士再轉接駁渡輪（最方便係坐巴士去，不過來回時間限死哂，一定要九點幾出車三點幾回程，無彈性，所以媽媽自己由龍山站去方便D）。呢架船企滿哂人。不過吹住海風都OK。

一落船, 古怪的裝飾等住影。

Claire: 好熱呀～～～都係飲野舒服D。

正當媽媽忙於係旅客中心問路時，爸爸帶兩兄妹睇表演。Claire 好似睇得好投入咁喎。

原來係睇佢地自彈自唱。

之前未去南怡島，有人話好靚，有人話唔靚。媽媽來了，可能期望好高，只係覺得一塊草地咋嘛，有幾靚？仲以為有海景望下個D島TIM。不過可能好似爸爸咁講，因為我地只係中間行，不過呢度夠哂自然，岩小朋友渡假。睇下Claire 呢個LOOK，忽然覺得好似英國姑娘仔咁。扯住頂帽邊係草地行。

咁香港真係好難揾一大片既草地比佢地任跑既。

小朋友愛既沙畫。

呢間草屋，兩隻馬蹓唔敢入，因為媽媽口中三隻小豬，住既咪就係呢D草屋囉。搞到兩個一望到呢間草屋，就覺得有大灰狼黎。小朋友真可愛。

呢度如果好RELAX咁行一日都唔錯既。不過媽媽明明花左都有成四個鐘係南怡島，但點解到走個時，我地好似只係行左 1/3 都無架～～～～～

定過抬油既Claire，好入神咁低頭玩自己既野。當佢回神後，一切太遲了～～

Claire: 咦～～～點解你地個個過哂去，剩返我一個未過橋架～～～

當然爸爸唔會留低佢啦，媽媽只係一早過左橋，企定定同大家影相姐。點解阿妹，你對腳會擘到咁大黎過橋架～～～

之後，我地踩呢架車，媽媽其實好驚囉，無墊網又無圍欄咁，尤其係轉彎個下，真係心驚膽跳。

睇下睇下，轉彎無野圍條軌，下邊又無網，一跌～～～～粉身碎骨，架車又無圍欄，媽媽拎住一大個袋，都好驚會跣左落下邊呀。

Claire: 媽咪，唔驚架，睇下，我都無事啦。

係呢架路軌車上，望到既牛。

之後，我地去揾地方醫肚。呢間餐廳係白撞既，但味道出奇好。而且餐廳好貼心咁放左好多書係度，比小朋友等既時候可以睇書。好貼心呀。

食飽飽，己經要趕住走，好RUSH既一趟南怡島之行。又係個句，下次真係唔好假期黎韓國，淨係南怡島落船，係車站等車都等左好耐，真係差兩三分鐘火車要開車。真係越等車越心慌。

爸爸話，下次要再黎南怡島，順便住一晚民宿，玩下水上活動喎。媽媽就話，媽媽工作只係負責影相，哇卡卡。