一家貓頭鷹: 台北台中之旅DAY 1 -- 上引水產. 六福莊

3 Nov 13 兩周前爸爸忽然決定去旅行. 於是媽媽好匆忙咁制定行程. 本來話去清境, 點知後黎知道淡季平日無綿羊睇, 即係得塊大草地. 爸爸就話唔去清境, 費事小朋友悶. 所以即改行程, 又係舊地重遊---飛牛牧場. 不過, 今次配搭同上年唔同. 今次我地台北入, 台中走.

DAY 1 八點二出發, 一去到台北排隊提款, 排隊買電話上網咭, 都去左成個鐘. 拎住大行李又拖住兩個小朋友,問過爸爸意見, 爸爸話比多少少錢包車司機, 由機場送我地去台北上引水產, 再落六福莊. 多謝2500台幣. 同直接去六福, 爭1200台幣.

好, 我地十二點前去到上引. 估唔到都要等成個鐘至有位. 差唔多到我地入座時, 見到唔少香港人去拎飛, 但我估佢地至少等到TEA TIME至可以入去食.

兩大兩細齊齊企係度食. 店員有木箱比小朋友企, 所以大家夠高一齊開餐.

對正呢櫃刺身, 厚一厚, 真係流哂口水.

叫比小朋友既, 走山葵.

爸爸好豪咁叫左一客熟鮑魚壽司. 其中一件落左係妹妹肚中, 真識食.

嘩, 好厚切既厚切刺身呀, 正.

新鮮吞拿魚同海膽. 同日本有得揮.

食飽飽, 到上車時間, 我地就出發去六福莊. 呢次BOOK 六福莊掙扎左好耐,成兩千蚊港紙一晚, BOOK左又未必見到動物. 不過爸爸話試下. 如果經六福莊官網訂, 成3300港紙不過包晚餐. 咁媽媽心諗, 點都唔會食成千幾蚊晚餐呀嘛. 所以經返萬福旅行社訂. 日子問題, 官網同六福都話淨得肯亞緣地有房. 剛果綠地要翌日才有房. 唉, 台北入既機票比左錢, 唔想係台北磨一日至入黎住. 又唯有比多500元港紙住肯亞綠地啦. 點知後悔了~~~~

我地入住長頸鹿館, 呢個都唔梗要.

KEY POINT 係, 我地竟然住二樓呀, 嗚嗚嗚~~~~比成2000元住二樓. 媽媽諗住比多D錢, 特登住綠地, 意思係想有動物係窗邊裝我地架嘛, 家下二樓喎~~~~~

呢間房比剛果貴, 媽媽研究左好耐, 都問過官網, 其分別就係四人房同六人家庭房. 所以我地二樓的房, 有樓梯上去另一層.

上到另一層, 有個小朋友興奮到彈左上床. 下邊一張, 上邊兩張.

樓梯轉角有幅畫. 好有日落FEEL, 好RELAX.

六人房所以連浴室都有兩間. 同洗手間分開, 洗手間又有兩格.

六福莊RECEPTION 有隻鹿標本.

係我地瞓個座館, 都有動物頭. 搞到個氣氛好神秘恐怖咁. 兩個小朋友經開都好驚.

六福莊每日限時限刻全天都有節目比住客睇或玩.不過事後感: 都幾流同悶下, 好一個無事揾事做, 叫做比住客覺得節目豐富咁囉.

自己周圍睇動物都無咁嬲

有點後悔無係台北買埋SUNNYHILLS至入六福TIM. 因為入左黎, 出唔返去, 困住係酒店等天黑. 早知晏少少至入黎. 因為我地一早落機, 食完上引就即黎六福. 真係有少少可惜. 不過如果愛RELAX, 呢度係唔錯選擇.

無所事事, 行去兒童館睇下, 以為有野玩. 點知無野玩既. 反而兒童館隔離個間糖果屋吸引D.

點知原來唔係玩架, 係電單車停車房黎

無所事事遊完酒店範圍, 我地仲有時間叫酒店幫我地切生果. 你話我地幾咁悠呢. 呢兩個大大蘋果, 係上引對面的小販買架, 成15元港紙一個. 都唔算平. 不過見好多當地人買, 至買黎試下. 的確比香港大陸蘋果多蘋果味喎.

睇下酒店水杯同蘋果, 就知個蘋果有幾大.

到晚飯時間, 因為我地唔經官網訂, 所以唔包晚餐. 我地去左RECEPTION個層間餐廳食. 大大個牌寫住晚飯套餐NT900/人. 爸爸就板起塊面話不如食BUFFET. 但媽媽明明事前做功課記得, 住呢度唔一定得BUFFET架喎. 卒之一問之下, 呢間餐廳係可以散叫, 一個炒飯都係NT280咋嘛. 幾咁平. 邊會食到千四蚊港紙吖.去萬福訂酒店 VS 官網既差價食到好多餐LU.