2014哈爾演冰雪節

12 Oct 14 事緣暑假見到心晴行動售賣哈爾演冰雪節慈善門票，七十大洋包240元VALUE既門票，雖然限死得一日可以去玩。不過見咁抵，媽媽捱下熱，都照買飛。點知當日，哈爾演冰雪節主辦單位安排亂到九彩，真係早幾日都上哂新聞通哂天。見係咁，媽媽當做慈善，唔去。哈，後黎又宣佈憑當日門票，可以係指定期限入冰雪展。咁我地就擇左呢日，渣車入元朗。嘩，其實都幾簡陋下，爸爸話停車場就咁鋪石仔咋喎。ANYWAY，我地呢日，好在無之前網上評價咁亂咁多人咋。我地十點幾入到去，拎到11點冰館飛，未入館前，仲可以搏命玩，放哂電先。

爬呀爬，人人爬咁高做乜呢？

嘩，見唔見到Claire 個PAT PAT 係山頂出現呀～～真係唔好睇少佢人仔細細，體力真係唔差架。

彈跳力都唔弱TIM。

做乜好似個個彈床都要人爬架。

其實呢日幾熱下，又曬又熱，仲要玩彈床，媽媽都覺得佢地個PAT會好熱囉。

好明顯Claire 無視呢種酷熱既天氣啦。搏命爬。

兩兄妹咁齊心做乜呢？

哇哈哈，原來齊齊SIR落黎呀。兩兄妹，兩個姿勢SIR。

Claire: 好好玩呀～～

SIR 完一輪又爬過。真係睇見都好高下囉。

Claire: 你裝唔裝到我係邊吖？

睇下呢個妹妹，SIR到幾咁HIGH。

我地前後玩左成兩次彈床。真係熱到無人有。佢地又出奇地唔覺得又熱又辣PAT PAT。之後，我地走去排隊玩車。不過妹妹唔夠高，只可以好安全咁係一邊自己踩，其實都好，至少無左大細路，真係踩得安心好多架。

踩起單車個樣，點解好似好英咁架～～

 之後入冰館，我地有備而來，就係私伙羽絨同冷帽手襪。不過都係凍到我地縮下縮下，Claire 後尾都凍都唔識郁，係咁話凍。好搞笑。

Claire: 媽咪，我對手凍到無知覺啦～～

Claire: 咦，唔好搞我啦，我已經好凍啦～～

Claire: 嘩，媽咪，呢間係咪糖果屋黎架～～～咁搞笑既？

雖然凍，不過點都要玩返轉冰滑梯至得既。爸爸見妹妹條褲咁薄，對腳好凍，就做人肉墊，墊住Claire SIR落黎。好玩度應該係 0, 不過搞笑度就滿分。笑死媽媽。按此去片

如果唔係用左七十元買慈善飛玩足240元，相信媽媽唔會黎到乜都玩囉。真係睇完冰館就走，因為彈床同賽車，如果單比錢，真係唔抵玩。又好在，我地都係近近地黎，叫做開下眼界，比小朋友睇下冰雕咁。所以都叫做值得黎下既。