學校親子故事比賽 － K1 亞軍

14 Nov 14 學校搞親子故事比賽。因為媽媽想哥哥試下，咁公平起見，索性又幫阿妹報埋名。係屋企練習時，Claire 都要捉實媽媽隻手黎開始。估唔到，係學校都一樣。

按此觀看當日片段

細心D睇，其實會睇到，Claire 係好驚，佢講第一句時，係捉實佢阿媽架。而且，Claire 有兩截係停頓左唔郁～～～因為，佢見到評判笑呀。媽媽就不停係佢耳邊講，人地係笑你叻咋，你講得好，人地至會笑架嘛，你好叻架啦～～～

媽媽心諗： 比心機呀～～

其實，媽媽按住Claire 膊頭時，係FEEL到Claire 係震緊架。不過佢真係好勇敢，比媽媽想像中叻。真係肯講哂成個故事出黎。

媽媽：加油呀，人地唔係笑你呀。

平時係屋企練習，都係咁上下架咋。所以，Claire 已經做到超乎媽媽想像了。（按此看練習片）

因為 K1 仲係好細，所以無乜對手，亦都無乜參賽者係全家出動。Claire 幸運地得到亞軍。

有幸同校長合照，媽媽右手邊係教講故事既。呢年媽媽參加左學校既故事媽媽義工，有D扮音，都係向呢位導師身上偷師架咋。

 開開心心影合照。多謝同學仔家長幫手影呢張合照呀。

未比賽前，媽媽仲同人講，到時唔知阿妹會唔會肯講。估唔到，佢唔止肯講哂，仲做足戲TIM。真係令媽媽另眼相看，呢個小妹妹真係好勇敢。希望呢個奬，能幫到你明年K2擠身故事組啦。咁就可以令你講故事既技巧更加進步。

哥哥首次親子故事比賽

14 Nov 14 媽媽成世人都未試過表演講故事。就係為左對仔女，呢日終於要獻醜。事前，仲要花心機搞一大堆道具不特止，當日仲要捧埋返學揹埋書包，好似做姑厘咁。

其實呢個係親子故事比賽，返到學校，至發現好多學生都全家出動甚至有D出埋婆婆，真係陣容鼎盛；可惜爸爸撞岩要出差，唯有得媽媽一個人分演幾角，都辛苦第一次講故仔既哥哥一同分演角色。所以，媽媽講明，翌年再有呢D活動，爸爸一定要出場。哈哈哈。

事前叫工人姐姐幫手錄影，點知變左影相。

睇下，阿媽扮鬼扮馬入哂形（自以為），以前？無可能啦。呢次真係覺得自己好偉大架，為左做好榜樣，自己落力演出（自以為）。

睇左幾張POSE差唔多既相，工人終於去返錄影MODE，都叫錄到下半截（按此）。平時屋企練習既片。

客觀睇，相識既同學仔家長，都讚我地演出好好，有機會入三甲⋯⋯

主觀睇，媽媽自以為，好過無道具（佔20分）帶鄉音既母子互相對坐一問一答講故仔。

評判點睇？媽媽都好 R 頭。

因為結果，除左大失所望外，仲有令同學仔家長都愕哂然。

頭三甲唔入就算，可能評判BUY佢地全家總動員出動哂；咁我地得兩母子，無話可說。但我地連優異奬都無份。反而有對發音唔正、背故事都唔流暢、淨對坐互講既母子都可以拎到優異奬。媽媽真係好想問點解架。

哥哥對呢次結果好失望，索性連合照都唔影就返課室繼續上堂。

媽媽都有唔開心左成日。不過後黎又諗，其實呢個會唔會只係預演一下，我地升小一叩門個種期望同失望呢？尤其係好多野都唔係我地控制同預期之內。呢次只係皮毛比我地去試下咋。過左幾日，或者神令媽媽明白，凡事都不可自滿，要謙卑，學習下無期望，平常心面對既態度。所以，之後，媽媽都開始同哥哥講，我地不如試下，當下次故事比賽係一個學習機會： 就係當自己輸左時，學習替攞奬同學高興。呢個真係好難學，尤其當自己輸得不明不白個時。

媽媽咁大個都仲學習緊。希望 Isaac 可以比媽媽更早學識啦。

兄妹情深

8 Nov 14 Isaac 同Claire 雖然成日爭野，又成日嘈交成日打黎踢去。正所謂，打者愛也，其實呢兩兄妹感情不知幾咁好。當妹妹只有一塊餅，佢會讓比哥哥食；而哥哥收到老師送既糖，雖然得一粒，佢亦都會比妹妹架。有時，連媽媽都大為感動，估唔到妹妹會咁錫哥哥。尤其係當佢食緊野，而哥哥不在時，佢總會加一句： 留返比哥哥吖。

