WATOTO 巡迴演唱 2014

6 Oct 14 朋友SENT黎條LINK，話係好好睇既兒童合唱團，見係免費。咁岩今年又有係屯門搞喎，一於申請門票，同仔女去見識下。

因為呢日係平日，我地上完體操堂沖埋涼至去，所以去到，人地已經唱緊，不過仲好，我地遲左，坐正係樓上雅座，無乜人，可以坐係中間望落去。

原來係班深膚色小朋友唱感恩歌，原來WATOTO係基督教團體黎。真係唔去聽都唔知。

朋友講到好感動好好睇，媽媽就覺得一般。不過叫做比小朋友開下眼界咁囉。有幾可香港可以睇到成班非洲小童打鼓唱歌跳舞吖。

除左小童，仲有青少年上台打非洲鼓。

兩兄妹兩個性格，妹妹就睇得好入神，好鐘意。哥哥就一般。臨走，妹妹仲話要同表演人士合照TIM。

影左呢張相後，妹妹翌日同媽媽講，好掛住個位好矮既黑色哥哥喎～～～原來係呢個，佢意思係要媽媽比張相佢睇返懷念下。乜咁快就咁少女情懷呀～～

其實同場仲同其它表演人士影相架～～～點解妹妹只係掛住男仔架。

 一黑一白，好強對比。而妹妹同哥哥亦都係好大對比，一個係咁要影相至走；另一個毫無反應。

呢場WATOTO為時大約個半鐘。完場有叫在場人士支持非洲人士手工造既公仔等等，不過媽媽就無買到。只係一心黎比小朋友見識見識，跟住就打道回府。好似好衰咁。話哂人地咁遠水路由非洲黎香港做巡迴演唱會嘛。