難得再玩沙

17 Oct 14 秋天到, 不過無阻我地去沙灘玩沙. 皆因呢日學校假期, 媽媽最鐘意就係趁平日學校放假既日子, 帶兩兄妹去沙灘. 因為人少, 可以玩得好舒服. 

兩兄妹好恨去沙灘玩沙了, 隔左成個炎夏, 呢日一去到, Claire 笑到四萬咁口. 

做乜望住D 沙笑到咁甜呢? 

去沙灘, 梗係玩沙啦. 睇Claire 幾咁投入專心.

自從呢幾個月玩左彈床後, Claire迷上左體操, 連係沙灘都要擘腿.

玩完擘腿又走返去筆沙, 都係沙好玩D.

其實好迷架. 小朋友筆沙, 係筆完又倒, 咁都可以玩成個鐘都唔厭. 真係奇.

見玩沙玩到悶(係媽媽悶), 媽媽索性叫兩兄妹瞓沙. 吖, 衰妹又肯喎. 不過駛唔駛咁七情上面呀~~

呢個表情, 交足功課.

不過都唔及呢個咁驚, 當媽媽倒沙上佢身時, Claire 係嚇到唔敢擘大眼睇. 一於無眼睇. 哈哈.

學校假期話咁快就玩左一個早上. 之後我地就要趕住返屋企梳洗, 媽媽準備返工去了. 下次放假再玩過.