連影相，間唔時都會幾合拍既～～～間唔時囉。

10 Nov 14 雖然兄妹情深姐，但唔駛咁熱情呀嘛，係架車度連咀幾啖。真係睇見都毛管動。

如果你地成日都咁相親相愛就好囉。唔駛媽媽成日動氣鬧你地。咁媽媽就少D白頭髮，皺紋都少D 呀。

COOL的背後

7 Nov 14 呢日學校生日會，放學我地約左幾個同學仔去玩。大家都話Claire 好COOL，唔出聲～～～

直至大家散隊後，媽媽獨自帶Claire 去新屯中公園放一陣電順便接哥哥放畫班。吖，當獨自一個時，Claire 真性情大露，成個大笑姑婆咁。

Claire: 哈哈，好開心呀～～～我最鐘意玩盪千秋架啦。

睇完呢D相，Claire 同學仔家長都難以置信，明明平時見到個位恩恩好COOL 架，點解一個玩公園會咁放既呢？？！！媽媽解釋，因為未熟吖嘛。

到下次出黎，Claire 就會真性情流露架啦。

ANGRY BIRD特別班

3 Nov 14 無意中係畫班老師臉書睇到有ANGRY BIRD特別班。手痕幫Isaac 報名玩下。後黎收到老師比返上堂既相，睇Isaac 幾咁專心創作。

 剪ANGRY BIRD 咀要好小心架。

其實呢個特別班唔平，個半鐘要＄160元。製成品就係咁～～～又多一樣野放係屋企。

不過難得Isaac 造完蠻有滿足感，希望佢可以學習到呢種創作手藝，應用係其它作品上啦。

萬聖節交換糖

31 Oct 14 萬聖節，媽媽其實咁多年都無買衫比兩兄妹返學著。不過見今年主題係卡通人物，加上爸爸去年講過要買一套比妹妹。所以，今年就買套啦。返到學校，見到妹妹同學仔，齊齊影張合照先。論高度，好似DO RE MI咁。哈哈哈。

 不過，博文同學忽然好熱情，妹妹一臉無助。

Isaac: 喂，做乜蝦我個妹呀？

夜晚，聽Isaac 同學仔講，原來黃金商場年年都好多小朋友出黎交換糖。聽落幾好玩咁喎。一於拖埋兩兄妹出黎玩。誓估唔到，原來最大膽係最細粒既Claire，一抵埗，就不停派糖。媽媽想阻止都阻唔切。反而哥哥就被動好多，唔敢派。係咁跟住妹妹，見到妹妹順利，至敢行上去跟住比糖人。

