台北台中之旅 DAY 4 (上) - 龍騰斷橋. 勝興車站. 彰化扇形車庫

6 Nov 13 呢日, 我地正式落台中了. 由飛牛去台中, 反正包車, 索性包車參觀埋附近景點. 由福田瓦舍去勝興車站同龍騰斷橋, 都係十分鐘車程. 話咁快, 我地去到斷橋了. 呢個斷橋好老架啦, 不過地震震斷哂. 仲生埋草, 而家變左景點之一. 

好快咁到此一遊, 跟手順路去埋勝興車站. 話就話係全台灣最高既車站, 不過去到都唔覺得涼. 反而之前個兩日係六福, 仲凍過車站呢度.

車站對住既茶座. 不過我地黎主要目的除左影相外,仲諗住比仔仔玩小火車. 可惜一問之下, 原來小火車只限周日開架咋, 激死. 呢次台中之旅, 乜都失望,諗住租民宿可以比小朋友睇滿天星斗, 又睇下螢火蟲. 兩樣都無得睇. 黎到車站又無小火車玩. 唉.

 無小火車玩, 一場黎到, 求其咁行下條老街. 真係好求其架咋, 我地行左五分鐘都無就折返走人.皆因下雨加埋望落好似無乜野行咁.

呢座咁日式既建築物, 係當時站長既宿舍黎架喎. 

 好快咁DOU左個圈, 走人. 見時間尚早. 媽媽建議去埋附近既名點, 就係鯉魚潭. 都唔附近, 渣車都要20分鐘車程.

不過呢廿分鐘係值得既. 因為去到好舒服, 仲舒服過斷橋同車站. 一望無際既水塘, 好似香港既大海咁.

好有氣勢既堤壩流返水出黎. 可想言之呢個水塘多水到呢. 

睇完呢個鯉魚潭, 我地出發去台中了. 落到台中, 第一個景點梗係去睇仔仔鐘意既車車啦 -- 就係彰化扇形車庫. 點不知又一大失望: 觀景台無開放比我地上去睇, 亦都無火車開出去旋轉台. 唉, 真係黎同瞓緊覺既車車影相. 咁遠水路真係有點~~~

呢兩架車仲噴緊蒸氣架. 

呢個車站最搞笑唔係車. 而係呢棵樹. 樹枝係向外向橫生既. 睇下D人係棵樹下企得到, 樹枝又打橫就知.

睇完車站, 我地去左司機介紹既一間食店LUNCH. 好一個麻甩食店, 全店麻甩. 好似香港既深水埗的士司機飯局咁. 仲要食到一身汗. 不過撇除客觀環境, 呢間既餸菜又真係幾有鑊氣既.

食完飯, 我地又出發去買太陽餅同綠茶. 加埋高美濕地.