Claire 派到不亦樂乎，見到小朋友就係咁周圍比糖。

Claire: 仲有邊個小朋友未比糖呢？

哥哥就含蓄D，拎都唔拎，要人地比糖仲要幫佢放入個袋到。媽媽真係頂佢唔住。

白雪公主呢個造型普通到不得了。呢晚已經撞到幾個，呢個小朋友只係其中一位咋。

Isaac 同學仔成班出動，當玩咁交換糖。醉翁之意不在酒，就係咁既意思。

全男班剩返白雪公主一個，不過大家都係好落力咁分糖出去。不過我地都係旨在玩下，所以九點前，大家都各自歸家了。

雖然只係好短暫既交換糖，不過兩兄妹返到屋企，不知幾咁開心，好滿足咁數算自己既收穫。見佢地咁開心，媽媽話下一年再去交換，順便訓練下佢地膽量。一舉兩得，幾好。

古靈精怪兩兄妹

27 Oct 14 為迎接學校搞既卡通人物扮演日，媽媽特登係淘寶淘左套白雪公主衫返黎。一收到，即刻試著睇下岩唔岩。哥哥見到妹妹咁可愛，即攬住阿妹。

睇睇下，阿妹笑起上黎真係幾甜既。著埋套衫，成個白雪公主咁。

擺左幾個古靈精怪POSE，Isaac 終於同妹妹正經黎一張合照。

見妹妹試得咁開心，Isaac 都唔輸蝕。即換埋爸爸泰國買返黎套超人衫著。今次輪到妹妹古靈精怪。呢兩兄妹真係合拍到不得了。

體操玩轉燒豬仔

27 Oct 14 睇得體操堂多，而家媽媽都好少錄影，因為來來去去都係個幾種動作。不過，呢日居然有新野玩，媽媽就覺得好似燒豬仔咁。兩兄妹好似隻燒豬咁轉黎轉去。

妹妹變燒豬

哥哥變燒豬

首次參賽－－2014 體操比賽

26 Oct 14 斷斷續續都有玩左成年體操，一直都無緣參加比賽。咁岩呢年呢幾個月KEEP住玩，撞正有比賽，一於去參加下。睇返條片，原來只係九月至開始練習架咋，睇返D動作，同比賽個日，差幾遠呢（按此去片）

體操比賽有三個自選動作，Isaac 一聽到，就話要其中兩個係佢唔識既側手翻。嘩，媽媽聽到，既開心又擔心。開心係，Isaac 肯挑戰難度，肯做一D佢無把握但又鐘意做既野；擔心係，始終係比賽，媽媽覺得係咪應該自選D有把握既動作去取分呢？？！！掙扎左一輪，媽媽客觀地分析呢個情況比Isaac 知，吖，Isaac 依然堅持兩個側手翻。好，既然你決定左，媽媽就支持你。Issac 上堂時，媽媽就會坐埋一邊留意其它人打側手翻既動作，再錄低比Isaac睇，解釋人地點做。比賽前一堂，見Isaac 好用心咁去留堂不停打側手翻（按此去片），媽媽睇見都好感動，就叫爸爸教佢，於是Isaac 係屋企都操左成個星期。卒之到比賽呢日，我地終於對打側手翻滿有把握。可惜～～～

Isaac: 好緊張呀，到我未呀～～

終於到Isaac 啦，呢個燕式平衡，媽媽係屋企都指導左好耐－－點至可以平衡得耐架～～呢日總算做到。

呢個動作，媽媽對Isaac 有信心。

以為跟住OK啦，吖，點知衰左肩胛倒立，激死。失手得好慘烈，亦都係最近摸到秘訣點做得好，但比賽當下，卻失準得誇張（按此去片）

幸而，呢大既失準，無影響Isaac 心理質素，佢依然好落力咁去打兩個側手翻。

因為失手，得分只有9.10. 呢次真係一個好寶貴既經驗。就係運動員點努力，上到台總會有失手時候。最緊要學識接受失敗。

 因為失手，我地只係攞到優異奬。

不過Isaac 都好開心，因為佢係真心鐘意呢項運動。仲同媽媽講，佢讀到大學，都仲要繼續玩體操彈床喎。

媽媽就心諗，你讀到大學至算啦，到時你都唔吼彈床啦。

緊張左成朝，賽後要鬆一鬆。我地索性由屋企踩單車踩到碼頭既單車公園，追到媽媽索哂氣。不過難得兩兄妹可以減壓輕鬆又開心一下，都值既。

2014兒童健康比賽 ／ 圓方放電 ／ 初玩籃球

19 Oct 14 呢日我地出到佐敦伊利沙伯醫院參加健康比賽。聽個名都怪，原來健康都可以用黎比賽。當日媽媽報名，諗住比妹妹玩下，又諗住哥哥實贏梗，所以去參加。爸爸陪佢地入去測試身體健康，同埋做D好簡單既體能測試。爸爸之後仲話Isaac 應該入到決賽。殊不知，唔知係咪佢身高超出年齡標準，因此而大大被扣分，最後，Isaac 係入唔到決賽既。爸爸摸不著頭腦，明明所有問題都係健康個類，體能測試又FIT到漏。無理由入唔到決賽吖～～～唯一就係佢身高爆標，被扣分。

唔緊要，影張相留念，証明到此一遊玩過下。Isaac 最後知道自己入唔到決賽，都好失望。佢好有決心咁同媽媽講： 出年再參加過。真係好有鬥智呀。因為，係 Isaac 自己心中，佢自知係一個健康既小朋友，所以，佢都有少少唔忿氣架。

玩完呢個比賽，我地去圓方放電。呢個公園，呢年都唔知黎左幾多次LU。真係一提呢度，Isaac 就會興奮到爆，因為勁多野玩。玩樂設施仲要係普通公園無既。

Isaac 身體力行，呢D叫瞓埋身落力去玩。

阿妹見到，又有樣學樣。

除左呢個又瞓又坐又企得既氹氹轉外，呢度仲有踩單車既氹氹轉，Isaac 一樣玩得好開心。仲扮司機係咁踩住載小朋友周圍去。

妹妹就仲未夠腳長去踩，得個坐字。不過一樣轉得好過癮。

係呢個公園放左成個鐘頭電，我地打道回府了。因為，下場仲要趕住陪爸爸去打籃球呀。爸爸恨左好耐架啦，想對仔女一齊睇佢打波。不過邊有睇吖～～～去到兩兄妹不知幾咁忙⋯⋯自己玩波。

Isaac: 哈哈，追到個波啦～～

Isaac: 阿妹，接波呀～～

Isaac: 唉，最後都係我自己執。

 嘩，阿妹射籃呀～～不過係爸爸出貓既～～

輪到Isaac 射～～～當然，第一次玩，梗係入唔到啦。當練下手都OK既～～